tlhako ya molaotshepetšo wa polelo ya bosetšhaba - Saps

2.4.5 Mmušo o tla hlohleletša, gomme mo go kgonegago o tla thekga mekgatlo ya
praebete go tlhabolla le go diragatša melaotshepetšo ya yona ka mokgwa wa go
sepelelana le tlhako ya molaotshepetšo wa polelo ya bosetšhaba.
2.4.6 Go godiša dipolelodintši molaotshepetšo wo o phetha ka tšhomišo ya dipolelo
tša go fapana ka go dipopego tša mmušo ka moo go latelago:
2.4.6.1 (Di)polelo tša go šoma/(Di)polelo tša go rekhotla: Ka kwano, sebopego se
sengwe le se sengwe sa mmušo se swanetše go kwana ka (di)polelo ya go šoma
(ya ka gare le ka ntle ga kgoro ya mabaka a kgokagano): Ge fela e le gore moo go
kgonegago ga go motho yoo a tla ganelwago go šomiša (di)polelo yeo a e ratago.
Ka mabaka a go sepetša dikopano le go dira mediro ye itšego, go swanetše go
dirwa maiteko afe goba afe go šomiša dinolofatši tša nolofatšo ya polelo tša go
swana le/goba botoloki (bja tatelano goba bja sammaletee mmogo le bja tshebelo)
moo e lego gore go a kgonega.
2.4.6.2 Kgokagano le setšhaba: Ka mabaka a poledišano ya mmušo, kgetho ya
modudi e swanetše go šomišwa. Poledišano ya molomo ka moka e swanetše go
direga ka polelo ya semmušo yeo batheeletši ba e ratago. Ge go hlokega, go
swanetše go dirwa maiteko ka moka go šomiša dinolofatši tša nolofatšo ya polelo
tša go swana le botoloki (bja tatelano, le sammaletee, mmogo le botoloki bja mogala
goba bja go sebelwa) moo e lego gore go a kgonega.
2.4.6.2 Dikgatišo tša mmušo: Lenaneo la kgatišo la dipolelodintši tše šomišegago le
swanetše go latelelwa ke dikgoro tša mmušo tša bosetšhaba moo e lego gore ga go
nyakege kgatišo ka dipolelo ka moka tša semmušo tše 11.
2.4.6.3 Moo e lego gore tshepetšo ya mmušo ya go kgontšha le ye hlomamego mo
go tekanyo efe goba efe e nyaka poledišano ya go kwešišega gabotse, e swanetše
go gatišwa ka dipolelo ka moka tša semmušo tše 11, gomme ka diprofenseng, ka
dipolelo ka moka tša semmušo tše boletšwego.
2.4.6.4 Mabakeng ao go wona ditokomane tša mmušo di ka se bego gona ka
dipolelo ka moka tša semmušo tše 11, dikgoro tša mmušo tša bosetšhaba di
swanetše go gatiša ditikomane sammaletee ka bonyane dipolelo tše tshela.
Kgetho ya dipolelo e tla dirwa ka moo go latelago:
Bonyane ye tee go tšwa go sehlopha sa Nguni (isiNdebele, isiXhosa, isiZulu le
siSwati);
Bonyane ye tee go tšwa go sehlopha sa Sotho (Sepedi, Sesotho, Setswana)
Tshivenda;
Xitsonga;
Seisimane; le
Seafrikanse.
2.4.6.5 Motheo wa tšhielano o swanetše go šomišwa ge go kgethwa dipolelo tša go
gatiša ditokomane tša mmušo ka go dipolelo tša Nguni le Sotho.
#Sepedi