Create successful ePaper yourself
Turn your PDF publications into a flip-book with our unique Google optimized e-Paper software.
Forsendur<br />
frjálshyggjubyltingarinnar<br />
Hannes Hólmsteinn Gissurarson<br />
Hannes H. Gissurarson varð helsti frumkvöðull frjálshyggjunnar á Íslandi kornungur. Hér lýsir hann óvægnum átökum um hana<br />
fyrstu árin.<br />
Mynd: Geir Ólafsson.<br />
Ísland skiptir ham<br />
Síðustu fimmtán árin hefur Ísland skipt um ham. Fyrir 1991 var<br />
verðbólga miklu meiri en í grannríkjunum og atvinnulíf óstöðugt,<br />
þandist út og dróst saman á víxl. Í sjávarútvegi var feikilegum<br />
fjármunum sóað í of mikla sókn í fiskstofna. Þá var oftast halli<br />
á fjárlögum. Hið opinbera safnaði skuldum, og hér var rekinn<br />
pilsfaldakapítalismi, svo að illa rekin fyrirtæki gátu jafnan treyst á<br />
aðstoð ríkisins. Háir skattar á fyrirtæki komu í veg fyrir eðlilegan<br />
vöxt þeirra. Ríkið rak fjölda fyrirtækja, ferðaskrifstofu, prentsmiðju,<br />
síldarvinnslu, banka og ýmsar aðrar lánastofnanir og síma. Vextir<br />
skömmtuðu ekki fjármagn, heldur misvitrir bankastjórar, sem iðulega<br />
voru undir áhrifum stjórnmálamanna, en þeir vildu auðvitað frekar<br />
fjárfesta í atkvæðum en arðsemi. Landsframleiðsla á mann var að<br />
vísu veruleg á Íslandi, en þegar horft er um öxl, sést, að ósjaldan var<br />
skýringin á því ýmist stríðsgróði eða rányrkja. Íslendingar höfðu fram<br />
til 1940 verið hálfdrættingar á við Dani, en komust þá upp fyrir þá<br />
vegna stríðsgróðans. Í kalda stríðinu munaði mjög um framkvæmdir<br />
varnarliðsins. Fyrir útfærslu fiskveiðilögsögunnar í fjórum áföngum<br />
veiddu útlendingar helming heildaraflans á Íslandsmiðum, en eftir<br />
hana féll hann óskiptur í hlut Íslendinga. Síldarstofninn hvarf um<br />
miðjan sjöunda áratug, og þorskstofninn var kominn að hruni í lok<br />
hins áttunda. Velmegun Íslendinga var því sýnd veiði, en ekki gefin.<br />
Þeir höfðu haldið misjafnlega á málum sínum. Það var ekki út í<br />
bláinn, að hagfræðingar spáðu því um 1990, að Íslendingar yrðu í<br />
aldarlok í röð fátækustu þjóða í Norðurálfunni.<br />
Nú er öldin önnur. Verðbólga hefur frá 1991 verið svipuð og í<br />
grannríkjunum. Halli á fjárlögum snerist í afgang, sem notaður<br />
var til að greiða upp skuldir ríkisins, sem nú má heita skuldlaust,<br />
ef tekinn er með í reikninginn gjaldeyrisforði Seðlabankans. Í skjóli<br />
kvótakerfisins spratt upp fjöldi öflugra útgerðarfyrirtækja, sem njóta<br />
þess, að takmarkaður aðgangur er að takmörkuðum auðlindum,<br />
eins og hagfræðin kveður nauðsynlegt. Íslenskur sjávarútvegur er<br />
miklu betur rekinn en gerist víðast annars staðar. Atvinnurekendur<br />
treysta ekki lengur á aðstoð ríkisins, heldur vita, að þeir standa og<br />
falla með eigin gerðum. Ríkið hefur selt fjölda fyrirtækja fyrir um<br />
150 milljarða íslenskra króna að minnsta kosti að núvirði, þar á<br />
meðal viðskiptabankana tvo og Símann. Vextir ráðast nú á frjálsum<br />
markaði, svo að bankar hafa breyst úr skömmtunarskrifstofum<br />
í þjónustufyrirtæki, sem keppa um viðskiptavini. Lífeyrissjóðir<br />
Íslendinga eiga vel fyrir skuldbindingum ólíkt sambærilegum<br />
stofnunum erlendis, og þar hefur myndast mikill sparnaður, sem<br />
skilað hefur sér í fjármagni á markaði. Leystur hefur verið úr læðingi<br />
ótrúlegur kraftur, eins og sést á íslensku útrásinni. Nú veifa íslenskir<br />
víkingar ekki sverði, heldur verði. Hin góðu lífskjör Íslendinga hvíla<br />
ekki lengur á rányrkju eða stríðsgróða, heldur á bættri afkomu og<br />
bjartsýni um framtíðina. Þótt einstaklingar og fyrirtæki skuldi að<br />
vísu talsvert, er þjóðin ung og hraust. Mengun og ofnýting ógna ekki<br />
auðlindum Íslendinga. Umfram allt hefur hugarfar breyst: Gróði er<br />
ekki lengur skammaryrði, heldur keppikefli. Nú lítur æskan upp til<br />
athafnamanna, eins og rithöfunda og skálda áður.<br />
Þessi lýsing á hamskiptum Íslands er ekki skáldleg sýn, heldur<br />
studd traustum gögnum. Fraser-stofnunin í Vancouver í Bresku<br />
Kólumbíu hefur tekið saman vísitölu atvinnufrelsis í heiminum<br />
að frumkvæði hins heimskunna hagfræðings Miltons Friedmans.<br />
Samkvæmt þeirri vísitölu var Ísland með einkunnina 4,1 af 10<br />
mögulegum árið 1975, en 7,9 árið 2004. Vísitalan er mæld í 124<br />
ríkjum, og var Ísland 53. ríkið í röðinni árið 1975, en hið níunda<br />
árið 2004, og má ætla, að landið hafi þokast eitthvað áfram upp eftir<br />
sölu Símans árið 2005. Samkvæmt annarri vísitölu atvinnufrelsis,<br />
sem Heritage Foundation í Washington-borg tekur saman, er Ísland<br />
enn ofar á lista, í fimmta sæti. Hvað olli þessum snöggu umskiptum?<br />
Auðvitað er ein skýringin fólgin í aðstæðum. Veruleikinn knúði menn<br />
til vitundar um það, að víðtækara atvinnufrelsi væri nauðsynlegt.<br />
6