Mál nr. 5/2005 - Óbyggðanefnd

4.3. Vettvangsferð
Haldið var af stað í vettvangsferð frá Hótel Reynihlíð að morgni mánudagsins 3. júlí
2006. Veður var bjart og skyggni gott. Mættir voru lögmenn málsaðila auk
óbyggðanefndar og starfsmanna nefndarinnar. Þá var með í för Hjörleifur
Guttormsson náttúrufræðingur.
Ekið var sem leið lá í átt að Grímsstöðum á Fjöllum þar sem fyrirhugað var að
hitta fyrir staðkunnuga heimamenn. Hjörleifur Guttormsson sá um leiðsögn á leið yfir
Námaskarð inn að Hólsfjöllum. Við Grímsstaði á Fjöllum var staðnæmst og upp í
bifreiðina stigu Karl Sigurður Björnsson, Hafrafellstungu, Gunnlaugur Ólafsson,
Víðirhóli, Björn Víkingur Björnsson, Sandfellshaga og Bragi Benediktsson,
Grímsstöðum. Einnig var með í för á jeppabifreið Kjartan Einarsson, Víðirhóli. Þá var
ekið sem leið lá austur fjallaslóða í átt að Haugsöræfum. Þeir Hjörleifur Guttormsson
og Bragi Benediktsson sáu sameiginlega um leiðsögn. Framundan sá í
Grímsstaðakarl, Grímsstaðakerlingu og Dimmafjallgarð. Ekið var yfir læk er nefnist
Syðri-Vatnsleysa. Staðnæmst var við Hrafnakletta (pkt. 5 og pkt. 9) og skyggnst yfir.
Bragi Benediktsson lýsti því sem fyrir augu bar. Framundan var Víðirhólsfjallgarður
og Dauðagil. Haldið var af stað á ný og ekið eftir slóða sem lagður var við gerð
símastrengsins. Ekið var yfir Ytri-Vatnsleysu sem rennur úr Krummagili. Þá var ekið
áfram fyrir Hólskerlingu og upp Vestari-Haugsbrekku fram hjá sæluhúsi símans sem
að sögn heimamanna var endurbyggt fyrir fimm árum. Opnaðist nú sýn yfir stórt
svæði. Staðnæmst var upp á Haugsöldu í 700 m hæð, skyggnst yfir og myndir teknar.
Framundan mátti sjá Mælifell, Kistufell, Sandhólahnjúka, Hágangana, Einbúa,
Hrútafell og rætur Heljardalsfjalla. Þá var haldið til baka sömu leið niður Vestari-
Haugsbrekku.
Staðnæmst var á skjólgóðum stað skammt frá Kaffileysu. Að því loknu var
haldið af stað á ný og ferðinni heitið norður að Langamúla sem er sameiginlegur
punktur í kröfulýsingum aðila. Ekið var meðfram Fjallgarðsá í 490 m hæð samkvæmt
GPS mælingu. Framundan sást vel í Bungu (967 m), hæsta fjall Norður-
Þingeyjarsýslu. Hjörleifur lýsti gróðri og gróðurtegundum í sandinum og upp á
fjöllunum. Þá var ekið upp með Fagradalsárgili. Vegna bilunar í bifreið var staðnæmst
stutt frá slóða við landgræðslugirðingu. Lögmenn, nefndarmenn og aðrir voru
selfluttir í bíl Braga meðfram landgræðslugirðingu upp á Langamúla. Fram kom að
Langimúli væri rangt staðsettur í kortagrunni Landmælinga Íslands. Vel sást yfir land
Hafrafellstungu. Eftir stutt hlé var haldið áfram og var nú ekið í gegnum hlið á
landgræðslugirðingu og áfram norður í átt að Þórfelli. Mórilludalur og Búrfellið
blöstu hér við. Karl Sigurður greindi frá því að Búrfellsheiði næði alveg suður í
Hólsmynnið og norður undir Súlnafjöll. Næst var staðnæmst upp á Þórfelli þar sem
vel sást yfir Hvannstaðafjallgarð, Svalbarðsnúpa, Litla-Mosfell, Stóra-Mosfell og
fleiri fjöll.
12