Rishikimi i Menaxhimit të Burimeve Njerëzore - Ministria e ...

6.2 – Këshilli i Pavarur Mbikëqyrës i Kosovës:
Këshilli i Pavarur Mbikëqyrës i Kosovës (KPMK) është krijuar si organ për zgjidhjen e kontesteve dhe
shërben si organ suprem administrativ për gjykimin e të gjitha masave disiplinore dhe ankesave të
tjera lidhur me të drejtat e nëpunësve civilë. Të gjitha vendimet e KPMK-së mund të apelohen në
Gjykatën Supreme.
Përveç këtij funksioni të zgjidhjes së kontestit, KPMK ka dy funksione të tjera: një që ka të bëjë me
pjesëmarrjen në procesin e rekrutimit për të gjitha pozitat e drejtorit në institucione; dhe tjetri ka të
bëjë me mbikëqyrjen e zbatimit të legjislacionit të shërbimit civil në institucione.
Funksionet dhe organizimi i KPMK është përcaktuar me Rregulloren e UNMIK-ut nr. 2001/36 “Mbi
Shërbimin Civil”, më vonë e plotësuar me Rregulloren Nr. 2008/12. KPMK ka mandat kushtetues të
përshkruar në nenin 101 të Kushtetutës së re.
Që nga krijimi i tij, KPMK është menduar që të jetë një institucion i pavarur në kuadër të fushës
ekzekutive. Ka qënë vendosur në MSHP dhe ka pasur pavarësinë në funksionim dhe vendimmarrje.
Aktualisht, me rregulloren e re KPMK është transferuar në kuadër të Kuvendit.
KPMK ka 7 anëtarë të emëruar nga Kuvendi. Bordi ndihmohet nga një sekretariat, i cili ka aktualisht 8
nëpunës. Sekretariati ka pas qënë në varësi të MSHP dhe KPMK ka psur kompetenca të kufizuara në
menaxhimin e stafit në aspektin e rekrutimit, vlerësimit të performancës dhe masave disiplinore. Kjo
ka krijuar probleme të brendshme sa i përket menaxhimit të stafit dhe koordinimit të punës në kuadër
të KPMK dhe të sekretariatit. Me transferimin në Kuvend, situata nuk është e qartë sa duhet dhe
paqartësitë lidhur me stafin e sekretariatit vazhdojnë të jenë të pranishme.
Duke analizuar kompetencat e KPMK ne kemi vërejtur se e drejta për të mbikëqyr rekrutimin e
drejtorëve në të gjitha institucionet nuk është një atribut i qëlluar për këtë lloj institucioni, që në teori
nuk ka kompetenca për menaxhim, por kryesisht shërben si organ për zgjidhjen e konflikteve dhe
vendos për ankesat e nëpunësve civilë. Gjithashtu, dispozita që përcakton se tre anëtarë duhet të
marrin pjesë në procedurën e rekrutimit, është tej mase konsumuese e burimeve, për shkak se
anëtarët e bordit më së shumti duhet të marrin pjesë ne procedurat e rekrutimit. Gjatë vitit 2007
KPMK ka monitoruar përzgjedhjen e 134 drejtorëve në institucione të ndryshme. KPMK, gjithashtu,
konsideron këtë aktivitet si konsumues i kohës dhe disi dyfishim, për shkak se KPMK do të jetë
përgjegjës për shqyrtimin e rastit në rast se ligji nuk është respektuar dhe është dorëzuar ankesa në
KPMK.
Pas shqyrtimit të kësaj gjendjeje, ne rekomandojmë që KPMK të koncentrohet në fushën e
“ankesave” dhe të shmangë kompetencat e pastra “menaxheriale”. Në rast se regjistrohet
shkelja e ligjit, KPMK mund të ndërhyjë me ekzaminimin e rastit duke shqyrtuar ankesën e dorëzuar
nga pala e interesuar.
Edhe një çështje tjetër lidhur me organizimin e ri dhe marrëdhëniet e raportimit ka të bëjë me raportin
e Kuvendit dhe më vonë dorëzimin e raportit tek Kryeministri nga ana e Kuvendit. Ne nuk jemi shumë
të bindur lidhur me efikasitetin e kësaj zgjidhjeje dhe e konsiderojmë atë vetëm si një shtresë të re
burokratike. Kryetari i Kuvendit ose një komision parlamentar nuk mund të përcjellë në baza ditore
aktivitetin e KPMK dhe nuk mund të ushtrojë presionin përkatës te Kryeministri dhe qeveria për rastet
individuale. Ndryshe qëndron situata sa i përket raportimit vjetor dhe përgjithësimin e rasteve kur
Kuvendi mund të ushtrojë presion mbi Qeverinë kundrejt respektimit të kornizës ligjore dhe parimeve
të përgjithshme.
Në vendet e rajonit ekzistojnë zgjidhje të ndryshme lidhur me vendosjen e këtij institucioni në kuadër
të qeverisë ose në kuadër të parlamentit. Gjithashtu, rezultatet dhe opinionet për çdo zgjidhje
ndryshojnë, nga vendi në vend dhe nga rasti në rast.
Ashtu siç mund të vërehet nga shembujt e ofruar, në shumicën e vendeve organi për ankesa i
raporton qeverisë ose ka lidhje të ngushtë me qeverinë. Kjo është për shkak të faktit se qeveria është
përgjegjëse për menaxhimin e shërbimit civil në përgjithësi dhe gjithashtu si përgjegjësi politike
kundrejt publikut dhe parlamentit.
39