Java e Shkencës 2012 - Universiteti i Prishtinës

KONFERENCA VJETORE E SHKENCËS ‘JAVA E SHKENCËS 2012
Nazmi XHOMARA (PhD Student): KUALIFIKIMI PROFESIONAL I MËSUESVE NË PUNË
Specialist Edukimi- Instituti i Zhvillimit të Arsimit & Pedagog i Jashtëm-
Universiteti i Tiranës Fakulteti i Shkencave Sociale
Abstrakt
Studimi paraqet një analizë deskriptive të arritjeve të mësuesve në Kualifikimin Profesional
2011. Metodat e studimit përfshijnë analizën e vlerësimit të arritjeve të mësuesve në kualifikimin
2011, sikurse analizën e elementeve strukturorë të kualifikimit. Rezultatet e të dhënave të analizuara
tregojnë që arritjet e mësuesve në kualifikimin 2011 janë më të larta se ato të kualifikimit 2010 në dy
ekstremet e arritjeve. Për më tepër në kualifikimin 2011 janë bërë disa ndryshime strukturore
krahasuar me strukturën e kualifikimit 2010.
1. Struktura e Kualifikimit të Mësuesve
Që prej vitit 2007 kualifikimi profesional i mësuesve, po zhvillohet sipas një skeme ku
ndërthuren elementë strukturorë dhe përmbajtësorë, si edhe institucione në nivel qendror dhe lokal.
Nëse në strukturën e vjetër të kualifikimit, që nga procesi i aplikimit e deri në marrjen e çertifikatës
përkatëse gjithçka mbyllej brenda nivelit të (DAR/ZA) Drejtoria Arsimore Rajonale/Zyra Arsimore,
në strukturën ekzistuese procesi nis pranë DAR/ZA-ve dhe përfundon në nivelin qendror duke
nënkuptuar (MASH) Ministria e Arsimit dhe Shkencës dhe (IZHA) Instituti i Zhvillimit të Arsimit.
Gjithashtu nëse në strukturën e vjetër mësuesit kandidatë i nështroheshin një provimi me gojë përpara
një komisioni në nivel DAR; në strukturën ekzistuese ata duhet të hartojnë produkte profesionale
individuale për të cilat vlerësohen në nivel DAR/ZA, si edhe i nënshtrohen një testimi kombëtar të
standartizuar.
Produktet profesionale individuale, të njohura si Portofoli i Mësuesit, të cilat vlerësohen nga
komisione të ngritura në nivel DAR/ZA janë: (1) Plan mësimor vjetor; (2) Plan mësimor ditor; (3)
Test kapitulli lëndor; (4) Projekt kurrikular; (5) Objektiva të arritjeve në një kapitull lëndor.
Secili prej elementeve të portofolit profesional të mësuesit vlerësohet me nga 3 pikë, duke
nënkuptuar që në nivel DAR/ZA kandidati siguron një total prej 15 pikësh, që i korespondon
gjithashtu 15% të vlerësimit përfundimtar. Elementi i dytë më i rëndësishëm për nga pesha që zë është
testi, i cili përbëhet nga këta elementë : (1) Dokumentacioni shkollor; (2) Programi lëndor; (3) Aftësi
metodologjike; (4) Aftësi shkencore (Rregullore e MASH, 2011).
Vlerësimi i secilit prej këtyre elementeve në kualifikimin 2011 është përkatësisht: 4, 8, 12, 13
dhe 45 pikë. Testi në vlerësimin përfundimtar zë 70%. Elementi i tretë i formatit të vlerësimit të
mësuesve janë Bonuset, të cilët zënë secili nga 5 pikë duke prodhuar një total prej 15 pikësh, ose 15%
në vlerësimin përfundimtar të kandidatit. Bonuset, përbëhen nga tre elemente : (1) Grada master ose
doktoraturë (Ma, Dr); (2) Çertifikatë e gjuhës së huaj; (3) Çertifikatë (TIK) Teknologji e
Informacionit dhe Komunikimit.
Nivelet e vlerësimit të mësuesve në procesin e kualifikimit sipas skemës aktuale janë : A-
Shkëlqyeshëm; B- Shumë Mirë; C- Mirë; D- Mjaftueshëm; E- Dobët
Pas fitimit të njërit prej katër niveleve të para të vlerësimit, mësuesit përfitojnë rritje page
përkatësisht: kategoria e III, që nënkupton mësuesit që kanë 5 vite eksperiencë profesionale 5%,
kategoria e II, që nënkupton mësuesit që kanë 10 vite eksperiencë profesionale 10%, kategoria e I, që
nënkupton mësuesit që kanë 20 vite eksperiencë profesionale 20%.
~ 525 ~