BOKAMOSO JA ITSHOLELO - Government of Botswana

mo go tlaa thusang go supa dikgomo tse di tsalegileng.
85. Thulaganyo ya go thusa barui ka ditlamelo ya Livestock Management
and Infrastructure Development (LIMID) go supega e atlegile fela thata.
Mo nakong eno dihutshane di le 32 572 le dikoko tsa Setswana di le 11
940 di setse di neetswe batho ba le 3064 fa esale kgwedi ya Lwetse 2010,
bontsi jwa bone e le banana ba ba dikobo dikhutshwane. Le fa go ntse
jalo, lenaneo leo le santse le na le dikgwetlho jaaka tlhaelo ya dihutshane
go rekela ba ba thusiwang le tlhaelo ya matlhabelo. Ka tsela e e ntseng
jalo, dipolasi tsa puso di tlaa dirisiwa go tsadisa le go phatlalatsa
dihutshane, fa matlhabelo a Jwaneng a tlaa tlhatlosiwa seemo.
86. Mhama wa tsa mashi le one o tsweletse ka go kopana le dikgwetlho
tse di jaaka ditlhwatlhwa tse di kwa godimo tsa didirisiwa, le tsamaiso e e
bokoa. Ke gone ka moo re santseng re reka 80 per cent ya mashi a re a
dirisang kwa ntle ga lefatshe leno. Jaanong mmuso o tsile ka thulaganyo
ya go tsosolosa mhama oo ka go dira thulaganyo e e lebaneng.
87. Ka kemonokeng ya thulaganyo ya ISPAAD, selekanyo se se neng sa
lengwa mo pakeng ya temo ya 2011/12 ke diekere di le 341 000, di
lengwa ke balemi ba le 105 000. Mo go tsone diekere tseo, go bonwe
thobo ya selekanyo sa ditone di le 42 500. Legale go santse go phuthwa
dikitsiso tsa thobo mo baleming mme go solofelwa gore dipalo tsa
selekanyo sa thobo di tlaa oketsega. Ka paka ya thobo ya ngwaga ono,
go ne ga dirisiwa P3.7million go reka thobo mo baleming go simologa
2009 go oketsa dijo tsa bana ba dikole tse dipotlana.
88. Mo dikopong di le 49 tsa masingwana a merogo tse di amogetseng ka
lenaneo la ISPAAD, di le 23 di ntse di dira sentle mme di ntsha merogo ya
selekanyo sa ditone tse 1027 mo diekereng tse di 109. Mo nakong eno,
go robilwe selekanyo sa ditone di le 15 900 fa tota re ne re ipeetse seelo
sa ditone tse 23200. Seemo sa loapi jaaka dipula tse di kwa tlase ebile di
na fale le fale go balelwa le mogote o o kwa godimo le tsamaiso e e bokoa
go koafaditse merogo. Le fa gone go na le dikgwetlho, go na le tokafalo ya
thobo mo masimong bogolo thata kwa Tuli Block.
89. Mmuso o tsweletse ka go laola diji jaaka thaga le ntsi e e senyang
maungo. Mo digongwaneng tse di neng di bonwe mo pakeng eno tsa
thaga di le 73, di le 60 di ne tsa laolwa. Go dirilwe thulaganyo ya go laola
go anama ga ntsi e e senyang maugo kwa Pandamatenga le Tuli Block.
Gape go na le kiletso ya go ntshiwa ga maungo mo kgaolong ya Chobe.
DITSWAMMUNG
90. Jaaka go setse go boletswe, kwelotlase ya itsholelo e tsweletse ka go
kokonela kgwebo ya ditswammung, tse e leng tsone konokono ya go dira