Mál nr. 5/2005 - Óbyggðanefnd

Þá var ferðinni heitið að Sandskála sem er gangnamannaskáli. Gengið var
áleiðis í átt að Sandskála vegna bilunar í rútubifreið. Þar var gert matarhlé og þeir
Bragi, Kjartan og Jón Valgeirsson hdl. hættu þátttöku í vettvangsferð. Þá var haldið
áfram sem leið lá vestur slóða um Hólssand. Karl Sigurður lýsti staðháttum og fleiru
því sem fyrir augu bar. Síðan var ekið inn á gamla Hólsfjallaveg sem að sögn
heimamanna var ruddur um 1930. Staðnæmst var við gamalt sæluhús sem stendur við
veginn og myndir teknar. Áfram var haldið og beygt inn á Nýja Hólssandsveg sem
liggur meðfram Jökulsá á Fjöllum. Sigurður Karl sá áfram um leiðsögn. Ekið var
framhjá Dettifossi og Ásbyrgi. Beygt var inn á þjóðveg og ekið í norðurátt framhjá
afleggjara Hafrafellstungu. Þá var beygt til hægri upp afleggjara að Sandfellshaga og
áfram slóða upp á Öxarfjarðarheiði. Staðnæmst var við Vörðuhól og skyggnst yfir.
Framundan var m.a. Þverárhyrna. Síðan var ekið áfram. Ekið var fram hjá
Urðarbrúnum. Sýn opnaðist til suðurs og austurs. Búrfell sást vel og útsýni var gott.
Framundan voru Svalbarðsnúpar, Stóra Mosfell, Syðri-Hágangur og fleiri fjöll. Björn
Víkingur og Karl Sigurður sáu sameiginlega um leiðsögn. Bifreiðin var stöðvuð við
Brúnirnar og myndir teknar. Að svo búnu var ekið til baka niður á þjóðveg. Þar skildu
leiðir og heimamenn hættu þátttöku í vettvangsferð. Loks var ekið sem leið lá á
Raufarhöfn og komið þangað síðla kvölds.
4.4. Skýrslutökur
Við aðalmeðferð málsins gáfu eftirtaldir skýrslur og svöruðu spurningum
óbyggðanefndar og lögmanna: 1. Bragi Benediktsson, frá Grímsstöðum og býr í
Grímstungu II; 2. Gunnlaugur Ólafsson, Hallgilsstöðum II; 3. Karl Sigurður
Björnsson, Hafrafellstungu; 4. Björn Víkingur Björnsson, Sandfellshaga II; 5. Kristján
Benediktsson, Þverá.
Að einstökum efnisatriðum í skýrslum aðila er vikið í úrskurði þessum, eftir
því sem tilefni er til, en uppskriftir á þeim eru meðal gagna málsins.
13