Úttekt á starfsemi Menntaskólans við Hamrahlíð unnin fyrir mennta ...

10. Niðurstöður
Áhersla úttektarinnar fólst í að leggja mat á stjórnun, kennsluhætti, námsmat, námskröfur,
nýtingu tíma, samskipti, starfsanda, viðhorf nemenda, starfsfólks og nærsamfélags til
skólastarfsins, menntun kennara og hvernig innra mat skólans virkar og nýtist til
umbótastarfs.
Úttektin leiðir í ljós að stefna og markmið Menntaskólans við Hamrahlíð eru vel skilgreind.
Mikill metnaður ríkir í skólanum um kennsluhætti og fagmennsku sem sést m.a. í mjög
fjölbreyttu námsframboði og skýrum námskröfum, vel menntuðum og áhugasömum
kennurum, sterkum nemendum sem koma í skólann, stuðningi við nemendur með sérþarfir,
litlu brottfalli, góðum árangri á stúdentsprófi, vel búnu skólasafni og fjölbreyttri námsráðgjöf
við nemendur. Starfsandi er góður bæði meðal nemenda og starfsmanna, fjölbreyttar leiðir til
boðskipta og upplýsingamiðlunar, húsnæði er rúmgott og aðstaða góð. Nemendur og
foreldrar virðast ánægðir með skólann og hafa góðan aðgang að kennurum og stjórnendum
og útskrifaðir nemendur hans telja undirbúning fyrir háskólanám góðan. Skólastjórn,
skólanefnd, nemendafélag og foreldraráð eru virk og hafa komið að ýmsum málum. Yfirstjórn
skólans treystir starfsfólki sínu vel, skipulag skólastarfsins er gott svo og fjárhagsleg stjórnun
skólans.
Gagnrýni beinist helst að því að endurgjöf, hvatning og í sumum tilfellum upplýsingagjöf
stjórnenda mætti vera meiri og stjórnunin á vissan hátt formlegri. Innra mat skólans þarf að
vera samstarfs- og umbótamiðaðra t.d. með því að fylgja betur eftir niðurstöðum úr
könnunum og mati með kynningum og aðgerðum. Starfsmannasamtöl þurfa að vera
reglulega, endurskoðun stefnu og aðgerða í vímuvörnum er æskileg og að uppfylla þarf
skilyrði skólasamnings um grænfánaverkefni.
44