Full page fax print - Landbunadur.is

Kartöflutilraunir (132-9503)
Tilraun nr. 798-03. Flýtiáburður á kartöflur, Þykkvabæ.
Gerðar voru þrjár tilraunir með áburð á kartöflur í Þykkvabæ. Haldið var áfram að bera hluta
áburðar í rásina með kartöflunum. Til þess var notaður áburður frá Norsk Hydro sem ber
vöruheitið OPTI START TM og er mónóammóníumfosfat (NP 12-23). Þessi flýtiáburður var
einn þriggja þátta. Hinir voru viðbót af nitri og viðbót af kalíi við þann grunnáburð sem
bændurnir nota. Auk þess voru tveir aukareitir með gifsi til að prófa áhrif þess að bera á
kalsíumáburð. Þættir tilraunarinnar voru þessir:
A. Staðsetning OptiStart
a1 Með öðrum áburði
a2 Með kartöflum
B. Viðbót af N
N0 0 N (engin viðbót)
N1 40 N = 120 kg/ha Kjarni
C. Viðbót af K
K0 0 K (engin viðbót)
K1 83 K = 200 kg/ha kalísúlfat
Gifs var borið á aukareiti í miðri tilraun, 200 kg/ha. Þessir reitir voru annar með K0 og hinn
með K1, þ.e. kalísúlfat á annan reitinn. Önnur meðferð var A1 og N0, þ.e. OptiStart með
áburði (þó ekki í Hákoti T) og án aukaskammts af N.
Reitir voru 3 m í tveim röðum, 72 sm milli raða í tveim tilraunum í Hákoti og 75 sm í
Vatnskoti. Samreitir voru 2 og fjöldi reita í hverri tilraun því 2×2×2×2+2=18.
Garðurinn í Hákoti T var hvíldur með byggi 2002 og hálmurinn plægður niður. Í
Hákoti S höfðu kartöflur verið ræktaðar samfellt í 3 ár. Garðurinn í Vatnskoti hefur verið
ræktaður frá því um 1970. Hann er mjög sendinn og hættir til að fjúka. Í Hákoti S var notað
Premier en Gullauga í hinum tilraununum. Grunnáburður í Hákoti var 1200 kg/ha af áburði
frá Ísafold, 12-12-17. Það jafngildir 144-63-169 kg/ha N-P-K. Í Vatnskoti var áburðurinn
1100 kg/ha af Græði 1, 132-72-155 kg/ha N-P-K. Auk þess fengu allir reitir 83 kg/ha af
OptiStart (NP 12-23), nema gifsreitir í Hákoti T. Grunnáburður alls var því 154-82-169 í
Hákoti og 142-91-155 N-P-K í Vatnskoti. Bændurnir gáfu upp magn grunnáburðar og var
hann ekki mældur.
Sett var niður og borið á 27. maí. Kartöflur voru settar og grunnáburði dreift með
niðursetningarvél og hreykt þegar tilraunaáburði hafði verið dreift. Með vélunum var áburði
beint nokkuð til hliðar við útsæðið báðum megin. Tvö jarðvegssýni voru tekin úr hverri
tilraun þegar sett vat niður. Í eftirfarandi töflur eru einnig niðurstöður úr tilraun á Korpu þar
sem tekin voru fjögur jarðvegssýni. Steinefni voru mæld í AL-lausn og pH í vatni. Jarðvegur
var þurrkaður við 30–35°C, en nokkur tími leið eftir það, þar til kolefni var mælt. C er % af
þurrum jarðvegi, P mg á 100 g af þurrum jarðvegi og katjónir mj. á 100 g af þurrum jarðvegi.
C P Ca Mg K Na pH
Hákoti, T 1,25 3,2 5,1 2,0 0,82 1,45 5,7
Hákoti, S 1,68 7,1 7,5 3,4 0,87 1,52 5,7
Vatnskoti 1,47 6,1 7,0 2,9 1,30 1,20 5,6
Korpu 3,2 0,65 7,5 1,5 0,71 0,96 6,2
Tekið var upp 27. ágúst. Grösin voru sviðin um hálfum mánuði áður í Hákoti T, en ekki í
hinum tilraununum. Sums staðar var niðursetningin nokkuð óregluleg. Grös voru talin og
tekið upp úr öllum reitnum, nema grös sem voru á mörkum reita. Þau voru einnig talin og
talin til beggja reita jafnt. Á næstu dögum var uppskeran flokkuð og vegin, sterkja mæld með
flotvog og þurrefni mælt. Ein þurrefnismæling glataðist bæði í Hákoti S og Vatnskoti.