Java e Shkencës 2012 - Universiteti i Prishtinës

KONFERENCA VJETORE E SHKENCËS ‘JAVA E SHKENCËS 2012
Msc. Ledia KASHAHU 1 , MARRËDHËNIA PRIND-MËSUES, PARAGJYKIMET DY
PALËSHE DHE ARRITJET AKADEMIKE TË ADOLESHENTËVE.
1
Universiteti “A. Moisiu” Durrës,
Fakulteti i Edukimit Departamenti i Pedagogjisë
Abstrakt
Qëllimi i studimit ishte të përcaktonte nivelin e marrëdhënieve mësues- prindër sipas
perceptimit të prindërve dhe mësuesve, dhe se si ky nivel bashkëpunimi lidhet me rezultatet e
nxënësve të klasave të 9 ta të shkollave 9-vjeçare të qytetit të Tiranës, si dhe eksploronte paragjykimet
midis palëve. Për nevojat e këtij studimi u aplikuan dy pyetësor si dhe u mbajt evidence rigoroze për
notat e fituara për çdo nxënës (N= 714) përgjatë vitit akademik 2010-2011. Njëkohësisht u realizuan
intervista gjysmë të strukturuara me prindër dhe fokus grupe me mësues.
Mësuesit paragjykojnë rezultatet e nxënësve duke gjykuar se faktorët demografikë ndikojnë
në to. Ka lidhje të rëndësishme midis notave të fituara nga nxënësit dhe bashkëpunimit dhe
komunikimit të mësuesve me prindërit, gjinisë, nivelit të shkollimit të prindërve si dhe nivelit të të
ardhurave mujore, por nuk ka lidhje midis gjendjes familjare të prindërve, apo dendësia e banesës.
Fjalët Kyçe: marrëdhënia prind-mësues, marrëdhënia mësues prind, statusi social ekonomik, arritjet
akademike.
Hyrje
Me ndryshimet e vrullshme që po pëson shoqëria jonë, arritjet akademike fëmijëve marrin
një rëndësi gjithmonë edhe më të madhe. Çdo ditë shikojmë prindër, të cilët shqetësimin kryesor të
jetës së tyre kanë arritjet akademike të fëmijëve në shkollë. Kjo për faktin e thjeshtë se pa qenë i
arsimuar si duhet është e pamundur të gjesh vendin tënd në shoqëri dhe të krijosh një jetë të
suksesshme ekonomike për veten dhe familjen si dhe të jesh një qytetar i denjë.
Arritjet akademike konsiderohet nga studiuesit si një nga synimet kryesore për moshën
shkollore (García Coll & Szalacha, 2004). Në bazë të teorive bashkëkohore, zhvillimi i fëmijës dhe
përparimi i tij në shkollë lidhet me disa faktorë si; cilësitë e personalitetit te fëmijës, ndërveprimi i
fëmijës me ambientit familjar, dhe bashkëpunimi i familjes me shkollën (Bronfenbrenner, 1998.
Cicchetti & Toth, 2000).
Epstein dhe kolegët e saj identifikojnë gjashtë aspektet e përfshirjes prindërore të cilat
ndikojnë në arritjet akademike të fëmijëve: Aftësitë dhe shprehitë e prindërve; Komunikimi;
Vullnetarizmi; Mësimi në shtëpi; Marrja e vendimeve në shkollë; Bashkëpunimi me agjencitë e
komunitetit ( Epstein, 1997) et al. Tipologjia e Epsteinit ka qenë dhe korniza teorike shume studimeve
të dy dekadave të fundit. Shpesh komunikimi shkollë familje- është etiketuar si përfshirje prindërore,
por në të vërtetë ai është informacion për prindin, si dhe një formë marrëdhënie midis palëve, ku si
prindërit edhe mësuesit si specialistë duhet jo vetëm të japin por edhe të marrin informacion dhe të
shkëmbejnë ide (Epstein, 1986).
Rëndësia e marrëdhënieve në mes të prindit dhe shkollës për arritjet akademike të fëmijës
është tashmë e konsoliduar (Fan & Chen, 2001; Jeynes, 2003, 2007). Kërkimet tregojnë se një
marrëdhënie e mirë mësues-prind përmirëson të nxënit, zhvillimin, arritjet e nxënësve dhe suksesin në
shkollë dhe në jetën e mëvonshme. (Allen, 2007; Blankstein,2010; Epstein et al., 2008; Sanders,
2006).
~ 569 ~