Java e Shkencës 2012 - Universiteti i Prishtinës

KONFERENCA VJETORE E SHKENCËS ‘JAVA E SHKENCËS 2012
Dr.Sc. Mazllom KUMNOVA, Dr.sc.Kastriot BUZA: SFIDAT E VLERËSIMIT NË
MËSIMDHËNIEN E FAKULTETIT TË EDUKIMIT
Abstrakt
Reforma e arsimit të lartë në Evropë e njohur si procesi i Bolonjes ka pasur reflektim të fuqishëm në
shumë shtete. Kështu, edhe arsimi i lartë në Kosovë ka aderuar në këtë proces duke bërë përpjekje që
të jetë pjesë aktive e hapësirës evropiane të arsimit të lartë. Një nga aspektet e kësaj veprimtarie, që
edhe sot e kësaj dite është një sfidë e arsimit të lartë në Kosovë është rritja e cilësisë duke e
harmonizuar atë me standardet e cilësisë evropiane, në kompleksitetin e së cilës është edhe vlerësimi i
studentëve gjatë studimeve. Në këtë kontekst, arsimi i lartë është duke kaluar në periudhën e
shkëputjes nga vlerësimi tradicional i studentëve dhe në periudhën e vendosjes së kritereve të
avancuara për të vlerësuar, për të matur arritshmërinë e studentëve gjatë studimeve. Krahas
respektimit të veçantive të Fakultetit të Edukimit, kërkohet hartimi i Rregullores për vlerësimin e
studentëve, avancimi i procedimeve dhe përcaktimeve në vlerësimin e studentëve, tejkalimi i
mënyrave tradicionale në vlerësim dhe avancimi i mësimdhënësve përmes seminareve,
projekteve,diskutimeve dhe vjeljes së përvojave të përparuara nga hapësira evropiane e arsimit të
lartë.
Fjalë çelës: arsimi i lartë, vlerësimi, mësimdhënia, kriteret, metodat etj.
Përpjekjet intensive për reforma në arsimin e lartë, në fazën e tranzicionit që po kalon i tërë sistemi i
arsimit në Kosovë, kanë imponuar përzgjedhjen e modaliteteve të veprimeve bashkëkohore edhe në
fushën e mësimdhënies. Në arsimin e lartë, në vitet e fundit, angazhimet janë drejtuar te përmbushja e
kërkesave të Bolonjes. Këto kërkesa, padyshim, janë përballur që në fillim me një platformë të
paqëndrueshme teorike. Së pari, duhet nisur nga specifikat që kanë kushtëzuar këtë fazë të cilën jemi
duke e kaluar, mungesa e mbështetjes së domosdoshme financiare për të siguruar një infrastrukturë
elementare që nga objektet deri te infrastruktura digjitale. Po të nisemi nga një qasje multidisiplinare e
vlerësimit të gjendjes së tanishme, vlerësime të cilat na mungojnë, me siguri do të arrijmë në
konstatimin se përpara na mbetet një rrugë shumë e vështirë e përballur me kërkesa të ndryshme.
Në aspektin e aftësimit të mësimdhënësve për procesin e arsimit të lartë deri më tani janë organizuar
forma të ndryshme të aftësimit, si: seminare, vizita në universitete të jashtme, konferenca etj. të
mbështetura edhe nga asociacione dhe fondacione të ndryshme ndërkombëtare. Mirëpo, gjithnjë
mbetet çështje e diskutueshme se sa kanë reflektuar këto forma të aftësimit te mësimdhënësit e tjerë,
të cilët nuk kanë pasur mundësi të ndjekin këto forma aftësimi ose te një kategori tjetër e tyre që i
kanë mospërfillur për shkaqe të ndryshme.
Tradicionalisht janë bërë përpjekje që mësimdhënësit në arsimin e lartë t’i ofrohen mundësi më të
mëdha të komunikimit me studentë në aspektin e fleksibilitetit të hapësirës dhe kohës, qoftë punën në
grupe ose individuale. Padyshim, mësimdhënia duhet të mbështetet nga teknologjia, nga shfrytëzimi i
përmbajtjeve interaktive për arritjen e një cilësie dhe aktiviteti më të lartë. Zbatimi i e-learning në
~ 551 ~