tlhako ya molaotshepetšo wa polelo ya bosetšhaba - Saps

PEGOPELE KA TONA YA BOKGABO, SETŠO, SAENSE LE THEKNOLOTŠI,
NGAKA B S NGUBANE
Polelo ya motho ke “letlalo la bobedi” ka mekgwa ye mentši: leruo la tlhago la motho
yo mongwe le yo mongwe yo a tlwaelegilego, leo re le šomišetšago go hlagiša
ditshepo le ditakatšo tša rena, go hlohlomiša maitemogelo le setšo sa rena, le go
aga setšhaba sa rena le melao yeo e se laolago. Polelo ke yona yeo e re thušago go
šoma bjalo ka batho lefaseng leo le dulago le fetoga. Ka moo tokelo ya motho ya go
šomiša polelo ya gagwe e amogetšwe ka gare ga Molaokakanywa wa rena wa
Ditokelo gomme Molaotheo wa rena o amogela gore dipolelo tša batho ba rena ke
mothopo woo o swanetšego go hlokomelwa.
Gabotsebotse ke ikgantšha ka gore, morago ga tshepetšo ya therišano, mafelelong
re maemong a go tsebagatša tlhako ya molaotshepetšo wa polelo wa Afrika Borwa.
Ye ke pheleletšo ya tshepetšo yeo e thomilego ka 1995 ge ke be ke kgetha
Sehlopha sa Sepane sa Peakanyo ya Polelo (LANGTAG) gore se mphe dikeletšo ka
tlhako ya peakanyo le molaotshepetšo wa polelo wa go tshwaragana. Kgato ye e be
le bohlokwa ka gore (a) ga go na kgotlelelo ya phapano ya polelo gomme
“dipolelodintši e ba bothata bja go tura” bjo bonalago ka go makala a mangwe a
setšhaba sa rena, gape (b) go solwa go oketšegago ga polelotee ka Afrika Borwa go
tšwa go bakgathatema ka go polelo.
Tlhako ya Molaotshepetšo wa Polelo ya Bosetšhaba e theilwe go dipoelo tša
tshepetšo ya rena ya therišano, mmogo ka LANGTAG gomme morago ga moo ka
maiteko a kgoro ya ka ka tšhomišano le Phanele ya ka ya boeletši ka
Molaotshepetšo wa Polelo. Tlhako ya Molaotshepetšo e bohlokwa go taolo ya
methopo ya rena ya polelo ya go fapana le phihlelelo ya nepo ya mmušo ya go
godiša temokrasi, toka, tekatekano le kopano ya setšhaba. Ke ka moya wo gore
kgodišo ya dipolelo tše 11 ka moka tša semmušo tša naga ya rena yeo e
kgonegišitšwego ka gare ga Molaotheo e lego bogareng bja molaotshepetšo.
Tlhako ya Molaotshepetšo ye e lemoga gape taba ya gore mohola wa dipolelo tša
rena o phethwa gabotsebotse ke tšhomišo ya tšona ya sepolotiko le ya leago le ya
ikonomi. Ge polelo e lahlegelwa ke mohola wa yona ka go makala a le maemo a
yona a a fokotšega. Tlhako ya Molaotshepetšo e tšeela hlogong gore re lebane le
tlhotlo ya kloupalaeseišene le gore dipolelo tša rena tša tlhago di swanetše go ba
karolo ya tikologo ya rena ya theknolotši ya go gola ka lebelo. Ka gona, e
ikemišeditše go netefatša ka leswa maemo le tšhomišo ya dipolelo tša tlhago tša
Afrika Borwa.
Ke tshepa gore Maafrika Borwa ka moka a tla amogela Tlhako ye ya
Molaotshepetšo wa Polelo ya Bosetšhaba bjalo ka ya bona. Ke tshepa gore mmogo
re swanetše go netefatša gore molaotshepetšo wo e ba nnete ka maphelong a rena,
gomme e dira gore re ikgogomoše ka le go netefatša ka leswa boitšhupo bja rena
bjalo ka Maafrika Borwa bja go swana bo le tee.
……………
NGAKA B.S NGUBANE, MP
#Sepedi