klikoni këtu.

4
MBUMK - QTTB Vlorë
HYRJE
Shqipëria klasifikohet si një ndër vendet e rëndësishme të kultivimit të ullirit, për
faktin se ajo shtrihet në brezin mesdhetar, me kushte klimatiko-tokësore shumë të
përshtatshme për këtë kulturë. Kultivimi i ullirit ka një shtrirje gjeografike kryesisht
në pjesën perëndimore, përgjatë gjithë bregdetit të Jonit e Adriatikut, dhe ngjitet në
terrene kodrinore në thellësi në drejtim të pjesës qëndrore duke u përhapur në nëntë
qarqe dhe në disa komuna dhe fshatra të vendit.
Prej vitesh ullishtaria është konsideruar si një sektor bazë i bujqësisë shqiptare dhe
si i tillë, në këto vitet e fundit investimet në këtë sektor, në shtimin e sipërfaqeve të
mbjella dhe industrinë përpunuese, kanë ardhur duke u rritur.
Megjithatë ky sektor vazhdon të ballafaqohet me probleme sa i përket ritmeve të
zhvillimit dhe aktualisht është akoma larg potencialeve që ofron klima, toka dhe
kërkesat e tregut të brendshëm dhe atij të huaj. Krahasuar me vendet e tjera të
Mesdheut Shqipëria vazhdon të ketë numrin më të vogël të ullinjve për frymë të
popullsisë si dhe normën më të ulët të konsumit të vajit në rajon.
Në këto kushte qeveria shqiptare ka ndërmarrë iniciativën për një transformim tërësor
të këtij sektori me objektiv rritjen me 4-5 herë të numrit të rrënjëve, futjen e teknologjive
moderne në kultivim, rritjen e ndjeshme të prodhimit të ullirit për konsum dhe për vaj si
dhe shtimin e të ardhurave për fermerët që merren me kultivimin e ullirit.
Në këtë kuadër MBUMK ndërmori kryerjen e këtij studimi të plotë për ullishtarinë i
cili synon të japë një panoramë të plotë të gjendjes aktuale në këtë sektor si dhe
perspektivën e zhvillimit të tij në dhjetëvjeçarin e ardhshëm.
Studimi i paraqitur jep në mënyrë të detajuar sipërfaqet ekzistuese të ullishtave në
çdo rajon, komune dhe fshat të vendit si dhe përcakton ndërhyrjet që do të bëhen për
riaftësimin e tyre. Në studim përcaktohen sipërfaqet e reja që do të mbillen të ndara në
disa kategori si ato superintensive, intensive dhe tradicionale.
Në këtë studim paraqitet shumë qartë situata e fidanishteve në vend dhe nevojat për
prodhimin e fidanëve të certifikuar me qëllim plotësimin e nevojave për mbjelljet e reja
duke u përqëndruar kryesisht në llojet autoktone. Në këtë kontekst studimi përcakton
edhe strukturën e kultivarëve të ullirit dhe rajonizimin e tyre në shkallë vendi
Në pjesën e fundit studimi shoqërohet me një program ekonomiko-financiar duke bërë
një analizë të hollësishme të kostove për të gjithë komponentët e programit siç janë:
rehabilitimet në sipërfaqet ekzistuese, mbjelljet e reja, sistemi i rrugëve, infrastruktura e
ujitjes, mekanizimi i ullishtave si dhe kostot për ndërhyrjet në industrinë përpunuese.
Studimi është drejtuar nga Qëndra e Transferimit të Teknologjive Bujqësore Vlorë dhe
në kryerjen e tij janë angazhuar një numër shumë i madh specialistësh nga i gjithë
sistemi i bujqësisë në vend , nga Universiteti Bujqësor i Tiranës si dhe ekspert të huaj
të cilët kanë kontribuar ndjeshëm me punën dhe mendimin shkencor të tyre, mjaft të
kualifikuar, gjë për të cilën meritojnë të falënderohen.
Ministria e Bujqësisë, Ushqimit dhe Mbrojtjes së Konsumatorit