Mál nr. 5/2005 - Óbyggðanefnd

2.3. Lýstar kröfur og kynning
Kröfulýsingar fjármálaráðherra fyrir hönd íslenska ríkisins um þjóðlendur á
Norðausturlandi bárust 11. nóvember 2004. Óbyggðanefnd birti tilkynningu um
málsmeðferð á framangreindu svæði og útdrátt úr kröfum ríkisins, ásamt uppdrætti, í
Lögbirtingablaðinu 28. desember 2004, Fréttablaðinu 7. janúar 2005 og
Morgunblaðinu 9. janúar, sbr. 2. mgr. 10. gr. laga nr. 58/1998. Skorað var á þá sem
teldu til eignarréttinda á því landsvæði sem félli innan kröfusvæðis ríkisins að lýsa
kröfum sínum fyrir óbyggðanefnd í síðasta lagi 31. mars 2005. Þá kom fram að
yfirlýsingu um kröfugerð og málsmeðferð yrði þinglýst á þær fasteignir á svæðinu
sem skráðar væru í þinglýsingabók og málið varðaði, sbr. 2. mgr. 10. gr. laga nr.
58/1998.
Kröfur fjármálaráðherra voru gerðar aðgengilegar almenningi á skrifstofum
sýslumanna á Seyðisfirði og í Húsavík, auk sveitarfélaga á kröfusvæðum og
heimasíðu óbyggðanefndar. Þá var málið kynnt í fjölmiðlum.
Frestur annarra til að lýsa kröfum á kröfusvæði ríkisins var framlengdur
lítillega í þeim tilvikum að leitað var eftir slíku með rökstuddum hætti og bárust
síðustu kröfulýsingar í maí 2005.
Gefið var út yfirlit yfir allar lýstar kröfur og þær færðar inn á uppdrátt.
Lögboðin kynning fór fram með því að yfirlit og uppdráttur lágu frammi á skrifstofum
sýslumanna á Seyðisfirði og í Húsavík, frá 25. maí til og með 30. júní 2005, sbr. 12.
gr. laga nr. 58/1998. Athugasemdafrestur var til 11. júlí 2005. Framangreind
kynningargögn voru jafnframt aðgengileg á skrifstofum viðkomandi sveitarfélaga,
skrifstofu óbyggðanefndar og heimasíðu óbyggðanefndar. Vakin var athygli á
kynningunni í fjölmiðlum. Engar athugasemdir bárust fyrir lok athugasemdafrests.
Fjármálaráðherra fyrir hönd íslenska ríkisins lagði fram kröfulýsingar um
þjóðlendur á svæðinu í 6 hlutum og 9 kröfulýsingar vegna jarðeigna ríkisins. Á móti
barst 101 kröfulýsing ýmissa aðila, sem sumar sköruðust eða náðu til fleiri en eins
landsvæðis.
2.4. Mál nr. 5/2005, Öxarfjarðarhreppur
Í júlí 2005 var lögmönnum aðila tilkynnt að óbyggðanefnd hefði ákveðið að skipta
þjóðlendukröfusvæði íslenska ríkisins niður í fimm mál, þ.e. mál nr. 1/2005, Fljótsdal
og Jökuldal austan Jökulsár á Jökuldal; mál nr. 2/2005, Jökuldal norðan og vestan
Jökulsár á Jökuldal ásamt Jökulsárhlíð; mál nr. 3/2005, Vopnafjarðarhrepp; mál nr.
4/2005, Svalbarðshrepp, Þórshafnarhrepp og Skeggjastaðahrepp, og mál nr. 5/2005,
Öxarfjarðarhrepp.
Mál nr. 5/2005 var fyrst tekið fyrir á fundi óbyggðanefndar og forsvarsmanna
málsaðila 17. ágúst 2005. Gerð var grein fyrir því að óbyggðanefnd skipuðu í málinu
þeir Karl Axelsson formaður, Allan Vagn Magnússon og Benedikt Bogason. Gefið
5