MATAUPU O SU'ESU'EGA

MATAUPU O SU'ESU'EGA
1. Salamō ma le Liuaga
2. Atoatoaga o le Amio
faaKerisiano
3. Papatisoga
4. Mulumuluga o Vae
5. O le Talisuaga a le Alii
6. O Aso Faavaloaga e 2,300
7. O le Falefetafa'i
8. O le Aso o le Togiola
9. Faaipoipoga – o se Sauniga
Fa’alelagi
10. O le Aiga Kerisiano
11. A'oa'oga Moni
12. O le Agaga o Valoaga
13. O Malo Tetele e Fa i le Valoaga
O Lesona Fa'aleTusi Paia o le
A'oga o le Sapati, o se suesuega
faapolokalame lea o aso taitasi, o loo
faavae atoa lava i le Tusi Paia ma le
Agaga o Valoaga e aunoa ma ni manatu
faaopoopo. O siitaga ua matuā faapupu'u
lava ina ia maua ai manatu manino ma le
tu'usa'o. O puipui [ ] o loo fa'aaogaina i
nisi o taimi ina ia mautinoa ai le manino,
o le mataupu o loo talanoaina, ma
faigofie ai ona faitau. O loo matuā
fautuaina lava le su'esu'eina atili o tusi o
loo aumaia ai a tatou su'esu'ega.
O Lesona Fa'aleTusi Paia o le
A'oga o le Sapati, (USPS 005-118), Vol.
85, No. 2, Aperila-Iuni, 2009. Saunia i
kuata taitasi e le Matagaluega a le A'oga
o le Sapati a le Fa'agaioiga Toe Fuata'i
Aso Fitu o le Toe Afio Mai. Aiā o
meatotino © 2009, lomia ma tufatufaina e
le Reformation Herald Publishing
Association, 5240 Hollins Road,
Roanoke, Virginia 24019 – 5048, USA.
• USA ma CANADA
Fesoota'iga: Telefoni 1-540-366-
9400 * Fax 1-540-366-2814* Upega o
Fa’amatalaga: www.sdarm.org * E-mail:
info@sdarm.org
• AUSETALIA
Fesoota'iga: Telefoni 61-2-9627-
7553 * Fax 61-2-9627-7554*
Upega o Fa'amatalaga:
www.sdarm.org.au *
E-mail: info@sdarm.org.au
• SAMOA
P O BOX 6458, APIA, SAMOA.*
Upega o Fa'amatalaga:www.sdarm.org

Upu Tomua
I lenei kuata atoa lava, o le a fa'aauau ai le su'esu'ega a le au su'esu'e uma lava o le A'oga o
le Sapati i faasologa o su'esu'ega ua fa'aigoaina O A'oa'oga nei Matou te Talitonu i Ai, auā
"e leai se mea tatou te matata'u ai mo le lumana'i, seivagana ua tatou faagaloina le ala na
ta'ita'ia mai ai i tatou e le Alii, ma Lana a'oa'oga i lo tatou talaaga i le taimi ua tuana'i"
(The General Conference Daily Bulletin, January 29, 1893).
O loo tele upu moni faavae e matuā tāua lava i lo tatou malamalamaaga e faatatau i
le tala lelei e faavavau a Iesu Keriso. O nei upu moni matagofie e tatau ona matuā
malamalama auiliili lava i ai ma manatunatu i ai, auā o se iloa papa'u e faatatau i nei upu
moni, o le a lē faamalieina ai le manaoga o le agaga. E tatau ona tatou fia aai ma fia inu
atu i le amiotonu, auā e na o le pau lava lea o le taimi e mafai ai ona tatou ma'o'ona ma
faamalieina i tatou. (Mataio 5:6).
"O loo i ai le ituaiga faatuatua o loo manatu māmā ai i lo tatou mauaina o le upu
moni; peitai o le faatuatua lea e talitonu moni ai lava i le Upu ua fetalaia mai e le Atua ma
e galue i le alofa ma faamamāina ai le loto, ua seāseā ona maua. O i latou uma lava o loo
ta'utinoina le upu moni, e lē o liua, e ui lava ina latou manatu ua latou liua. O nisi latou te
faauigaseseina lagona oso fesuisuia'i, manatu, ma mea latou te filifilia, poo ni filifiliga foi
latou te faia i o latou lava malosi, e avea ma liuaga. Peitai o le faatuatua o se tapulaa ola
lea. O lona auga o le upu moni lea – le upu moni faalelagi, tumau e faavavau, e lē masuia.
O le faatuatua moni, le faatuatua e lavea'iina ai e lē mafai ona vavaeeseina mai i le salamō
ma le liuaga, ma o le a ia fa'aalia foi fua o le Agaga. O le faatuatua lea, o se talitonuga
faifai pea lea ma le iloa lelei o Iesu. Na pau lava le faamoemoe o le tagata agasala, o loo i
totonu lea o le amiotonu a se Faaola na faasatauroina ma toe soifua mai. E lē mafai ona
tatou faalagolago i ni a tatou lava taumafaiga, peitai e tatau ona faia nei taumafaiga.
"Ua ia i tatou se feau sili ona taua, ma e lē na o faifeau ua tuuina mai i ai. O
tane/alii ma fafine/tamaitai o le a lē valaauina lava i le auaunaga, e mafai ona i ai se latou
vaega e faia i le lapata'iina o le lalolagi. E tatau ona latou faasusuluina atu lo latou
malamalama." – The Review and Herald, November 27, 1883.
O nei mataupu e matuā taua lava i lo latou faaolataga. O tapulaa o loo a'oa'oina i nei
mataupu o lesona faavae, e tatau ona aumaia manino lava i o tatou olaga i aso taitasi ma
aveina atu ai i tagata i soo se mea. O le taimi o loo totoe mo le toe afio mai o lo tatou
Matai e matuā pu'upu'u lava, peitai o loo i ai se lalolagi o loo ua i totonu o le pogisa
pouliuli lava ma le lē malamalama e faatatau i nei upu moni e lavea'iina ai. "Pe a sau le
Atalii o le tagata, o le a Ia maua ea le faatuatua i le lalolagi?" (Luka 18:8).
Ia fa'aauau ona avea nei lesona taua ma faamanuiaga taua lava ma se puna o le
malamalama ma le malosi i tagata faamaoni i le lalolagi atoa, o le tatalo finafinau lava lea
a le:
Matagaluega o le A'oga o le Sapati a le Koneferenisi Aoao

Lesona 1 Sapati, Aperila 4, 2009
SALAMŌ MA LE LIUAGA
Inā salamo ia outou, ma liliu i le Atua ina ia soloieseina ai a outou agasala, pe a o'o
mai taimi o le faafouga mai i luma o le Alii" (Galuega 3:19, NRSV).
"O le faatuatua moni, le faatuatua e lavea'iina ai, e lē mafai ona vavaeeseina mai i le
salamō ma le liuaga, ma o le a ia fa'aalia foi fua o le Agaga. O le faatuatua o se talitonuga
faifai pea lea, ma le iloa lelei, o Iesu. Na pau lava le faamoemoe o le tagata agasala o loo i
ai lea I le amiotonu a se Faaola na faasatauroina ma ua toe soifua mai." – The Review and
Herald, November 27, 1883.
Faitauga Fautuaina: Steps to Christ, pp. 12-26, 49-55.
Ulua'i Aso Mati 29
1. O LE TULAGA MONI LAVA FA'ALETAGATA
a. O faapefea ona faamatala e le Upu a le Atua le tulaga faaleagaga o se tagata e
lē'i liua? Efeso 2:1-3; Kolose 2:13.
________________________________________________________________________
87.
"O lo tatou natura ua vavaeeseina ai i tatou mai i le Atua." – The Faith I Live By, p.
b. O le a le tulaga o tagata uma lava? Roma 3:10-18.
________________________________________________________________________
"O le ola e aunoa ma alofa tunoa o le Agaga o le Atua o se tulaga e matuā
faanoanoa moni lava; peitai o se tulaga e sili atu lona leaga pe a faapena ona leai se olaga
faaleagaga ma aunoa foi ma Keriso, ma tatou taumafai ai e ta'uamiotonuina i tatou lava e
ala i lo tatou fai atu ia i latou o loo popole mo i tatou, tatou te lē manaomia o latou
popolega ma lo latou alofa. E matuā mata'utia lava le leaga o le malosi o le faaseseina e le
tagata o ia lava i le mafaufau faaletagata! Se tauaso ina matuā tele! I le faia o le
malamalama ma pouliuli ma le faia o le pouliuli ma malamalama!" – Testimonies, vol. 4,
p. 88.
"E tatau ona i ai so tatou malamalamaaga e faatatau ia i tatou lava, o se
malamalamaaga e i'u i le salamo moni, a'o le'i mafai ona tatou maua le faamagaloga ma le
filemu. E na o le tagata lava na te iloa o ia o le tagata agasala, o ia lena e mafai ona lavea'i
e Keriso. E tatau ona tatou iloa lo tatou tulaga moni, a leai, o le a tatou lē lagonaina lo
tatou manaomia o le fesoasoani a Keriso. E tatau ona tatou iloa lo tatou lamatiaga, a leai, o

le a tatou lē sulufa'i atu i le sulufa'iga. E tatau ona tatou lagonaina le tiga o ō tatou manu'a,
a leai, o le a tatou lē naunau mo le faamalologa." – The Signs of the Times, April 9, 1902.
Aso Gafua Mati 30
2. O LE MANAOGA O LE TAGATA AGASALA
a. O le a le upu moni e tatau ona teuina i le mafaufau, e pei ona faamauina i le
faataoto e faatatau i le Faresaio ma le telona? Luka 18:10-14; Salamo 51:17.
________________________________________________________________________
"Na alu atu le telona i le malumalu faatasi ma isi tagata tapua'i, peitai na vave lava
ona ia alu ese mai ia i latou ona o lona manatu e lē aoga o ia ona ia faatasi atu i le latou
tapua'iga. O lona tu mamao ese mai, na 'ia lē tepa a'e ai ona mata i luga i le lagi, peitai na
ia pōpō lona fatafata,' i lona tiga tele ma lona inoino o ia iā te ia lava. Na ia lagona na ia
agasala i le Atua, ma na ia agasala ma na faaleagaina o ia. Na te le'i manatu foi o le a alofa
mai se tasi ia te ia mai ia i latou sa siomia o ia, auā na latou va'ava'ai mai ia te ia ma le
inoino. Na ia iloa e leai sana amio lelei e ta'uleleia ai o ia i le Atua, ma o lona pagatia tele
na ia alaga atu ai, 'Le Atua e, ia ē alofa mai ia te a'u, o se tagata agasala' (Luka 18:13). Na
te le'i faatusalia o ia i isi tagata." – Christ's Object Lessons, p. 151.
"A iloa loa e le tagata agasala lona tulaga fa'afanoina, ma ua ia lagonaina lona
manaomia o se Faaola, e mafai ona ia sau ma le faatuatua ma le faamoemoe i 'le Tama'i
Mamoe a le Atua, na te aveesea le agasala a le lalolagi' (Ioane 1:29). O le a talia e Keriso
le tagata e sau ia te ia i le salamo moni." – This Day With God, p. 370.
b. Aisea tatou te mana'omia ai se malosi ei fafo atu o i tatou lava ina ia
fa'aamiotonuina ai i tatou i luma o le Atua? Isaia 64:6; Iopu 14:4.
________________________________________________________________________
"E matuā lē mafai lava mo i tatou, i lo tatou lava malosi, ona tatou sosola ese mai i
le lua o le agasala ua tatou pa'ū ifo i ai. O ō tatou loto e leaga, ma tatou te lē mafai ona
suia o tatou loto. 'O ai e mafai ona aumaia se mea mamā mai i se mea e lē mamā? E leai
ma se isi e to'atasi.' O le mafaufau faaletino o le feitaga'i lea ma le Atua: auā e lē usitai atu
i le tulafono a le Atua, e lē mafai foi ona mafai ona usitai i ai' (Iopu 14:4; Roma 8:7). O
a'oga, aganuu, o le fa'aaogaina o le malosi fai filifiliga o le loto, o taumafaiga faaletagata,
o mea uma lava nei e i ai o latou nofoaga fetaui, peitai o iinei e matuā leai ai lava se
malosi o nei mea uma. Atonu e maua mai i mea nei se amio sa'o i le vaaiga i fafo, peitai e
lē mafai e mea uma nei ona suia le loto; e lē mafai e mea nei ona fa'amamāina vaitafe o le
olaga. E tatau ona i ai se mana e galue mai i totonu, o se olaga fou mai i luga, a'o le'i mafai
ona suia tagata mai i le agasala i le faapaiaina. O lena malosi poo lena mana, o Keriso lea.
E na o Lona alofa tunoa lava e mafai ona fafaguina ai tomai mamate o le agaga, ma tosina
atu le agaga i le Atua, i le faapaiaina." – Steps to Christ, p. 18.

"O le faaolataga e mai ia Iesu Keriso, auā e na o Ia lava o la tatou amiotonu.
Maimau e pe ana faamuta le vaavaai ifo o tagata taitasi ia te ia lava mo le amiotonu. E
tatau ona tatou sailia i totonu ia Iesu Keriso mea uma lava tatou te manaomia, ma o lo
tatou galulue faatasi ma Ia, o le a tatou atoatoa ai i totonu ia te Ia." – Manuscript Releases,
vol. 10, p. 11.
Aso Lua Mati 31
3. FAANOANOA MO LE AGASALA
a. O le a le alaga a le tagata pe a ia iloa lona tulaga malaia? Roma 7:24; Salamo
51:1-3. O le a le mea e aofia i le salamo moni? 2 Korinito 7:10.
________________________________________________________________________
________________________________________________________________________
"O le salamo e aofia ai le faanoanoa mo le agasala ma se liliu ese mai i le agasala.
O le a tatou lē lafoaia le agasala seivagana ua tatou iloa lona leaga tele; seivagana ua tatou
liliu ese mai i le agasala i totonu o o tatou loto, o le a leai se suiga moni i le olaga." –
Steps to Christ, p. 23.
"O le salamō o le tasi lea o fua muamua lava o le alofa tunoa lavea'i. O le salamō e
aofia ai le faanoanoa mo le agasala, ma se liliu ese mai i le agasala. O le a tatou lē lafoaia
le agasala seiloga tatou te iloa lona leaga tele; seivagana ua tatou liliu ese mai i le agasala i
o tatou loto, o le a leai se suiga moni i le olaga. O le salamō e na o le pau lava lea o le
auala e lafoia mai ai e le olaga mamā o le lagi le faatusa o Keriso i Ona tagata ua toe
faatauina mai." – The Signs of the Times, June 28, 1905.
b. A tatou fa'aali loa a tatou agasala ma tatou liliu ese mai i le agasala, o le a le
mea e tatau ona tatou fa'atali atu i ai ma le mautinoa? 1 Ioane 1:9; Roma 10:9.
________________________________________________________________________
"O aiaiga o le mauaina o le alofa tunoa o le Atua e faigofie lava ma tonu ma fetaui.
E lē finagalo le Alii ia i tatou ina ia tatou faia ni mea faigata ina ia tatou maua ai le
faamagaloga o agasala. Tatou te lē manaomia lo tatou faia o faigamalaga uumi ma le
faigata poo le faia foi o faatinoga poo ni galuega tiga, ina ia ta'uleleia ai i tatou i le Atua o
le lagi poo le togiolaina ai foi o a tatou solitulafono; peitai o lē e fa'aali ma lafoa'i lana
agasala o le a alofagia o ia. O se folafolaga taua tele lenei, ua foa'iina mai i le tagata ua
pa'ū ina ia faalototeleina ai o ia ina ia talitonu i le Atua o le alofa ma saili mo le ola e
faavavau i Lona malo." – Testimonies, vol. 5, p. 635.
"Ua uma ona faia e Keriso auala uma mo i tatou ina ia tatou malolosi. Ua Ia foa'i
mai ia i tatou Lona Agaga Paia, o Lana galuega o le faamanatu mai lea ia i tatou o
folafolaga uma lava na faia e Keriso, ina ia tatou maua ai le filemu ma se lagona fiafia o le
faamagaloina. Afai o le a na o le tatou taula'i atu lava o o tatou mata i le Fa'aola ma tatou

talitonu i Lona mana, o le a faatumuina i tatou i se lagona o le saogalemu; auā o le
amiotonu a Keriso o le a avea lea ma a tatou amiotonu." – My Life Today, p. 45.
"Afai e te talitonu i le folafolaga – talitonu ua faamagaloina oe ma ua faamamāina –
e fa'ailoa mai e le Atua le mea moni; ua fa'aatoatoaina oe, e pei lava ona foa'i atu e Keriso
le malosi i le tagata pipili e savali ai ina ua talitonu le tagata ua faamaloloina o ia." – Steps
to Christ, p. 51.
Aso Lulu Aperila 1
4. LIUAGA
a. O le a le valaaulia alofa o loo aumaia i tagata ola uma lava o loo lagonaina lona
manaomia o le faaolataga? Isaia 1:18; 55:6, 7.
________________________________________________________________________
"I le faamasinoga i le lagi o loo tula'i ai lo tatou Faaola ma tuu mai i le lalolagi le
valaaulia alofa lava, O mai ia te A'u, o outou uma e vaivai, o outou uma e matitiva, outou
uma o fia aai; o mai ia te A'u, outou uma o mafatia i avega, ma avega mamafa, o outou
uma o mama'i o outou agaga i le agasala, o mai ia te A'u." – The Signs of the Times,
August 5, 1875.
"A lagona loa e le tagata agasala lona agasala, ua tosinaina foi o ia e le alofa ma le
faapaiaina o Keriso; auā o loo tosina atu o ia e Iesu ia te Ia lava. . . . O le salamo e fanau i
totonu o le loto e ala i le vaavaai i le alofa o Keriso, o Lē na foa'iina mai Lona soifua ina
ia lavea'i ai le tagata agasala. O le alofa o le Atua lea e fa’aagamalūina ai loto sili ona
ma'a'a." – The Review and Herald, September 3, 1901.
"O loo sauni Keriso e fa'asa'oloto i tatou mai i le agasala, peitai na te lē fa'amalosia
le filifiliga a le loto; ma afai o le fai fai pea o solitulafono ua matuā mausali ai lava le
naunau o le loto i le agasala, ma ua tatou lē naunau ai ina ia fa'asa'olotoina i tatou, afai
tatou te lē manana'o e taliaina lona alofa tunoa, o le a se isi mea e mafai ona Ia faia?" –
Steps to Christ, p. 34.
b. O le a le lamatiaga o loo i ai i le fa'atuaiina o lo tatou toe fo'i atu i le Alii?
Eperu 3:15; Amosa 8:11, 12; Luka 13:25-27.
________________________________________________________________________
"O le a ou lē tautala iinei i le pu'upu'u tele ma le lē mautinoa o le olaga; peitai o loo
i ai se lamatiaga matautia lava – o se lamatiaga e lē o malamalama atoatoa lelei i ai – i le
faatuai i le gaua'i atu i le siufofoga o le aioiga a le Agaga Paia o le Atua, i le filifili e ola i
totonu o le agasala; auā o tagata faapena, o lenei faatuai, o le mea moni lava lea e mafua
ai. O le agasala, tusa lava poo le a le manatu la'ititi i ai, e mafai ona tuinanau i ai ma fano
ai i le lē maua o le ola e faavavau. O mea tatou te lē manumalo i ai, o le a manumalo mai
ia i tatou ma galuea'iina ai loa lo tatou faaumatiaga." – Ibid., pp. 32, 33.

"Ua vaaia e se tane lona lamatiaga. Ua ia vaaia ma ia iloa na te manaomia se suiga o
lana amio, o se suiga i lona loto. Ua fafaguina o ia; ua tutupu a'e ona popolega. O loo
galue le Agaga o le Atua i totonu ia te ia, ma o le mata'u la ma le gatete ua ia galue ai mo
ia lava, ma saili ina 'ia ia iloa ona vaivaiga i lana amio ma 'ia ia iloa ai poo le a se mea e
mafai ona ia faia ina ia aumaia ai le suiga lea o loo manaomia i lona olaga. Ua
fa'amaulaloina lona loto. O lona fa'aalia o ana agasala ma lona salamo ua ia faailoa mai ai
le moni o lona naunautaiga ina ia toe fuata'i. Ua ia fa'aalia ana agasala i le Atua, ma afai
ua ia fa'amanu'alia se tasi, ua ia fa'aalia lona sese i lē ua ia fa'amanu'alia. A'o galue le
Atua, ua galuea'iina foi e le tagata agasala, i lalo o le a'afiaga o le Agaga Paia, le mea lea o
loo galuea'iina e le Atua i totonu o le mafaufau ma le loto. Na te gaioi faatasi ma le
galuega a le Agaga, ma o lona liuaga e moni lava." – The Review and Herald, July 7,
1904.
Aso Tofi Aperila 2
5. TOE FANAU
a. Toe fa'amatala mai le talanoaga a Iesu ma Nikotemo. Ioane 3:1-8. O le a le
i'uga o lena talanoaga?
________________________________________________________________________
"Na maua e Nikotemo le lesona, [e tatau ona ia vaai ma ola ai], ma 'ia tauaveina
faatasi ma ia. Na ia suesueina Tusi Paia i se ala fou, e lē mo le talanoaina o se manatu, a ia
maua ai le ola mo le agaga. Na ia amata ona ia vaai i le malo o le lagi a'o ia gaua'iina atu o
ia i le ta'ita'iga a le Agaga Paia." – The Desire of Ages, p. 175.
b. O le a le uiga moni o le "toe fanau" i le vai ma le Agaga? Ioane 1:12, 13; 2
Korinito 5:17; 2 Peteru 1:3, 4.
________________________________________________________________________
"O i latou e avea ma tagata fou i totonu ia Keriso Iesu o le a latou fua maia fua o le
Agaga, 'alofa, olioli, filemu, faapalepale onosai, agaalofa, agalelei, faatuatua, agamalu, fai
faatatau lelei' (Kalatia 5:22, 23). O le a latou lē toe faatusalia i latou e tusa ai ma o latou
tuinanauga tuai, peitai e ala i le faatuatua o le Alo o le Atua o le a latou mulimuli ai i Ona
tulaga aao, lafoia atu Lana amio, ma faamamāina i latou e faapei ona mamā o Ia. O mea sa
latou inoino i ai muamua o lenei ua latou fiafia i ai, ma o mea sa latou fiafia i ai muamua o
lenei ua latou inoino i ai. O i latou na faalialiavale faamaualuluga ua lotomaulalo ma
agamalu i o latou loto." – Steps to Christ, p. 58.
"O i latou e lagonaina le galuega o le liuaga moni lava i totonu o o latou loto o le a
latou fa'aalia foi fua o le Agaga i o latou loto. Oka, pe ana iloa e i latou o loo matuā laititi
lava lo latou olaga faaleagaga, o le ola e faavavau e na o i latou lava ua tofusia i le natura
faalelagi e mafai ona foa'i atu i ai le ola e faavavau ma latou sosola ese ai mai i le
amioleaga o loo i le lalolagi e ala i le tuinanau!" – Testimonies, vol. 9, p. 155.

Aso Faraile Aperila 3
FESILI TOE FAAMANATU
a. O le a'oa'oga o manatu faatuina o le tagata lea e faapea e na o le fausiaina a'e
lava o le "lelei" lea ei totonu ia i tatou, aisea e sese ai lenei manatu?
b. I le fa'ataoto, aisea na ta'uamiotonuina ai le telona ae lē o le Faresaio?
c. O a uiga o le salamo moni?
d. O le a lea suiga ua ta’ua o le liuaga moni?
e. O a suiga e mafai ona vaaia i totonu o i latou ua toe fanau?
Lesona 2 Sapati, Aperila 11, 2009
ATOAGA FA'ALEKERISIANO
"O lenei, ia atoatoa ona lelei o la outou amio, e pei o lo outou Tamā oi le lagi e
atoatoa ona lelei o Ia" (Mataio 5:48).
"E na o le atoatoa lava e mafai ona ia ausia le tapulaa a le lagi. E pei ona atoatoa
ona lelei o le Atua i Lona afioaga silisiliese, e faapena foi ona tatau ona atoatoa Lana
fanau i le lalolagi maulalo o loo latou nonofo ai." – The Spirit of Prophecy, vol. 2, p. 225.
Faitauga Fautuaina: The Sanctified Life, pp. 80-88.
Ulua'i Aso Aperila 5
1. NA FAIA E LE ATUA LE TAGATA E ATOATOA LONA LELEI
a. Ina ua faamuta e le Atua Lana galuega o le foafoaga e ala i Lona foafoaina o le
tagata i Lona lava faatusa, o le a le faasilasilaga na faailoa mai? Kenese 1:31;
Failauga 7:29.
________________________________________________________________________
"I le amataga, na foafoaina ai e le Atua le tagata i Lona lava faatusa. Na Ia foa'i atu
ia te ia uiga lelei. O lona mafaufau na matuā paleni lelei, ma o malosi uma lava o lona
tagata ola na matuā galulue paleni lelei . . . . O le toe aumaia o ia i le atoaga lea na ulua'i
foafoaina ai o ia, o le sini tele lea o le olaga – o le sini poo le autu lea o loo faavae ai isi
autu uma." – Christian Education, pp. 63, 64.
"Na faia e le Atua le tagata ia amiotonu; na Ia foa'i atu ia te ia uiga lelei o le amio,
faatasi ai ma le leai o sona fiafia i le agasala. Na ia foa'i atu ia te ia malosi maualuga lava

faalemafaufau, ma tuu atu i ona luma faatosinaga silisili ona malolosi e mafai ona Ia
tuuina atu ina 'ia ia faamaoni ai i lona usitai i lona Atua. O le usitai, atoatoa lava ma tumau
e faavavau, o le aiaiga lea o le fiafiaga e faavavau. O le aiaiga lenei na fuafuaina na te
maua ai le fa'atagaga i le laau o le ola." – Patriarchs and Prophets, p. 49.
b. E faapefea ona tatou iloa o Atamu na atoatoa ona lelei o ia i vaega uma lava o
le olaga, ma na foa'iina atu i ai le mafaufau poto sili lava ona maualuga? Kenese
2:19, 20; Salamo 8:4-6.
________________________________________________________________________
"No foa'i atu e le Atua i le tagata, le palealii lea o le foafoaga, le malosi e
malamalama ai i Ona manaoga, ina 'ia ia malamalama i le tonu ma le aoga o Lana
tulafono, ma Ona manaoga paia i luga ia te ia; ma na manaomia mai i le tagata le usitai
mausali lava." – Ibid., p. 52.
Aso Gafua Aperila 6
2. LEILOA LONA ATOATOA
a. O le a le mamao o le o ese o tagata i lo latou pa'ū maulalo ina o i ai lava le
lalolagi i lona ulua'i tulaga o le foafoaga? Kenese 6:5, 11, 12.
________________________________________________________________________
________________________________________________________________________
"Ina ua mavae le Pa'ū, na filifili loa tagata latou te mulimuli i o latou lava
faanaunauga agasala; ma o le i'uga la, o le solitulafono ma le malaia na faatupulaia
fa'ata'alise lava. E le'i amanaiaina le sootaga faalefaaipoipoga poo aiā foi o meatotino. Soo
se tasi lava na mana'o i avā poo mea totino a lē la te tuaoi, na ia aveina faamalosi, ma na
loto vi'i tagata i a latou agasala o le sauā. Na latou fiafia i le faaumatiaina o le ola o manu;
ma o le fa'aaogaina o aano o manu mo meaai, na sili atu ai ona faatupulaia lo latou sauā
ma lo latou naunau i le fa'amasa'aina o le toto, seia o'o ina latou matuā lē fa'atāuaina lava
le ola o le tagata.
"O le lalolagi sa i ai i lona tulaga fa'ato'a foafoaina; peita’i na matuā loloto lava ma
ta'atele le agasala o lea na lē mafai ai e le Atua ona toe onosa'ia le amioleaga a le lalolagi."
– Patriarchs and Prophets, p. 92.
"O tagata o le lalolagi a'o le'i o'o i le lolo sa latou lē fai faatatau lelei i le 'ai ma le
inu. Na latou manana'o i aano o manu, e ui lava ina e le'i foa'iina atu e le Atua i le tagata
se fa'atagaga na te aina meaai e faia i aano o manu. Na latou aai ma inu seia o'o ina lē iloa
ma se tapulaa e o latou tuinanauga fa'aleagaina o le 'ai, ma na matuā fa'aleagaina lava i
latou o lea na lē mafai ai ona toe onosai le Atua ia i latou. O le latou ipu o le amioleaga, ua
tumu, ma na Ia faamamāina ai le lalolagi mai i lona leaga faaleagaina i amiogaleaga e ala i
se lolo." – Counsels on Health, p. 109.

. O faapefea ona fa'amatalaina e le aposetolo o Paulo le faaleagaina o le aiga
tagata? Roma 1:21-32.
________________________________________________________________________
________________________________________________________________________
"O se tulafono o le mafaufau fa'aletagata lea e fa'apea, o lo tatou va'avaai tatou te
liua ai. O le a lē sili a'e le maualuga o le siitia a'e i luga o le tagata nai lo lona
malamalamaaga i le upu moni, olaga mamā, ma le faapaiaina. Afai e lē siitiaina a'e lava le
mafaufau i luga a'e o le tapulaa o le aiga tagata, afai e lē siitiaina a'e e ala i le faatuatua ina
ia malamalama i le poto ma le alofa fa'alelagi, o le a pa'ū loa le tagata aga'i i lalo ma sili
ifo ona maulalo. O i latou o loo tapua'i i atua sese na latou fa'aofuina o latou atua i uiga
ma lagona fa'aletagata, ma na faapena ona fa'aleagaina ai le tapulaa o a latou amio ua pei
o le tapula'a a le aiga tagata agasala. O le i'uga na i'u ina faaleagaina ai i latou . . . . Na
foa'i mai e le Atua i tagata Ana poloaiga e avea o se tulafono o le olaga, peitai na latou
solia Lana tulafono, ma o agasala uma lava na mafai ona manatu i ai, o le iuga lea na o'o i
ai. O le amioleaga a tagata na faia fa'aaliali ma le lē fefe, o le fa'amasinoga tonu na solia i
le efuefu, ma na o'o atu i le lagi le tagi a ē na fa'apuapuagatiaina." – Patriarchs and
Prophets, p. 91.
Aso Lua Aperila 7
3. O LE TOE FA'AFO'ISIA MAI O LE AIGA TAGATA
a. O le a le fuafuaga na fafauina i lotoā o le lagi mo le toe fa'afo'isia mai o le aiga
tagata? Iopu 33:24, 26-28; Mareko 10:45.
________________________________________________________________________
"Na matuā tumu lava le Atua i le alofa mo le aiga tagata, ma o le Tamā, le Alo, ma
le Agaga Paia na latou tuuina mai i Latou lava i le galuea'iina o le fuafuaga o le
faaolataga. O le auala la ina ia faataunuuina atoa ai lenei fuafuaga, na filifilia ai o Keriso,
le Alo e toatasi lava o le Atua na fanaua e Ia, o le a Ia foa'iina mai o Ia e Ia lava e avea ma
taulaga-ofofuaina mai mo le agasala." – Counsels on Health, p. 222.
"O le agasala a Atamu na pa'ū ai le aiga tagata i le malaia e leai se faamoemoe;
peitai o le maliu o le Alo o le Atua, na foa'iina mai ai se avanoa lona lua i le tagata. I le
fuafuaga o le faaolataga, ua faia ai se ala e sola ese mai ai, mo i latou uma lava o le a latou
fa'aaogaina lenei auala. Na silafia e le Atua na lē mafai e le tagata ona ia manumalo i lona
lava malosi, ma ua Ia faia ai le fesoasoani mo ia. E matuā tatau lava la ona tumu i tatou i
le faafetai ina ua avanoa mai se ala mo i tatou, e mafai ai ona tatou o atu i le Tamā; ma ua
matala mai faitotoa, ina ia susulu mai ai ave o le malamalama mai i le pupula i totonu, i
luga o i latou o le a taliaina nei ave o le malamalama!" – Christian Temperance and Bible
Hygiene, pp. 15, 16.

. E ui lava i le fuafuaga a Satani ina ia taofia fa'amalosia le aiga tagata i lona
tulaga pa'ū, na faapefea ona lavea'i Iesu mo lo tatou faaolataga? Ioane 10:27-29;
6:39, 40; Filipi 1:6.
________________________________________________________________________
"Talu mai lava le agasala a Atamu, na vavaeeseina mai ai le aiga tagata mai i lo
latou talanoa tu'usa'o ma le Atua; o le talanoaga i le va o le lagi ma le lalolagi na faia lava
e ala mai ia Keriso; a’o lenei ua afio mai Iesu 'i le tino agasala' (Roma 8:3), ua fetalai mai
ai le Tamā ia te Ia. Na ia talanoa muamua mai i le aiga tagata e ala mai ia Keriso; a'o lenei
ua Ia fetalai mai i le aiga tagata i totonu ia Keriso. Na faamoemoe Satani, o le inoino o le
Atua i le agasala o le a aumaia ai se tete'aga e faavavau i le va o le lagi ma le lalolagi.
Peitai na fa'aalia o le sootaga i le va o le Atua ma le tagata, ua toe fesootaia nei." – The
Desire of Ages, p. 116.
"Na tuuina e le Alo mai i le vavau o le Atua o Ia lava i le va o le tagata ma le Atua,
ina ia Ia tauaveina le fa'asalaga o le solitulafono, ina ia mafai ai ona maua e le tagata
solitulafono se isi ona faamasinoga, ma ia aumaia ai le tagata i le leleiga ma le Atua le
Tamā. O Lē na faaofuina i le tino tagata, ma sa tasi lava pea o Ia ma le Atua, o Ia lena na
fa'atauina ai i tatou. Na lūlū le lalolagi ma gatete i le vaaiga o le Alo pele o le Atua o
puapuagatia i le toasa o le Atua ona o le solitulafono a le tagata. Na fa'aofuina le lagi i
ofutalatala ina ia natia ai le vaaiga o le Atua puapuagatia." – Lift Him Up, p. 153.
Aso Lulu Aperila 8
4. O SE SINI AUTU LAVA
a. A tatou taliaina loa Keriso ma Lana upu moni, o a isi laasaga sili atu e tatau
ona la'asia ina ia mafai ai e i tatou ona tatou ausia le atoaga? Eperu 5:12-14; 6:1, 2; 2
Peteru 3:18.
________________________________________________________________________
________________________________________________________________________
"O le tatou galuega o lo tatou vilivilitai lea ina ia tatou ausia atu, i a tatou gaioiga, le
atoaga lea na ausia e Keriso i Lona soifua i luga o le fogaeleele i vaega uma lava o le
amio. O Ia o le tatou fa'ata'ita'iga. E tatau ona tatou taumafai i mea uma lava ina ia tatou
viia le Atua i a tatou amio. O lo tatou pa'u'ū i lea aso ma lea aso ma tatou lē ausia ai
tapula'a a le lagi, o loo tatou lamatia ai le faaolataga o o tatou agaga. Tatou te manaomia
ina ia tatou malamalama ma tatou fa'atauaina le avanoa taua lava ua foa'i mai e Keriso ia i
tatou, ma ia tatou faailoa lo tatou finafinau ina ia tatou ausia le tapulaa sili ona maualuga.
E tatau ona tatou fa'alagolago atoa lava i le mana ua Ia folafola mai Na te foa’i mai ia i
tatou." – Medical Ministry, p. 253.
"E faapei ona atoatoa ona lelei o le Atua i Lona afioaga maualuga o loo galue ai, e
mafai foi ona atoatoa ona lelei le tagata i lona tulaga faaletagata. O le tapulaa sili ona
maualuga o le amio faaKerisiano o le amio lea faapei o le amio a Keriso. Ua matala mai

nei i o tatou luma se ala o le aga'iga'i pea i luga. Ua ia i tatou se sini e tatau ona tatou
ausia, o se tapulaa e tatau ona tatou maua lea e aofia ai mea uma lava e lelei ma mamā ma
siitia. E tatau lava ona i ai le finafinau i taimi uma lava ma le aga'i i luga ma luma i taimi
uma lava agai atu i le atoaga o le amio." – In Heavenly Places, p. 141.
b. A afio mai Iesu, o le a Ia fa'aatoatoaina ea i tatou, pe o le a Ia maua mai ea i
tatou ua tatou atoatoa? 1 Korinito 1:8; 1 Tesalonia 5:23; Efeso 5:27; 2 Peteru 3:14.
________________________________________________________________________
"Pe a afio mai Keriso, o le a Ia lē suia amio a soo se tagata lava. O le taimi sili ona
taua o le nofo vaavaaia ua tuuina mai nei ina ia fa'aaoga ia faaleleia atili i le fufuluina o o
tatou ofu talaloa o a tatou amio ma ia faamamāina i le toto o le Tama'i Mamoe." –
Christian Education, p. 237.
"E lē mafai ona tatou fa'atagaina lo tatou lē maua o le ola e faavavau ona tatou te lē
o naunau tatou te vavae ese mai mai i le lalolagi. E tatau ona natia i tatou i totonu ia
Keriso. O lo tatou vaai e tatau ona faatumuina i se vaaiga o lona atoaga. E tatau ona tatou
tula'i atoa lava i le itu a le Alii, ma ia tatou manatua upu ia, 'O i matou o tagata faigaluega
faatasi ma le Atua' (1 Korinito 3:9). E naunau le Atua ia i tatou ina ia tatou a'o'oga i totonu
o le a'oga a Keriso ina ia tatou agamalu ma loto maulalo. E tatau ona fa'asatauroina e le
tagata ia lava, faatasi ai ma ona lagona ma ona tuinanauga. E leai lava se avanoa lona lua
mo le tagata pa'ū. O le lagi e lē o se nofoaga lea mo le manumaloina o amioga leaga i le
amio." – The Youth's Instructor, October 25, 1900.
Aso Tofi Aperila 9
5. UMA ONA FA'ATAUNUUINA LE FA'AATOATOAINA O LE AMIO
a. O le a le folafolaga matagofie lava ua foa'iina mai ia i latou o le a latou matuā
fa'aatoatoaina lava le fa'amamāina o o latou loto i le toto o le Tama'i Mamoe?
Mataio 5:8; Fa'aaliga 7:14, 15; 1 Ioane 3:2, 3.
________________________________________________________________________
"Na fa'ailoa mai e Iesu o tagata e mamā o latou loto o le a latou vaai i le Atua. O le
a latou iloa o Ia i foliga vaaia o Lona Alo, o Lē na auina mai i le lalolagi mo le faaolataga
o le aiga tagata. O o latou mafaufau, o le fa'amamāina ma le faatumuina i manatunatuga
mamā, o le a sili atu ai ona latou iloa le Atua foafoa i galuega a Lona aao mamana malosi,
i mea matagofie ma le mamalu mata'utia o loo tumu ai le vateatea." – The Spirit of
Prophecy, vol. 2, pp. 208, 209.
"O i latou e mamā o latou loto o loo latou ola e peisea'i o loo latou ola i luma o le
silafaga vaaia a le Atua i le taimi o loo Ia foa'i mai ia i latou i lenei lalolagi. Ma o le a
latou vaai foi ia te Ia fa'afesaga'i i le lumana'i, i le tino ola pea, e faapei ona faia e Atamu
a'o ia savali ma talanoa faatasi ma le Atua i totonu o Etena." – Thoughts From the Mount
of Blessings, p. 27.

. O le a le sini sili ona maualuga e tatau ona ausia e tagata uma lava o loo
finafinau mo le atoaga o le amio? 1 1 Peteru 1:9; 1 Tesalonia 5:9; Isaia 25:9.
________________________________________________________________________
"Afai tatou te manana'o i le ola e faavavau, e tatau ona tatou galulue faatasi ma le
Atua, ma faapena ona ausia ai le tapulaa a le Tusi Paia, ma liua atu ai a tatou amio i le
amio a lo tatou Alii o Iesu Keriso . . . . Ia matuā sili nei ona finafinau tagata taitasi uma
lava i nei itula sili ona taua o le alofa tunoa poo le nofo vaavaaia, ina ia fausia le amio
tonu lava lea Na te finagalo e fa'aatoatoaina pe a afio mai lo tatou Alii i le mana ma le
mamalu tele." – The Youth's Instructor, September 7, 1893.
Aso Faraile Aperila 10
FESILI TOE FAAMANATU
a. I le lotolotoi o meaola uma lava o loo i luga o le fogaeleele, o le a le tulaga o loo
ese mai ai le aiga tagata?
b. Aisea na aoga ai le Lolo ma le fa'aumatiaga o Sotoma?
c. O le a le faamoemoe e tasi lava mo lo tatou lalolagi pa'ū maulalo i le agasala?
d. Fa'amatala le loloto o le atoaga o le amio e tatau ona tatou ausia a'o le'i toe fo'i mai
Keriso – ma le mafuaaga e aoga ai lenei atoaga i le amio.
e. O le a le uiga o le mamā o le loto, i le uiga fa'atinoina?
Lesona 3 Sapati, Aperila 18, 2009
PAPATISOGA
"O atu ia outou i le lalolagi uma, ma tala'i atu le tala lelei i tagata uma. O lē e
talitonu ma papatisoina o le a fa'aolaina o ia; a'o lē e lē talitonu o le a fa'asalaina o
ia" (Mareko 16:15, 16).
"Ua faia e Keriso le papatisoga ma fa'ailoga o le ulufale atu i Lona malo
fa'aleagaga. Ua Ia faia lenei ma aiaiga mautinoa e tatau ona usitai i ai i latou uma lava o
loo manana'o ei lalo o le pule a le Tamā, le Alo, ma le Agaga Paia." – Testimonies, vol. 6,
p. 91.
Faitauga Fautuaina: The Desire of Ages, pp. 97-108, 167-177.

Ulua'i Aso Aperila 12
1. IOANE LE PAPATISO
a. O ai na muamua papatiso atu, o loo fa'amauina i totonu o le Feagaiga Fou, ma
o le a le autu o lana tala'iga? Mataio 3:1-6.
________________________________________________________________________
"Na laugaina e Ioane le afio mai o le Mesia, ma na ia valaau atu i tagata ina ia latou
salamo. I le avea ma fa'amamāaga mai i le agasala, na ia papatiso atu ia i latou i vai o
Ioritana. Na faapena ona ia faailoa atu e ala i se lesona autu taua lava, o i latou o loo fai
mai o i latou o tagata filifilia o le Atua na fa'aleagaina i latou i le agasala, ma a aunoa ma
le fa'amamāina o le loto ma le olaga e lē mafai ona i ai sa latou vaega i le malo o le
Mesia." – The Desire of Ages, p. 104.
b. Ina ua lolofi atu le au Faresaio ma le au Satukaio e to'atele i le vao ina ia
papatisoina, o le a le feau na tuu atu e Ioane ia i latou? Mataio 3:7-10.
________________________________________________________________________
"E le'i faatonu atu Ioane ia i latou na faalogo mai ia te ia ina ia lafoa'i o latou tiute
muamua. Na ia fai atu ia i latou ina ia aumai se faamaoniga o lo latou salamo e ala i lo
latou faamaoni i le Atua i tulaga na Ia valaauina ai i latou." – The Desire of Ages, p. 150.
Aso Gafua Aperila 13
2. O LE PAPATISOGA O IESU
a. I le lotolotoi o le to'atele na o mai i le vao ina ia vaai iā Ioane le Papatiso, na
sau ai foi ma Iesu. Aisea na Ia faia ai lenei mea? Mataio 3:13-15.
________________________________________________________________________
"O Iesu na avea ma o tatou fa'aa'oa'o i mea uma lava e patino i le ola ma le amio
Atua. Na papatisoina o Ia i le vai o Ioritana, e faapei lava ona tatau ona papatisoina i latou
e o mai ia te Ia." – Our High Calling, p. 157.
"E le'i taliaina e Iesu le papatisoga e avea o se fa'aaliga o le agasala i Lona lava
olaga. Na Ia soifua e faapei o tagata agasala, laasia ai laasaga e tatau ona tatou savavali ai,
ma faia ai le galuega e tatau ona tatou faia. O Lona soifuaga o puapuaga ma le onosa'i
tumau ina ua mavae Lona papatisoga na avea foi ma fa'ata'ita'iga ia i tatou." – The Desire
of Ages, p. 111.
b. Ina ua tula'i a'e Iesu nai le vai, o le a le mea na tupu? Mataio 3:16, 17.
________________________________________________________________________

"O se vaegā taimi fou ma le taua na matala mai nei i luma o [Iesu], ma na Ia
lagonaina le taua tele ma matafaioi o tiute fou o le a Ia faia, ma avega sili atu ona mamafa
o le a tatau ona Ia tauaveina e amata atu i le taimi lea. O Lona papatisoga o le gaioiga
muamua lava lea o Lana auaunaga fa'alaua'itele; ma o iinei na ia silafia lelei ai lava o Ia i
le tulaga o tagata agasala i le avea o Ia ma o latou sui, i Lona tauaveina i luga ia te Ia o a
latou agasala, ma faitauina faatasi ai o Ia ma tagata solitulafono. I Lana tatalo, na siomia
ai e Keriso i Lona lava aao le aiga tagata pa'ū, a'o Lona aao fa'aleAtua o loo Ia aapa atu ai
mo le nofoalii o le Atua faavavau." – The Youth's Instructor, March 1, 1874.
"E le'i faalogo lava agelu i se tatalo faapea. Na latou matuā naunau lava ina ia latou
avatua feau o le mautinoaga ma le alofa i le Fa'aola o loo tatalo. Peita'i, e leai; o le Tamā
lava Ia o le a auauna atu i Lona Alo. Na susulu tu'usa'o mai lava mai i le nofoalii le
malamalama o le pupula o le Atua. Na matala le lagi, ma na susulu mai ai ave o le
malamalama ma le pupula ma na tino mai e faapei o se lupe, ma sa foliga mai e faapei o
se auro iila. O le tino lea na foliga mai o se lupe, o le faatusa lea o le agamalu ma le loto
maulalo o Keriso. . . .
"Na ta'alili mai faititili ma emo mai uila mai i le lagi ua matala mai, ma na sau ai se
siufofoga mamana mata'utia lava, ma na faapea mai, 'O Lo'u Atalii pele lenei, Ou te fiafia
lava ia te Ia.' O upu o le mautinoaga, na fetalaia mai mo le manuia o ē na molimau i Lona
papatisoga, ma ia faamautinoaina mai ai i le Alo pele o le Atua, ua taliaina e Lona Tamā
le aigā tagata e ala ia te Ia, lo latou sui ma lo latou mautinoaga, ma e finagalo le Atua e
fesoota'i atu le tagata ia te Ia, ma tatalaina mai le lagi i tatalo a tagata e ala i le galuega
fa'afautua a Lona Alo." – Ibid.
Aso Lua Aperila 14
3. TOE FANAU, I LE VAI
a. I le talanoaga a Iesu ma Nikotemo, o le a le upu moni na Ia faailoa atu, lea o
loo tumau pea mo tagata uma lava? Ioane 3:5-7.
________________________________________________________________________
"O le faatusa o le fanaufouina, lea na fa'aaoga e Iesu, e lē o se mataupu lea e lē'i
malamalama muamua i ai Nikotemo. O tagata liua mai i aganuu fa'apaupau i le
faatuatuaga o Isaraelu na masani lava ona fa'atusalia i fanau na fa'ato'a fananau. O lea,
atonu na ia manatu ai, e lē'i tatau ona fa'auigaina upu a Keriso i se uiga moni fa’aletino.
Peitai o lona fanau mai o ia o se tagata Isaraelu, na ia manatu ai ua matuā mautinoa lava
lona nofoaga i le malo o le Atua. Na ia manatu na te le'i manaomia se suiga." – The Desire
of Ages, p. 171.
"Na iloa e Nikotemo o iinei na fa'atatau ai le fetalaiga a Keriso i le papatisoga i le
vai ma le fa'afouina o le loto e ala i le Agaga o le Atua." – Ibid., p. 172.
"A'o fetalai Iesu, na ati atu ni ave o le malamalama i le mafaufau o lenei ta'ita'i. O le
a'afiaga mālū o le Agaga Paia e fa'amaulaloina ai, na osofia ai lona loto." – Ibid., p. 173.

"O le mana o le Agaga Paia e fa'aliliuina ai le tagata atoa lava. O lenei suiga o loo
aofia atoa ai le fanaufouina." – The Signs of the Times, November 15, 1883.
b. O le a le tāua o le "fanau i le vai" ma le "fanau i le Agaga"? Roma 6:3-7; Ioane
1:12, 13.
________________________________________________________________________
"O le papatisoga o se ta'utinoga sili lenei ona taua o le lafoa'ia o le lalolagi. O i
latou ua papatisoina i suafa nei e tolu o le Tamā, le Alo, ma le Agaga Paia, ua latou
ta'utino fa'aaliali mai foi i le amataga lava o o latou olaga fa'aKerisiano ua latou lafoa'ia le
latou auaunaga ia Satani ma ua avea i latou ma tagata o le aiga fa'atupu, o fanau a le Tupu
fa'alelagi." – Testimonies, vol. 6, p. 91.
"O le salamō moni mai i le agasala, o le faatuatua i le amiotonu a Iesu Keriso, ma le
papatisoga i Lona maliu, ina ia toe fa'atuina mai nai le vai ina ia ola i se olaga fou, o
la'asaga muamua ia i le fanaufouina lea na fetalai atu ai Keriso ia Nikotemo e tatau ona ia
uia ina ia fa'aolaina ai o ia." – Lift Him Up, p. 79.
"E papatisoina i tatou i le suafa o le Tamā, le Alo, ma le Agaga Paia, ma o nei mana
tetele lē mafuatia e tolu ua tu'ufa'atasia le ta'utinoina mai ina ia galulue mo i tatou pe afai
tatou te galulue fa'atasi ma i latou. Ua tanumia fa'atasi i tatou ma Keriso i le papatisoga e
avea o se fa'atusa o Lona maliu. Ua fa'atuina mai i tatou nai le vai e avea o se fa'atusa o
Lona toe soifua mai. E tatau ona tatou ola e faapei o tagata fanaufouina, ina ia mafai ai
ona toe fa'atuina mai i tatou i le aso tele mulimuli." – The General Conference Bulletin,
April 4, 1901.
Aso Lulu Aperila 15
4. TAGATA FOU
a. A'o le'i papatisoina i tatou, o le a le mea e manaomia e le Alii mai ia i tatou, ma
o le a le sootaga tatou te ulufale atu loa i ai? 2 Korinito 6:14-18.
________________________________________________________________________
"Ia outou o ese mai nai ia te i latou, ma ia outou vavae mai, ua fetalai mai ai le Alii,
ma o le a Ou talia foi outou, ma o le a avea outou ma atalii ma afafine o le Alii e Ona le
malosi uma lava. Se folafolaga matuā taua! O se ta'utinoga lea mo outou o le a avea outou
ma tagata o le aigā tupu, o suli o le malo faalelagi." – Testimonies, vol. 2, p. 592.
"E tatau ea ona outou motusia la outou sootaga mai i uo ma aiga i lo outou filifili
tou te usitai i upu moni maualuga o le upu a le Atua? Ia outou loto tetele, ua uma ona
saunia e le Atua le ala mo outou, o loo matala mai Ona aao e talia outou. Ia outou o ese
mai nai ia te i latou ma ia outou vavae ese mai, aua foi tou te pa'i atu i se mea leaga, ma o
le a Ia taliaina outou. Ua Ia folafola mai ina ia avea o Ia ma Tamā ia te outou. Oka! Matuā
matagofie lenei sootaga! E sili atu ona maualuga ma sili atu ona paia nai lo soo se sootaga
lava fa'alelalolagi. Afai e te faia le faataulaga ofo, afai e tatau ona ē lafoa'iina lou tamā,

tina, tuafafine, tuagane, avā, ma fanau mo Keriso, o le a lē avea outou o nisi e leai ni uo.
Ua fa'atamafaiina outou e le Atua i totonu o Lona aiga; ua avea loa outou ma tagata o le
aigā tupu, o atalii ma afafine o le Tupu o loo pule i le lagi o lagi. E mafai ea ona outou
mana'ona'o i se nofoaga e sili atu ona maualuga nai lo le nofoaga lea o loo folafola mai
iinei? E lē ua lava ea lenei?" – Ibid., vol. 1, p. 510.
b. A toe fanau loa le tagata, o le a le finagalo o le Atua i lena tagata – ma o le a le
mea e tupu i lona olaga? 2 Korinito 5:17; 1 Peteru 1:22, 23; 2:1, 2.
________________________________________________________________________
"O le fa'alialiavale fa'amaualuga ua fufulueseina mai i le agaga. Ua veleeseina le
loto fa'apito. O le uiga ita vave ua lē toe puleaina ai le tagata; auā ua aumaia e Iesu Keriso
manatunatuga ia usitai atu ia te Ia. Aua ne'i ē toe tautala matuā fa'amaualuga tele; aua ne'i
toe sau mai lou gutu ni fa'aupuga fia mata muamua; auā o le Alii o le Atua ia o le atamai,
ma o loo fuaina e Ia gaioiga uma." – The Signs of the Times, September 26, 1892.
"O le natura tuai, lea na fanau mai i le toto ma le loto o le tino, e lē mafai ona fai
mona le malo o le Atua. O ala tuai, o uiga na tu'ufa'asolo mai i tupuaga, o masaniga tuai, e
tatau ona lafoa'ia; auā o le alofa tunoa e lē o se uiga lea e tu'ufa'asolo mai i tupuaga. O le
fanaufouina e aofia ai le mauaina o mafuaaga poo faufauga fou, o tofo fou, ma uiga ma
fa'anaunauga fou. O i latou ua fanau i totonu o se olaga fou e le Agaga Paia, ua latou
tofusia i le natura fa'alelagi, ma i a latou masaniga uma lava ma gaioiga o le a latou tuuina
mai le fa'amaoniga o le latou sootaga ma Keriso." – Marantha, p. 237.
Aso Tofi Aperila 16
5. I LALO O LE PULEAGA A LE ATUA
a. O le a le igoa e tatau ona papatisoina ai tagata ua liua, ma o le a le folafolaga
ua foa'iina mai ia i latou? Mataio 28:19, 20. O le a le avanoa taua lava ma le
matafaioi ua i luga ia i latou? Kolose 3:1-3.
________________________________________________________________________
"A'o gaua'i atu Kerisiano i le sauniga taua o le papatisoga, e tusia e le [Atua] le
ta'utinoga ua latou faia ina ia latou fa'amaoni ia te Ia. . . . Latou te ta'utino atu i latou ua
latou lafoa'ia le lalolagi ma tausia tulafono o le malo o le Atua. E amata mai i le taimi lea
e tatau ai ona latou savavali i le olaga fou. E lē tatau ona latou mulimuli i aganuu a tagata.
E lē tatau ona latou mulimuli i auala lē fa'amaoni. E tatau ona latou usitai i tulafono o le
malo o le lagi. E tatau ona latou sailia le viiga ma le mamalu o le Atua. Afai o le a latou
faamaoni i le latou tautinoga, o le a foa'iina atu ia i latou le alofa tunoa ma le mana o le a
mafai ai e i latou ona fa'ataunuuina le amiotonu atoa uma lava." – Evangelism, pp. 307,
308.
"O le sauniga o le papatisoga e faia lea i le suafa o le Tamā, ma le Alo, ma le Agaga
Paia. O nei malosi tetele e tolu o le lagi ua latou ta'utinoina mai i latou ina ia avea ma

mana o i latou uma lava e gaua'i atu i lenei sauniga, ma tausia ma le fa'amaoni le tautinoga
latou te faia i le taimi lena." – Manuscript Releases, vol. 6, p. 27.
"E te tulai i lalo o le ioega ma le mana o peresona e tolu sili ona paia i le lagi, o ē e
mafai ona tausia oe mai lou pa'ū. E tatau ona ē fa'aalia ua ē oti i agasala; o lou ola ua natia
faatasi ma Keriso i totonu i le Atua." – Ibid., vol. 7, p. 267.
b. A fa'atamafaiina loa i tatou ia avea ma atalii ma afafine o le Atua, o le a le aiā
tatau ma le avanoa taua lava ua patino ia i tatou? Roma 8:16, 17; Kalatia 3:26-29;
4:6, 7.
________________________________________________________________________
Aso Faraile Aperila 17
FESILI TOE FA'AMANATU
a. O le a le faamoemoe na ofo atu e Ioane le Papatiso ia i latou na o mai ia te ia?
b. Aisea na papatisoina ai Iesu?
c. O le a le taua o le talanoaga a Keriso ma Nikotemo mo i tatou?
d. O le a se mea e tatau ona faailoa mai e le papatisoga i le olaga o se tagata?
e. O le a le uiga o loo aofia ai peresona uma o le Atua i le papatisoga o tagata
agasala ua salamo?
Lesona 4 Sapati, Aperila 25, 2009
Fufuluina/Mulumuluina O Vae
"O sē fia sili ia te outu, ia fai o ia ma a outou auauna; o sē fia muamua foi ia te
outou, ia fai o ia ma a outou tautua. E pei o le Atalii o le tagata e le'i sau ia ina ia
auauna mai tagata ia te ia, a ia auauna atu ia, ma foa'iina atu lona ola e fai ma
togiola e sui a'i tagata e to'atele" (Mataio 20:26-28).
"Na foa'i mai e Keriso i Ona soo le sauniga o le fufuluina o vae mo i latou ina ia
latou faatinoina, lea o le a a'oa'o mai ai ia i latou lesona o le agamalu. Na ia fesootaia lenei
sauniga ma le tausamaaga poo le fa'amanatuga." – The Signs of the Times, March 25,
1880.
Faitauga Fautuaina: The Desire of Ages, pp. 642-651.
Ulua'i Aso Aperila 19
1. NA IA ALOFA IA I LATOU

a. O le a se mea o loo tusia e faatatau i le alofa o Iesu mo Ona soo i le taimi na
soso'o tonu lava ma ona puapuaga ma Lona maliu? Ioane 13:1; 15:12, 13.
________________________________________________________________________
"O Iesu, le Faia'oga fa'alelagi, na Ia fa'amautinoa atu i Ona soo Lona alofa ia i latou.
E leai lava se isi mafuaaga na ala ai ona Ia tauaveina le natura fa'aletagata, a ia fa'aalia ai i
tagata le alofa tunoa, alofa, ma le agalelei o le Atua i Lona maliu mo le faaolataga ma le
fiafiaga o Ona tagata." – Testimonies on Sabbath School Work, pp. 39, 40.
b. E lē pei o Iesu, o le a le uiga na puleaina ai le au soo a'o latou o mai faatasi mo
le sauniga o le Fa'amanatuga? Luka 22:24.
________________________________________________________________________
"O le au soo, e ui lava ina foliga mai i le vaaiga i fafo na latou tuua mea uma mo
Iesu, peita’i latou te le'i faamutaina i totonu o o latou loto lo latou sailia o mea tetele ma le
silisili mo i latou lava. O le uiga lenei na mafua ai le finauga poo ai o i latou e sili." – The
Desire of Ages, p. 409.
"Na pipii atu le au soo i lo latou manatu na latou faasilisiliina, i lo latou manatu o le
a fa'aaoga e Keriso Lona mana, ma o le a Ia tauaveina Lona nofoaga i luga o le nofoalii o
Tavita. Ma i totonu o o latou loto sa latou faanaunau taitoatasi pea lava i le nofoaga silisili
ona maualuga i totonu o le malo. Na latou tuuina le latou lava fua i luga ia i latou lava ma
le isi i le isi, ma, e aunoa ma lo latou manatu e sili atu o latou uso nai lo i latou, na latou
fa'amuamuaina i latou lava." – Ibid., pp. 643, 644.
Aso Gafua Aperila 20
2. O LE FA'ATA'ITA'IGA A LE MATAI
a. O le a le gaioiga a Iesu na ofo ai le au soo uma lava? Ioane 13:3-5.
"I se tausamiga, o le masaniga a le aganuu le fufuluina e se auauna o vae o tagata
valaaulia poo tagata fa'aaloalogia, ma i lenei tausamiga, na faia ai le sauniuniga mo lenei
auaunaga. O le fagu vai, o le apa, ma le solo sa i ai, na saunia mo le fufuluina o vae; peitai
e leai se auauna na i ai, ma o le vaega la lea a le au soo e faatinoina. Peitai o le au soo
taitoatasi, o lo latou gaua'i i lo latou fa'amaualuga ne’i fa'amanu'alia, na latou finafinau ai
ina ia aua ne'i latou faatinoina le vaega a le auauna. Na fa'aalia e le au soo uma lava se
uiga lē naunau, ma na foliga mai latou te le'i iloa sa i ai se galuega mo i latou e tatau ona
latou faia. O lo latou gūgū na latou mumusu ai e fa'amaulalo i latou lava." – The Desire of
Ages, p. 644.
"[O le Fa'aola], o lē na alolofa i ai [le au soo], na ia tula'i, ma tuu ese Ona ofu, ma, o
lona aveina o se solo, na ia fusia ai o Ia, ma sasa'a vai i totonu o le apa. O le taimi lena na
matuā ofo ai ma fa'amaina le au soo." – The Review and Herald, July 5, 1898.

"O le gaioiga a [Iesu] na faapupulaina ai mata o le au soo. O le matuā fa'amāina
lava ma le faalumaina na faatumuina ai o latou loto. Na latou malamalama i le a'oa'iga lē
leoa, ma na latou vaaia ai i latou lava i se malamalama fou atoa lava." – The Desire of
Ages, p. 644.
b. Fa'amatala mai le tete'e a Peteru, o lona uiga, ma le tali a Iesu i ana finauga.
Ioane 13:6-9.
________________________________________________________________________
"Na musu Peteru e aumaia ona vae palapalā e pa'i atu i ai aao o lona Alii ma lona
Matai; ae o loo matuā tele lava taimi o loo tatou aumaia ai o tatou agaga tumu i le agasala
ma le faaleagaina ia pa'i atu i le loto o Keriso, o lē e sili ona inoino i le agasala. Oka, o loo
tatou matuā faatiga lava i le Agaga mamā ma le paia o Keriso i a tatou agasala leaga! E lē
o saunia i tatou mo lo tatou fa'atāuaina o le mafutaga paia ma Keriso ma le tasi i le tasi
seivagana ua fufuluina i tatou e ala i Lona toto." – The Review and Herald, July 5, 1898.
c. O le a le uiga o upu a Iesu: "O lē ua taele, ia tau o ona vae, ae mamā uma ai"?
Ioane 13:10.
________________________________________________________________________
"O Peteru ma lona au uso na fa'ataeleina i totonu o le vaipuna tele lava na tatalaina
mo agasala ma le eleelea. Na ioeina i latou e Keriso o i latou o Ona soo. Peitai o le
faaosoosoga na taitaia ai i latou i le agasala, ma na latou manaomia pea lona alofa tunoa
fa'amamāina ai. Ina ua fusia e Iesu o Ia lava i se solo ina ia na fufuluina le pefu mai i vae
[o le au soo], na Ia finagalo ai e ala i lana lava gaioiga ina ia fufulueseina le felotoa'i, fuā
loto leaga, ma le fa'amaualuga fa'alialiavale mai i o latou loto. O lenei manaoga na matuā
sili atu lona taua nai lo le fufuluina o o latou vae eleelea." – The Desire of Ages, p. 646.
Aso Lua Aperila 21
3. O VAE PEFUA/ELEELEA
a. Na fa'apefea ona fa'ailoa mai e le fufuluina e Keriso o vae o le au soo, se
tapulaa tumau e tatau ona iloa e tagata talitonu uma lava? Fa'ataoto 10:12. O le a le
mea o loo fa'aalia ai iuga lelei o le gaioiga a Keriso?
________________________________________________________________________
"O feeseesea'iga e tula'i mai ai lava i taimi uma le feitaga'i, peitai na fufulueseina e
Keriso i le gaioiga o Lona fufuluina o vae o Ona so'o. Na o'o mai se suiga i lagona; sa i ai
le faatasiga o loto ma le alofa o le tasi i le tasi. Na i'u ina latou agamalu, ua latou naunau e
a'oa'oina i latou, ma ua agaalofa, ma na latou manana'o e tuu atu i soo se isi lava le
nofoaga silisili lava. Na saunia i latou ina ia latou tofusia i le tausamaaga mulimuli ma

lagona lelei o le alofa, loloto ma atoatoa, mo lo latou Matai ma le tasi i le tasi." – The
Review and Herald, July 5, 1898.
"O le gaioiga a Keriso i le fufuluina o vae o Ona soo o se gaioiga paia lea; o Lana
fuafuaga i Lona faia faapena, o le aumaia lea o se lagona o le a lē maua ai se nofoaga o se
uiga o le siitiaina a'e o se tasi i luga a'e o le tasi, e ala i lo latou manatuaina o le mea na
faia e Keriso mo i latou. O lenei sauniga na fuafuaina ina ia aumaia ai le uso i se
malamalamaaga o lagona o lona uso." – Ibid., June 14, 1898.
b. O le a le mea o loo finagalo le Alii e faia ia i tatou a'o tatou auauna ma le
agamalu le tasi i le uso i le fufuluina o vae? Salamo 51:2, 7; Eperu 10:22.
________________________________________________________________________
"E lē faalumaina i le Matai le fa'atagaina o Ia e galue mo lo tatou fa'amamāina. O le
uiga agamalu sili ona moni o le taliaina lea ma le loto tumu i le faafetai, o soo se auala
lava e faia mo i tatou, ma faia loa ma le finafinau lava le auaunaga mo Keriso." – The
Desire of Ages, p. 646.
"Ua ē fa'aalia au agasala, ma ua ē tuueseina ma le loto au agasala. Ua ē filifili ina ia
tu'u atu oe i le Atua. Ia ē alu loa ia te Ia i le taimi nei, ma ole atu ia te Ia ina ia Ia
fufulueseina au agasala ma foa'i atu ia te oe se loto fou. Ona ē talitonu lea Na te
fufulueseina au agasala auā ua Ia folafola mai ai. O le lesona lenei na a'oa'oina e Iesu a'o i
ai o Ia i luga o le lalolagi, na Ia a'oa'oina o le meaalofa ua folafola mai e le Atua ia i tatou,
e tatau ona tatou talitonu ua tatou maua, ma o la tatou meatotino lea." – Steps to Christ,
pp. 49, 50.
"Na foa'i atu e Keriso i Ona soo ina ia latou malamalama o le fufuluina o o latou
vae e le'i fufulueseina ai a latou agasala, peitai o le fufuluina o o latou loto na tofotofoina
lea i lenei auaunaga maulalo. Afai na fa'amamāina le loto, o lenei gaioiga na pau lava lea
o le mea na manaomia ina ia fa'aalia ai lenei mea moni. Na Ia fufuluina vae o Iuta; peitai
na Ia fetalai mai, 'E lē o outou uma ua mamā' (Ioane 13:11). Na aumaia e Iuta se loto o se
tagata fa'alata i lenei vaaiga, ma na fa'aalia e Keriso i Ona soo uma sa Ia silafia o ia o lē na
te fa'alataina lona Alii, ma o le fufuluina o ona vae e lē o se sauniga lea e fa'amamāina ai
le agaga mai i lona fa'aleagaina i le agasala." – The Faith I Live By, p. 299.
Aso Lulu Aperila 22
4 O SE SAUNIGA O LE LOTO MAULALO
a. O a fa'amanuiaga ua folafola mai ia i latou e savavali ma le agamalu i luma o
le Atua? 2 Nofoa'iga Tupu 7:14; Isaia 57:15; Mataio 23:12; Iakopo 4:6, 10.
________________________________________________________________________
"O finafinauga uma lava fa'aletagata, o fa'aviiviiga gugutu uma lava, e tatau ona
taatia i le efuefu. O le tagata, le tagata agasala, e tatau ona fa'amaulaloina, aua ne'i
siitiaina." – Testimonies, vol. 8, p. 234.

"O le sili atu o le maualuga o manatu o loo ia i tatou e faatatau ia i tatou lava, o le
itiiti ifo foi lea o lo tatou lagonaina o lo tatou manaomia o Iesu. O le agalelei moni e lē
siitiaina ai lava e le tagata ia lava; peitai o i latou o loo ta'uamiotonuina e i latou i latou
lava, o loo aapa atu lava i taimi uma mo le mamalu ma le viiga mai i tagata. Ua latou
faatuina se tapulaa sese, ma ua maualuga tele lo latou manatu e faatatau ia i latou lava. O i
latou uma lava e pa'u'ū i luga o le papa, ma nutililii ai, o le a fausiaina a'e e Keriso i le
olaga mamā moni ma le faapaiaina." – The Review and Herald, August 7, 1888.
"O i latou e faia ma le agamalu ma le loto maulalo o latou tiute, ina ia lē viia ma
fa'apelepeleina ma fa'amamaluina ai i latou e tagata, a ia viia ai le Atua, o le a latou
mauaina, e avea ma o latou taui, le mamalu, viiga, ma le ola e faavavau." – Ibid., July 22,
1890.
"Na foa'i mai e Keriso i Ona soo le sauniga o le fufuluina o vae, ia i latou ina ia
latou faatinoina, lea o le a a'oa'oina ai ia i latou lesona o le loto maulalo. Na Ia fesoota'iina
atu lenei sauniga ma le tausamaaga poo le fa'amanatuga. Na Ia fuafuaina ina ia avea lenei
ma taimi o le suesue ifo o le tagata ia te ia lava, ina ia maua ai e Ona tagata se avanoa e
iloa ai lagona moni o o latou lava loto e faatatau i le Atua ma le tasi i le tasi. Afai na i ai le
fa'alialiavale fa'amaualuga i totonu o o latou loto, o le a matuā vave lava ona iloa e tagata
agasala fa'amaoni, a'o latou auai i lenei tiute maulalo. Afai o loo i ai le loto faapito ma le
ita, o le a vave lava ona iloaina a'o latou auai i lenei galuega maulalo. O lenei sauniga na
fuafuaina ina ia i'u i fa'aaliga fa'amaoni o agasala, ma ia fa'atuputeleina ai lagona o le
onosai fa'apalepale, fa'amagaloina o sese o le tasi e le tasi, ma le alofa moni, e sauniuni ai
e auai i le sauniga taua o le fa'amanatuga o puapuaga ma le maliu o Keriso." – The Signs
of the Times, March 25, 1880.
b. O le a le taua o le sauniga o le fufuluina e le tasi o vae o le tasi, ma o le a se mea
na faatonu mai e Iesu ia i tatou ia tatou faia i lenei sauniga? Ioane 13:12-17.
________________________________________________________________________
"O loo i ai i totonu o le tagata se uiga ina ia faasiliina o ia nai lo lona uso, ina ia
galue mo ia lava, ina ia sailia le nofoaga sili ona maualuga; ma o le tele lava o taimi o
lenei uiga e i'u lava i manatunatuga leaga ma le loto tiga. O le sauniga lea e muamua nai
lo le Tausamaaga a le Alii ua fuafuaina ina ia fa'amamāeseina ai nei uiga o le lē
femalamalamaa'i, ina ia aumaia ai i fafo le tagata mai i lona loto faapito, aumaia ai o ia i
lalo mai i ona manatu maualuga o le siitiaina o ia e ia lava, i le loto maulalo o le a ta'ita'ia
ai o ia ina ia auauna i lona uso." – The Desire of Ages, p. 650.
Aso Tofi Aperila 23
5. "AMUIA OUTOU"
a. Ina ua uma ona fufuluina e Iesu vae o le au soo, e aofia ai ma vae o Iuta, o le a
le mea na valoia e le Alii? Ioane 13:21-26.
________________________________________________________________________

"O le mana puipui o [le] alofa [o Iesu] na lagonaina e Iuta. Ina o fufuluina e aao o le
Fa'aola nā vae eleelea, ma soloia i le solo, na matuā tumu le loto o Iuta i le lagona ina ia
fa'aalia lana agasala i le taimi lava lena i le nofoaga lava lena. Peitai na te le'i mana'o e
fa'amaulaloina o ia lava. Na ia fa'ama'a'aina lona loto i le tete'e atu i le salamō; ma o
lagona tuai, lea na tu'ueseina mo sina taimi puupuu, o lea ua toe puleaina ai o ia." – The
Desire of Ages, p. 645.
b. O le a se mea e tatau ona tatou a'oa'oina mai i le tala fa'anoanoa e faatatau i le
mea na tupu ia Iuta, ma e faapefea ona tatau ai ona tatou faia le sauniga paia o le
fufuluina o vae poo le mulumuluga? Galuega 1:15-20.
________________________________________________________________________
"O le faatinoina o upu moni na a'oa'oina e Keriso, na feteenai ma faanaunauga ma
sini a [Iuta], ma na lē mafai ona ia aumaia o ia lava ina ia lafoa'i ona manatu ina ia ia
maua ai le poto mai i le lagi. E aunoa ma le savali i le malamalama, na ia filifili e savali i
le pogisa. O faanaunauga leaga, o le agasala o le mana'o, o lagona tauimasui, o manatu
leaga ma lē leoa, na teufatuina seia o'o ina pulea atoa lava o ia e Satani." – The Acts of the
Apostles, p. 558.
"O le faatinoina o le sauniga o le loto maulalo e manaomia ai le suesue ifo o le
tagata ia te ia lava. O tapulaa lelei o le agaga o loo fa'amalosia ai i sauniga taitasi uma lava
faapea. E soifua Keriso i totonu ia i tatou, ma o lenei tulaga e tosina ai le loto i le loto. Ua
ta'ita'ia i tatou ina ia tatou alolofa e pei ona alofa o le uso i le uso, ina ia tatou agalelei,
agamalu, fa'aaloalo i auaunaga i aso taitasi, ma ia tatou maua loto e mafai ona lagonaina
faanoanoaga o le isi." – The SDA Bible Commentary [E. G. White Comments], vol. 5, p.
1139.
Aso Faraile Aperila 24
FESILI TOE FA'AMANATU
a. Na faapefea ona matuā ese lava le uiga o Keriso i totonu o le potu aupito aluga
nai lo uiga o Ona so'o?
b. Aisea na matuā ofo ai lava le au soo i le gaioiga a Iesu o le fufuluina o o latou
vae?
c. Na faapefea ona suia loto o le au soo ona o le gaioiga a Keriso?
d. Aisea e matuā tāua tele ai le agamalu i le olaga o le Kerisiano?
e. O a fa'amanuiaga tatou te seleseleina o se iuga lea o le fufuluina e le tasi o vae
o le tasi?

Lesona 5 Sapati, Me 2, 2009
O LE TAUSAMAAGA A LE ALI'I
"O le ipu o le faafetai o tatou o faafetai ai, e le o le mafuta faatasi ea lea ma le
toto o Keriso? O le areto tatou te tofitofi ai, e le o le mafuta faatasi ea lea ma le tino o
Keriso?" (1 Korinito 10:16).
"A'o tatou taliaina le areto ma le uaina o loo faatusalia ai le tino manu'a ma le toto
masa'a o Keriso, ua tatou faatasi atu ai, i o tatou mafaufau i le taimi o le Fa'amanatuga i le
potu aupito aluga." – The Desire of Ages, p. 661.
Faitauga Fautuaina: The Desire of Ages, pp. 652-661, 151, 152.
Ulua'i Aso Aperila 26
1. O LE PASEKA
a. O le a le sauniga taua na faatuina i le taimi o le fa'asa'olotoina o Isaraelu mai i
Aikupito? Esoto 12:2-6.
________________________________________________________________________
"O le tausiga o le paseka na amata i le fanau mai o le malo o tagata Eperu. I lo latou
po mulimuli o lo latou nofo pologa i Aikupito, ina ua foliga mai ua leai se fa'ailoga o le
lavea'iga, na faatonuina ai i latou e le Atua ina ia latou sauni mo se fa'asa'olotoga i le taimi
lava lena. Na Ia lapata'iina Farao e faatatau i le fa'asalaga mulimuli i luga o tagata
Aikupito, ma na Ia faatonuina tagata Eperu ina ia fa'apotopoto faatasi o latou aiga i totonu
o o latou lava fale. O lo latou sausauina o pou o faitotoa o o latou fale i le toto o le mamoe
ua fasia, na faatonuina i latou ia latou aina le tama'i mamoe, ua tunua i le afi, faatasi ai ma
areto e lē fa'afefeteina ma laau oona latou te ina'i a'i." – The Desire of Ages, pp. 76, 77.
b. E faapefea ona tatou iloa o le tausamiga o le Paseka e lē o se pātī o fiafiaga lea?
Esoto 12:7-11. O ai e leai sa latou aiā e tofusia ai i le Paseka? Esoto 12:43-49.
________________________________________________________________________
"E toatele lava tagata Aikupito na ta'ita'ia ina ia latou ioeina le Atua o tagata Eperu
e na o le pau lava lea o le Atua moni, ma o nei tagata ua latou aioi mai nei ina ia
fa'atagaina i latou ia latou sailia le lafitaga i totonu o fale o tagata Isaraelu pe a ui mai le
agelu o le fa'aumatiaga i luga o le laueleele. Na talia ma le fiafia i latou, ma na latou
tautino mai o le a amata mai i le taimi lena ona latou auauna i le Atua o Iakopo ma o le a
latou o ese fa'atasi atu ma Ona tagata nai Aikupito." – Patriarchs and Prophets, p. 279.

Aso Gafua Aperila 27
2. O LE TAIMI O LE Ŏ ESE ATU
a. O le a le sauniga na faatuina e Iesu ina ua Ia tofusia i le sauniga o le Paseka i le
taimi mulimuli lava? Luka 22:19, 20; 1 Korinito 11:23-26.
________________________________________________________________________
"Ina ua tuuina atu e le Fa'aola Lona ola i luga o Kalevario, na muta ai loa iina le
taua o le Paseka, ma na suitulaga ai loa iina le sauniga o le Tausamaaga a le Alii poo le
Fa'amanatuga e avea o se fa'amanatuga o le sauniga lava lea e tasi lea na avea ai le
sauniga o le Paseka ma fa'atusa." – Patriarchs and Prophets, p. 539.
"O le Paseka na fa'atuina e avea o se fa'amanatuga o le lavea'iga o Isaraelu mai i le
pologa i Aikupito. Na fai mai le faatonuga a le Atua, a'o fesili mai le fanau i lea tausaga
ma lea tausaga i le uiga o lenei sauniga, e tatau ona toe fa'amatalaina le talaaga. Na
faapena ona fuafuaina ina ia fa'atumaufouina le lavea'iga ofoofogia i totonu o mafaufau o
tagata uma. O le sauniga o le Tausamaaga a le Alii na tuuina mai ina ia fa'amanatu ai le
lavea'iga tele na faia o se i'uga lea o le maliu o Keriso." – The Desire of Ages, pp. 652,
653.
b. A'o le'i auai le tagata i le sauniga o le Fa'amanatuga, o le a le matafaioi o loo i
luga ia te ia? 1 Korinito 11:27-30; 2 Korinito 13:5.
________________________________________________________________________
"E matuā mana'omia lava le su'esu'e auiliili o le loto, ma ia matuā vailiili lelei lava e
tusa ai ma le malamalama o le upu a le Atua, O o'u malolo ea, poo o'u matuā lē fa'amaoni
i totonu o lo'u loto? Ua fa'afouina ea a'u i totonu ia Keriso, po'o o'u fa'aletino pea ea i
totonu o lo'u loto, ma se ofu fou o loo fa'aofuina ai fafo? Ia tu'u a'e outou i luga i le
fa'amasinoga a le Atua, ma ia vaai e faapei ona i ai i totonu o le malamalama o le Atua pe
o i ai soo se agasala lilo lava, so'o se amioga leaga lava, poo soo se tupua lava e te le'i
fasiotia. Tatalo, ioe, tatalo e faapei ona le'i faapea lava ona ē tatalo muamua, ina ia le
fa'aseseina oe i mailei a Satani; ina ia lē tuuina atu oe i se uiga lē gaua'i, lē fa'aeteete, ma
le fa'alialiavale, ma ē faataunuuina ai tiute fa'aletapuaiga ina ia fa'agūgūina ai lou lava
malamalamaaga." – Messages to Young People, pp. 83, 84.
"O le Alii paia mai i le lagi o loo auai i lenei taimi o le [mulumulugā vae] ina ia
avea ai o se taimi o le suesue ifo o le loto, o se taimi o le iloaina e le tagata o ana agasala,
ma le folafolaga matagofie o le fa'amagaloina o agasala. . . . O fa'amanuiaga na
fa'agaloina, o alofa tunoa na fa'aaogaseseina, o agalelei na manatu māmā i ai, ua toe
fa'amanatu uma mai i le mafaufau. O mafuaaga o le loto tiga o loo tuleia ese ai le laau
taua o le alofa , ua fa'aaliaina. O uiga ma amioga sese o le amio, o le fa'atalale i tiute, o le
agaga lē fa'afetai i le Atua, o uiga lē alofa e fa'aalia i lo tatou au uso, ua toe fa'amanatuina
uma mai lava. O le agasala, ua vaaia i le malamalama lea e silafia ai e le Atua." – The
Desire of Ages, pp. 650, 651.

Aso Lua Aperila 28
3. "E FAI MA FA'AMANATUGA IA TE A'U"
a. O le a le uiga o le fa'atonuga a Keriso, "Ia outou faia le mea nei e fai ma
fa'amanatuga ia te A'u"? Luka 22:19, 20; 1 Korinito 11:24, 25.
________________________________________________________________________
"I le aso lona sefulu ma le fa o le masina muamua fa'aIutaia, o le aso lava lea ma le
masina na fasia ai le mamoe o le Paseka, mo le sefulu ma le lima seneturi uumi, o Keriso,
o Lona tausamiina o le Paseka ma Ona soo, na Ia faatuina ai lena tausamaaga ina ia
fa'amanatu ai Lona lava maliu i le avea o Ia ma 'Tama'i Mamoe a le Atua, na te aveesea le
agasala a le lalolagi' (Ioane 1:29). O lena lava po na aveina ai o Ia e lima o tagata agasala
ina ia fa'asatauroina ma fasiotia." – The Great Controversy, p. 399.
"I le fa'atuina o lenei sauniga paia e suitulaga i le Paseka, na tuua ai e Keriso mo
Lana ekalesia se fa'amanatuga o Lana taulaga tele o Lona soifua mo le tagata. Na Ia fetalai
faapea, 'Ia outou faia le mea nei, e fai ma faamanatuga ia te A'u' (Luka 22:19). O le taimi
tonu lea o le suiga i le va o fa'atulagaga e lua ma o la fa'amanatuga. O le tasi o le a
fa'amutalia e faavavau; o le isi, lea fa'ato'a Ia faatuina lava, o le a suitulaga i lea na
muamua, ma fa'aauau ai i taimi uma lava e avea ma fa'amanatuga o Lona maliu." –
Evangelism, pp. 273, 274.
b. E fa'afia ona tatau ona fa'amanatuina le Tausamaaga a le Alii – ma o le a le
taimi e muta ai le fa'amanatuina? 1 Korinito 11:26.
________________________________________________________________________
"Na fuafua e Keriso o lenei tausamaaga [fa'asauniga] e tatau ona fa'amanatuina so'o
ina ia tatou manatua ai Lona maliu i le foa'iina mai o Lona ola mo le fa'amagaloina o
agasala a i latou uma lava e talitonu ia te Ia ma talia o Ia." – God's Amazing Grace, p. 152.
"O le Tausamaaga a le Alii poo le Fa'amanatuga e le'i fuafuaina ina ia na o nisi o
taimi e fa'amanatuina ai pe fa'atasi foi i le tausaga, peitai na fuafuaina ina ia faamanatuina
so'o ia sili atu nai lo le Paseka lea e faia fa'atasi i le tausaga. O lenei sauniga taua o loo
fa'amanatuina ai se sauniga e sili atu lona taua nai lo le lavea'iga o le fanauga a Isaraelu
mai i Aikupito. O lena lavea'iga na fa'atusa atu i le togiola tele lea na faia e Keriso e ala i
le foa'iina mai o Lona lava ola mo le lavea'iga mulimuli o Ona tagata." – The Spirit of
Prophecy, vol. 1, p. 203.
"Ona toe faasinoina atu lea o a'u i tua i le taimi na aveina ai e Iesu Ona soo na o i
latou, i se potu aupito aluga, ma na Ia fufuluina muamua o latou vae, ona avatu lea ia i
latou ia latou aai i le areto ua tofitofiina, lea e faatusalia ai Lona tino manu'a, ma le sua o
le vine e faatusalia ai Lona toto masa'a. . . . E tatau i tagata uma lava ona gaioi ma le
malamalama lelei, ma mulimuli i le faata'ita'iga a Iesu i nei mea, ma a auai ma faia nei

sauniga, e tatau ona vavae ese mai i tagata lē talitonu pe a mafai ai." – The Present Truth,
November 1, 1850.
Aso Lulu Aperila 29
4. O LE TOTO MA LE TINO O KERISO
a. I Ana talanoaga ma ta'ita'i o Iutaia, o le a le upu moni na fa'amanino atu e
Iesu? Ioane 6:32-35.
________________________________________________________________________
"Tatou te lē mafaia e i tatou, taitoatasi, ona fa'atumauina lo tatou ola fa'aletino
seivagana ua tatou aai ma feinu mo i tatou lava, meaai fa'aletino. O le auala e fa'atumauina
ai le ola fa'aleagaga ma le ola maloloina, e tatau ona tatou aai ia Iesu Keriso e ala i le
suesueina o Lana upu, ma faia mea uma ua Ia faatonu mai i totonu o lena upu. O lenei
faiga o le a maua ai se mafutaga vavalalata lava ma Keriso. O le lālā e fua mai ona fua e
tatau ona i ai i totonu o le vine, o se vaega o le vine, ma maua mai ai le ola mai i le laau
autu. O le ola lenei e ala i le faatuatua i le Alo o le Atua." – The Review and Herald, June
7, 1898.
"O loo tatou nofo aitalafu i le maliu o Keriso i o tatou ola nei o loo tatou ola ai i le
lalolagi. O le meaai o loo tatou aai ai na fa'atauina i Lona tino manu'a. O le vai o loo tatou
inuina ua fa'atauina i Lona toto masa'a. E leai lava se taimi e tasi e ai ai e se tagata paia
poo se tagata agasala sana meaai o aso taitasi, e aunoa ma le fafagaina e le tino ma le toto
o Keriso. O le satauro o Kalevario ua fa'apipi’iina i luga o areto/meaai taitasi uma lava. O
loo lafoia mai i vaitafe uma lava. O mea uma lava nei ua a'oa'o mai e Keriso i le filifilia o
fa'ailoga o Lana taulaga tele." – The Desire of Ages, p. 660.
b. O le a le uiga o upu nei: "O Lo'u tino o le meaai moni lea, o Lo'u toto foi o le
meainu moni lea"? Ioane 6:53-58.
________________________________________________________________________
"O le aina o le tino ma le inuina o le toto o Keriso o le taliaina lea o Ia e avea ma o
tatou lava Fa'aola, ma talitonu ai Na te faamagaloina a tatou agasala, ma ua tatou atoatoa i
totonu ia te Ia. O le vaavaai i Lona alofa, o le tumau ai i Lona alofa, o le inuina i totonu o
Lona alofa, e tatau ona tofusia ai i tatou i Lona natura. O le mea e faia e le meaai i le tino,
e tatau ona faapena Keriso i le agaga. O le meaai e lē mafai ona fa'amanuiaina ai i tatou
seivagana ua tatou aina le meaai, seivagana ua avea ma vaega o o tatou tagata ola. E
faapena foi ona leai se aoga o Keriso ia i tatou pe afai tatou te lē iloa o Ia i le avea o Ia ma
o tatou Fa'aola taitoatasi. O se iloa fa'alemafaufau, o le a leai se aoga mo i tatou. E tatau
ona tatou aai ia te Ia, talia o Ia i totonu o le loto, ina ia avea Lona olaga e fai ma o tatou
olaga. O Lona alofa, o Lona alofa tunoa, e tatau ona tatou fa'ata'ita'iina." – Ibid., p. 389.
"Ua Ia fetalai mai, 'O lē e 'ai i Lo'u tino ma inu i Lo'u toto, o loo tumau o ia i totonu
ia te A'u, o A'u foi i totonu ia te Ia. E faapei ona auina mai A'u e le Tamā soifua, o loo ola

foi A'u i le Tamā: e faapena foi lē e 'ai ia te A'u, o le a ola ai o ia ia te A'u' (Ioane 6:54, 56,
57). O loo fa'atatau lenei mau i le Fa'amanatuga paia i se tulaga fa'apitoa lava. A'o
manatunatu le fa'atuatua i le taulaga tele a lo tatou Alii, ona fa'ata'ita'iina loa lea e le loto
le olaga fa'aleagaga o Keriso. O lena tagata o le a ia maua le malosi fa'aleagaga mai i
Fa'amanatuga taitasi uma lava." – Ibid.
Aso Tofi Aperila 30
5. O LE TAUSAMAAGA TELE
a. O le a se mea matagofie na tupu e tatau ona fa'amalosia ai i tatou ina ia tatou
tumau fa'amaoni i lo tatou olaga fa'aKerisiano? Fa'aaliga 19:6-9.
________________________________________________________________________
"O Iesu, le Fa'aola alofa mutimutivale, na Ia auina mai i lo tatou lalolagi le
valaaulia lautele, 'Ia outou o mai, auā ua uma ona saunia mea uma' (Luka 14:17). O le a ē
fa'ata'ita'i ea i tagata Iutaia, o ē na lē taliaina le valaaulia? Ua tuu mai ia i tatou le
valaaulia, ma e finagalo le Alii ina ia ē mata'u ma gatete i Lana upu, ina ia mafai ona Ia
fa'amumūina i totonu o lou loto le faamoemoe ma le faatuatua ma le talitonu paia. Ua Ia
faatonu mai ia te oe ina ia ē sailia muamua le malo o le Atua ma Lana amiotonu, ma ua Ia
folafola mai o le a foa’iina mai mea uma lava e aoga ia te oe. Ua Ia tatalaina mai i ou luma
le matagofie o parataiso, ma o le fesili o lenei, o le a ē taliaina ea Lana valaaulia?" – The
Review and Herald, November 5, 1895.
b. O le a le valaaulia alofa ua tuuina mai nei i tagata ola uma lava ma o ai foi o
loo ala mai ai lenei valaaulia? Isaia 55:1-3; Fa'aaliga 22:17.
________________________________________________________________________
"Ua valaau e le Atua lenei nuu o tagata [o le auaunaga o le tala lelei] ina ia latou
avatu i le lalolagi le feau o le afio fa'avave mai o Keriso. E tatau ona tatou tuuina atu i
tagata le valaau mulimuli i le tausamaaga o le tala lelei, le valaaulia mulimuli i le
tausamaaga o le faaipoipoga a le Tama'i Mamoe. O le afe ma afe o nofoaga e le'i fa'alogo
lava i le valaau o loo fa'atali pea ina ia faalogo i le feau." – Gospel Workers, p. 64.
"O le Fa'aola alofa ma le mutimutivale o Iesu, ua Ia fetalai mai o loo i ai se agasala
e sili atu nai lo le agasala lea na mafua ai ona fa'aumatia Sotoma. O le agasala lea a i latou
e liliu ese ina ua uma ona latou faalogo i le valaaulia o le tala lelei ina ia latou o mai i le
tausamaaga o le fa'aipoipoga a le Tama'i Mamoe, ma latou mumusu e tali atu i le valaaulia
fa'alelagi. O le valaaulia i le tausamaaga o le tala lelei o loo masani lava ona teena i
fa'atoesega." – The Review and Herald, November 5, 1895.

Aso Faraile Me 1
FESILI TOE FAAMANATU
a. O faapefea ona fesootai le Talisuaga a le Alii poo le Fa'amanatuga ma le
sauniga anamua o le Paseka?
b. Aisea e matuā taua tele ai le suesue ifo o le tagata ia te ia lava a'o le'i faia le
Fa'amanatuga poo le Talisuaga a le Alii?
c. Aisea e tatau ai ona vavae ese tagatā ekalesia mai i tagata lē talitonu i sauniga
faapenei?
d. O le a le masaniga o aso taitasi o loo fa'atusa mai i le aina ma le inuina o
Keriso?
e. O le a se mea e tatau ona tatou fa'alototeleina i tatou ma isi ina ia sailia?
Lesona 6 Sapati, Me 9, 2009
O le 2,300 Aso Fa'avaloaga
"Seia atoa afiafi ma taeao e lua afe ma le tolu o selau, ona faapaiaina ai lea o le
malumalu" (Tanielu 8:14).
"O i latou na mulimuli i le malamalama o le upu fa'avaloaga na latou iloa, e aunoa
ma le afio mai o Keriso i le lalolagi i le i'uga o le 2,300 aso i le 1844, o le taimi lena na
ulufale atu ai Keriso i le potu silisili ona paia o le malumalu fa'alelalolagi ina ia faia le
galuega mulimuli o le togiola." – The Great Controversy, p. 422.
Faitauga Fautuaina: The Great Controversy, pp. 317-330, 409-422.
Ulua'i Aso Me 3
1. O LE FA'AALIGA O LE TANIELU E 8
a. O le a le mea na fa'ailoaina atu i le perofeta o Tanielu e faatatau i le fa'aaliaina
o mea tutupu i le lalolagi? Tanielu 8:3-14. O le a le fa'amatalaga na aumaia e le agelu
o Kaperielu? Tanielu 8:20-25.
________________________________________________________________________
"Na fa'ailoa mai le malamalama e fa'atatau i mea tutupu o le lumana'i. . . . ma na
saili ma le finafinau [Tanielu] mo le uiga o le fa'aaliga. Na lē mafai ona ia malamalama i
le sootaga o tausaga e fitu sefulu o le fa'atagataotauaina, e pei ona valoia e ala mai ia
Ieremia, ma le lua afe tolu selau tausaga lea na ia faalogo atu i le agelu i le fa'aaliga o ia

fa'ailoa mai o le a uma a'o le'i fa'amamāina le malumalu o le Atua." – Prophets and Kings,
p. 554.
"Na a'oa'oina [Tanielu] e le Atua ina ‘ia ia faitauina mealilo o le lumanai ma
fa'amaumau mo augatupulaga o mulimuli mai, e ala i fa'ailoga ma fa'atusa, mea tutupu e
aofia ai le talaaga o lenei lalolagi seia o'o i le iuga o le taimi." – Ibid., p. 485.
b. Na fa'amatala e le agelu fa'atusa o le mamoe po'a, oti, ma nifo. O a vaega o le
fa'aaliga e le'i fa'amatalaina i le perofeta? Tanielu 8:26, 27.
________________________________________________________________________
"Na auina mai le agelu ia Tanielu mo le autu tonu lava o le fa'amatalaina ia te ia o
le vaega lea na ia lē mafai ona malamalama i ai i le fa'aaliga o le mataupu e valu, o le
fa'amatalaga lea e faatatau i le taimi – 'seia atoa afiafi ma taeao e lua afe ma le tolu o
selau, ona fa'amamāina/fa'apaiaina lea o le malumalu' (Tanielu 8:14)." – The Great
Controversy, p. 326.
Aso Gafua Me 4
2. UA FA'AMATALA E KAPERIELU
a. Ina ua mae'a le tatalo finafinau a le perofeta, o le a le tala a le agelu ia Tanielu
– ma aisea e taua tele ai lenei fa'amatalaga ia i tatou i le taimi lenei? Tanielu 9:20-23;
12:3, 4, 9, 10.
________________________________________________________________________
"A'o tatou latalata atu i le i'uga o le talaaga o lenei lalolagi, o valoaga na fa'amauina
e Tanielu ua matuā manaomia ai lava lo tatou suesue auiliili i ai, auā e faatatau tonu lava i
le taimi o loo tatou ola ai nei. E tatau ona fesoota'iina atu, a'oa'oga o le tusi mulimuli o le
Feagaiga Fou i valoaga o le tusi o Tanielu. Ua ta'ita'ia e Satani le toatele ina ia latou
talitonu o vaega fa'avaloaga o tusitusiga a Tanielu ma Ioane e lē mafai ona malamalama i
ai. Peitai o le folafolaga e matuā manino lava, o le fa'amanuiaga fa'apitoa, o le a fa'atasi i
le suesueina o nei valoaga. 'O tagata popoto o le a malamalama' (Tanielu 12:10), o le
fa'amatalaga lea na tautalagia i fa'aaliga ia Tanielu ia sa fuafuaina o le a tatalaina i aso
mulimuli." – Prophets and Kings, pp. 547, 548.
b. E faapefea ona faitauina aso e 2,300 i taimi faavaloaga ma vaevaeina i vaegā
taimi maoti? Esekielu 4:6; Numera 14:34; Tanielu 9:24-27.
________________________________________________________________________
"Ona fa'amatala auiliiliina lea e le agelu le vaegā taimi o vaiaso e fitu sefulu." – The
Review and Herald, March 21, 1907.
"O aso e 2,300 na maua lona amataga ina ua fa'ataunuuina le faatonuga poo le
poloaiga a Aretaseta mo le toe fausiaina o Ierusalema, i le tau e toulu ai lau o laau i le

tausaga e 457 TLM. O le avea o lenei tausaga ma taimi amata, na matuā fetaui lelei ai le
fa'aaogaina ma le fa'amatalaina o mea uma lava na tutupu ia na valoia mai i le
fa'amatalaga o lena vaegā taimi i le Tanielu 9:25-27. O le ono sefulu ma le iva vaiaso, o le
483 ia o tausaga muamua o le 2,300 tausaga, na fuafuaina ina ia o'o atu i le Mesia, o Lē na
Fa'au'uina; ma o le papatisoga o Keriso ma Lona fa'au'uina e le Agaga Paia, i le TA 27, na
fa'ataunuuina tonu ai lava le taimi valoiaina. I le ogatotonu o le vaiaso lona fitu sefulu, na
fuafuaina o le a fasiotia ai le Mesia. O le tolu ma le afa tausaga talu ona uma Lona
papatisoga, na fa'asatauroina ai Keriso, i le tau e totogo ai laau o le TA 31. O le fitu sefulu
vaiaso, poo tausaga moni ia e 490, na fuafuaina e patino fa'apitoa lava i tagata Iutaia. I le
mae'a o lenei vaegā taimi na fa'amauina ai e le malo o Iutaia lona teena o Keriso e ala i
lona sauāina o Ona so'o, ma na liliu atu loa le au aposetolo i Nu'u Ese, i le TA 34. O le
mae'a la o ulua'i tausaga e 490 o le 2,300 tausaga, e 1810 tausaga o le valoaga na totoe ai.
Amata mai i le TA 34, o le 1810 e o'o atu lona faitauina i le TA 1844. Na fai mai le agelu,
'O le taimi lena, o le a fa'amamāina ai le malumalu' (Tanielu 8:14). O vaegā taimi uma
lava o le valoaga ua mavae atu na lē mafa'afesiligia lo latou fa'ataunuuina i le taimi na
filifilia e fa'ataunuuina ai." – The Great Controversy, p. 410.
Aso Lua Me 5
3. FA SELAU IVA SEFULU TAUSAGA
a. O le a le mafuaaga na vavaeseina ai vaiaso fa'avaloaga e fitu sefulu mai i aso
poo tausaga moni e 2,300? Tanielu 9:25, 27 (vaega muamua).
"Ina ua uma ona ia faatonu atu ia Tanielu ina 'ia ia 'malamalama i le upu, ma
mafaufau i le fa'aaliga,' o upu muamua lava a le agelu na fai mai: 'Ua atofaina vaiaso e fitu
sefulu i lou nuu ma lau aai paia' (Tanielu 9:23, 24). O le upu lea o loo fa'aliliuina iinei i le
upu 'atofaina' o lona uiga moni lava o le 'vavae ese/tipi ese.' O le fitu sefulu vaiaso lea o
loo faailoa mai ai le 490 tausaga, ua faailoa mai e le agelu ua vavae ese, ma e patino tonu
lava i tagata o le malo o Iutaia. Peitai o le a le mea lea ua vavaeeseina mai ai i latou? Talu
ai ona o le 2,300 aso e na o le pau lava lea o le vaegā taimi o loo ta'ua mai i le mataupu e
valu, o lona uiga o le vaegā taimi lea na vavaeeseina mai ai le fitu sefulu vaiaso; o lea la, o
vaiaso e fitu sefulu e tatau ona avea ma vaega o le 2,300 aso, ma o vaegā taimi ia e lua e
tatau ona amata fa'atasi. O vaiaso e fitu sefulu na faailoa mai e le agelu na amata mai i le
tuuina mai o le poloaiga ina ia toe fausia Ierusalema. Afai e mafai ona maua le aso o lenei
poloaiga, o le a mautinoa ai loa le taimi o le amataga mo le vaegā taimi tele lava o le
2,300 aso.
"I le mataupu lona fitu o Esera o loo maua ai iina le poloaiga. Fuaiupu e 12-26. I
lona tulaga sili ona atoatoa na faia ai e Aretasesa, le tupu o Peresia, 457 TLM. Peitai i le
Esera 6:14 o loo faailoa mai ai o le fale o le Alii i Ierusalema na fausia 'e tusa ai ma le
poloaiga ['fa'atonuga,'] a Kuresa, ma Tariu, ma Aretasesa le tupu o Peresia.' O nei tupu e
to'atolu, i lo latou amataina, toe fa'amautuina, ma le fa'ataunuuina atoa o le fa'atonuga poo
le poloaiga, na aumaia ai le poloaiga i lona atoatoaga na manaomia e le valoaga e fa'ailoga

ai le amataga o tausaga e 2,300. A avea la le 457 TLM, le taimi na fa'ataunuuina atoa ai le
poloaiga, e avea ma tausaga o le poloaiga, na vaaia ai le fa'ataunuuina o vaega taitasi o le
valoaga e faatatau i vaiaso e fitu sefulu." – The Great Controversy, pp. 326, 327.
b. O anafea ma na faapefea ona fa'au'uina Iesu? Luka 3:1-3; Galuega 10:38;
Mataio 3:16. (Mesia [Mashiach, Eperu], Keriso [Christos, Eleni], o lona uiga "o lē ua
fa'au'uina.").
"O le poloaiga a Aretasesa na fa'ataunuuina i le tau e toulu ai lau o laau i le TLM
457. Amata mai i lenei tausaga, o le 483 tausaga e o'o atu lona faitauina i le tau e toulu ai
lau o laau i le TA 27. O le taimi lena na fa'ataunuuina ai lenei valoaga. O le upu 'Mesia' o
lona uiga o 'Lē ua Fa'au'uina.' I le tau e toulu ai lau o laau i le TA 27, na papatisoina ai
Iesu e Ioane ma na Ia maua ai le fa'au'uga a le Agaga. O loo molimau le aposetolo o
Peteru o le 'Atua na fa'au'uina Iesu o Nasareta i le Agaga Paia ma le mana' (Galuega
10:38). Ma o le Fa'aola lava Ia na Ia fetalai mai: 'Ua i luga ia te A'u le Agaga o le Alii, auā
ua Ia fa'au'uina A'u ina ia Ou tala'iina le tala lelei i ē matitiva' (Luka 4:18)." – Ibid., p.
327.
Aso Lulu Me 6
4. O LE VAIASO LONA FITU SEFULU
a. E tusa ai ma le valoaga, o le a le mea na valoiaina o le a tupu ina ua uma le
fa'au'uga o Iesu i le iuga o le vaiaso lona fitu sefulu? Tanielu 9:27.
"O le 'vaiaso' lea o loo fa'ailoa mai iinei, o le vaiaso mulimuli lea o vaiaso e fitu; o
tausaga mulimuli ia o le vaegā taimi na vavaeeseina pe na tuuina atu faapitoa lava i tagata
o le malo o Iutaia. I lenei taimi, amata mai i le TA 27 e o'o atu i le TA 34, na tuuina
fa'apitoa atu ai lava, muamua lava e Keriso, ma, mulimuli ane ai, e ona so'o, le valaaulia o
le tala lelei i tagata Iutaia. A'o o atu le au aposetolo ma tala'i atu le tala lelei o le malo, na
faatonu atu le Fa'aola: 'Aua tou te o atu i le ala o Nuu Ese, aua foi tou te o atu i se aai o
Samaria; ae lelei ona outou o atu i mamoe o le aiga o Isaraelu ua leiloa' (Mataio 10:5, 6).
"O le vaeluagalemu foi o le vaiaso o le a Ia fa'agata ai le taulaga ma le mea
foa'ifuaina' (Tanielu 9:27). I le TA 31, tolu ma le afa tausaga talu ona mavae Lona
papatisoga, na fa'asatauroina ai lo tatou Alii. O le ofoina la o le taulaga tele i luga o
Kalevario, na fa'amutalia ai lena faatulagaga o taulaga ofo lea na fa afe tausaga o faasino
atu i luma i le Tama'i Mamoe a le Atua." – The Great Controversy, pp. 327, 328.
"I le ogatotonu o le vaiaso lona fitu sefulu, na fuafuaina o le a fa'asatauroina ai le
Mesia. O le tolu ma le afa tausaga talu ona mavae Lona papatisoga, na fa'asatauroina ai
Keriso, i le tau e totogo ai fua/fuga o laau i le TA 31. O vaiaso e fitu sefulu, poo le 490
tausaga, na fuafuaina ina ia patino faapitoa lava i tagata Iutaia. I le iuga o lenei vaegā
taimi na faamauina ai e le malo lona teena o Keriso e ala i le sauāina o Ona soo, ma na
liliu atu loa le au aposetolo i tagata o Nuu Ese, i le TA 34." – Ibid., p. 410.

. Ina ua mavae le maliu o Keriso i le TA 31, sa i ai i le malo o Iutaia se taimi o le
nofo vaavaaia poo le avanoa mo le 3½ tausaga. O anafea na uma ai le fitu sefulu
tausaga? Galuega 13:46-48.
________________________________________________________________________
"O vaiaso e fitu sefulu, poo tausaga e 490, lea na tuuina atu faapitoa lava i tagata
Iutaia, na muta, e pei ona tatou vaaia nei, i le TA 34. I le taimi lena, e ala i gaioiga a le
fono sili ona maualuga a Iutaia e ta'ua o le Sanetini, na faamauina ai e le malo lona teena o
le tala lelei e ala i lo latou fasiotia o Setefano ma le sauāina o soo o Keriso. O le taimi
lena, e lē na o le malo filifilia na toe fa'atapulaaina i ai le feau o le faaolataga, ae na tuuina
atu i le lalolagi. O le au so'o, o le fa'amalosia o i latou e sauāga ina ia latou sosola ese mai
i Ierusalema, 'na latou o atu ai i soo se mea lava ma latou tala'i atu le upu' (Galuega 8:4)."
– Ibid., p. 328.
"O le faitotoa lea sa tapunia e le tele o tagata liua o Iutaia i tagata o Nuu Ese, o lenei
ua faatonuina ina ia tatalaina. Ma o tagata o Nuu Ese na taliaina le tala lelei, na manaomia
ina ia faatutusaina i latou ma soo Iutaia, e aunoa ma le manaomia fua o le tausiaina o le
sauniga o le peritome." – The Acts of the Apostles, p. 136.
Aso Tofi Me 7
5. O LE MALUMALU INA IA FA'AMAMĀINA
a. O le a le taimi na fuafuaina ina ia o'o atu i ai aso e 2,300? O le a le mea na tupu
i le taimi lena? Tanielu 8:14.
________________________________________________________________________
"O vaiaso e fitu sefulu – 490 aso – o le vavaeeseina o aso nei mai i le 2,300, na
totoe mai ai aso e 1810. Ina ua mae'a le i'uga o aso e 490, sa totoe mai ai pea le 1810 aso
ina ia faataunuuina. Amata mai i le TA 34, o le 1810 tausaga e o'o atu lona faitauina i le
1844. O lea la, o le 2,300 aso o le Tanielu 8:14 e uma i le 1844. I le iuga o lenei vaega
taimi tele, e tusa ai ma le molimau a le agelu a le Atua, 'o le a fa'amamāina ai le malumalu'
(Tanielu 8:14). Na faapena ona fa'ailoa manino mai lava le taimi o le fa'amamāina o le
malumalu – lea na toe itiiti lava a talitonuina i le lalolagi atoa o le a faia i le toe afio faalua
mai o Iesu." – The Great Controversy, p. 328.
"E aunoa ma le afio mai o Keriso i le lalolagi i le iuga o le 2,300 aso i le 1844, na
ulufale atu ai Keriso i totonu o le potu silisili ona paia o le malumalu faalelagi e faia le
galuega mulimuli o le togiola e sauni ai mo Lona afio mai." – Ibid., p. 422.
b. O le a le mea o loo tupu i le taimi lenei i le malumalu i le lagi? Eperu 4:14-16;
7:25; 9:11, 12, 23, 24; Fa'aaliga 3:7, 8.
________________________________________________________________________

"O le iuga o le 2,300 aso i le tausaga e 1844 na faailoga ai se suiga taua. Peitai e ui
lava ina e moni ua tapunia le faitotoa o le faamoemoe ma le alofa tunoa lea sa mafai ona o
atu ai tagata i le Atua mo le afe valu selau tausaga, na tatalaina se isi faitotoa, ma o le
fa'amagaloga o agasala na ofoina mai i tagata e ala i le galuega fa'afautua a Keriso i totonu
o le potu sili ona paia. O le tasi vaega o Lana auaunaga ua tapunia nei, ina ia amataina ai
le isi vaega o Lana auaunaga. Sa i ai pea se 'faitotoa matala' i le malumalu i le lagi, i le
nofoaga o loo auauna ai Keriso mo le tagata agasala." – Ibid., pp. 429, 430.
Aso Faraile Me 8
FESILI TOE FAAMANATU
a. Aisea e taua tele ai le valoaga a le Tanielu 8:14?
b. O le a le faamaoniga o loo faailoa mai ai o aso fa'avaloaga e 2,300 o tausaga
moni ia?
c. E faapefea ona fa'amaonia e le taimi o Keriso i luga o le fogaeleele, le tulafono
o le tausaga ma le aso e tasi?
d. Aisea e taua ai le tausaga o le TA 34 i le valoaga?
e. Talu mai lava le 1844, o le a se mea ua faatupulaia lona taua tele i le olaga o le
Kerisiano?
Lesona 7 Sapati, Me 16, 2009
O LE MALUMALU
"Ua ia i tatou se faitaulaga sili e faapena, o le ua nofo i le itu taumatau o le
nofoalii o lē Silisili ese oi le lagi, o le auauna i le mea paia, ma le fale fetafai moni, sa
faatuina e le Alii, ae le o le tagata." (Eperu 8:1, 2).
"O le malumalu i le lagi, lea o loo auauna ai nei Iesu mo i tatou, o le malumalu
moni lea, lea na faatusa i ai le malumalu lea sa fausia e Mose." – The Great Controversy,
p. 414.
Faitauga Fautuaina: Patriarchs and Prophets, pp. 343-358.
Ulua'i Aso Me 10
1. O LE SINI O LE MALUMALU

a. O fea, i luga o le fogaeleele, na folafola mai le Atua e mau ai o Ia ma Ona
tagata? Esoto 25:8; 2 Nofoaiga 6:1, 2; Isaia 66:1.
________________________________________________________________________
"Ina o le a fausia e Mose le malumalu e avea o se afioaga mo le Atua, na faatonuina
o ia ina ia faia mea uma lava e tusa ai ma le faatusa na faailoa atu ia te ia i luga o le
mauga. . . . Na faapena ona Ia faaalia Lana amio mamalu atoatoa ia Isaraelu, o lē na Ia
finagalo e avea ma Ona nofoaga. O le faatusa na faailoaina atu ia i latou i le mauga ina ua
aumaia le tulafono i Sinai." – The Desire of Ages, pp. 208, 209.
"O i latou uma lava e alolofa ma fiafia e tapua'i ma auauna i le Atua ma fa'atauaina
le fa'amanuiaga o le paia o Lona faatasi mai o le a latou fa'aalia foi le uiga lava lea e tasi o
le fa'ataulaga ofo i le sauniga o se fale o le a Ia fetaia'i ai ma i latou." – Patriarchs and
Prophets, p. 344.
"O le fale e fetaia'i ai Iesu ma Ona tagata e tatau ona mamā ma fetaui. Afai e
to'aitiiti ni tagata talitonu i se nofoaga, fau se fale mamā a ia maulalo, ma o le tu'uina atu o
lena fale i le Atua, valaaulia mai ai Iesu e sau e avea ma au malo fa'aaloalogia." –
Testimonies, vol. 5, p. 269.
b. O le a le fuafuaga a le Atua i taimi uma lava i le sootaga ma Ona tagata? Esoto
29:45; Isaia 57:15.
________________________________________________________________________
"Talu mai lava tausaga o le vavau, o le fuafuaga a le Atua, e tatau ona avea mea ola
uma lava na foafoaina, amata mai lava i serafi pupula ma le paia e o'o lava i le tagata, ia
avea ma malumalu e afio ai i totonu le Atua foafoa." – The Desire of Ages, p. 161.
Aso Gafua Me 11
2. O LE MALUMALU FA'ALELALOLAGI
a. Ina ua maua e Mose le faatonuga ina ia fausia le malumalu, o le a le fuafuaga
na faailoaina atu ia te Ia? Esoto 25:9, 40; Eperu 8:5. O a mea na faatusa uma atu i ai
nei mea? Eperu 8:1, 2.
________________________________________________________________________
"O le fesili lea, O le a le malumalu? O loo taliina manino lava i totonu o le Tusi
Paia. O le upu 'malumalu', e pei ona fa'aaogaina i totonu o le Tusi Paia, o loo faatatau atu,
muamua, i le malumalu lea na fausia e Mose, o se faatusa lea o mea faalelagi; ma, o lona
lua, o loo faatusa atu i le 'malumalu moni' i le lagi, lea sa faasino atu i ai le malumalu
faalelalolagi. I le maliu o Keriso, na muta ai iina le sauniga fa'afaatusa. O le 'malumalu
moni' i le lagi o le malumalu lea o le feagaiga fou." – The Faith I Live By, p. 202.

. Na faapefea ona vaevaeina le falefetafa'i, ma o le a le sauniga na faia ai i totonu
i aso taitasi? Esekielu 45:4; Eperu 9:2-5.
________________________________________________________________________
"O le falefetafa'i na vaeluaina i potu e lua i se ie matagofie lava ma le taugatā, poo
le veli, lea sa tautau mai i pou ufitia i le auro; ma o se veli e faapena foi sa punitia ai le
faitotoa aga’i atu i totonu o le potu muamua. . . .
"I tua atu o le veli o loo i totonu sa i ai le potu sa ta'ua o le potu e sili ona paia, o
iina na fa'aogatotonu atu i ai le sauniga fa'afaatusa o le togiola ma le galuega fa'afautua,
ma na fausia ai le sootaga i le va o le lagi ma le lalolagi. I lenei potu sa i ai le atolaau, o se
pusa na faia i le laau o le setima, na ufitia i le auro i totonu ma fafo, ma o luga o lenei pusa
sa ufitia uma i le auro. Na fausia ina ia avea ma nofoaga mo papa ma'a e lua, lea na tusia
ai e le Atua Poloaiga e Sefulu. O le mafuaaga lea na faaigoaina ai o le atolaau o le
feagaiga a le Atua, poo le atolaau o le feagaiga, ona o Poloaiga e Sefulu o le faavae lea o
le feagaiga i le va o le Atua ma Isaraelu.
"O le ufiufi o le atolaau paia na fa'aigoaina o le nofoa o le alofa. . . .
"I luga o le nofoa o le alofa sa i ai le Pupula o le Atua, o le fa'aaliga lea o le pupula
o le Faatasi mai o le Atua; ma na fa'ailoa mai e le Atua Lona finagalo mai i le va o
kerupi." – Patriarchs and Prophets, pp. 347-349.
Aso Lua Me 12
3. O LE TAULAGA MO LE AGASALA
a. O le a le mea na faia mo tagata agasala na solia ma le lē iloa le tulafono? O le
Faitaulaga: Levitiko 4:2-6; o le faapotopotoga: Levitiko 4:13-15; o se Ta'ita'i:
Levitiko 4:22-24; o tagata lautele: Levitiko 4:27-29.
________________________________________________________________________
"O lea aso ma lea aso na aumaia ai e le tagata agasala ua salamo lana taulaga i le
faitoto'a o le falefetafa'i ma, o lona tuuina o lona lima i luga o le ulu o le manu lē sala, na
ia fa'aali ai ana agasala, na faapena ona fa'atusalia ai le aumaia o ana agasala nai ia te ia i
le manu lē sala. Ona fasimateina lea o le manu. Fai mai le aposetolo, 'A lē o i ai foi se
faamaligiina o le toto, e leai foi se faamagaloina.' 'O le ola o le tino o loo i le toto lea'
(Levitiko 17:11). Na manaomia e le tulafono a le Atua lea ua solia/talepeina, le ola o lē na
solia le tulafono. O le toto, lea e faatusa mai ai le ola ua foa'ieseina atu o le tagata agasala,
lea na tauaveina lana agasala e le manu lē sala, na aveina e le faitaulaga i totonu o le potu
paia ma sausau i luma o le veli, lea e i ai i ona tua le atolaau lea e i ai i totonu le tulafono
na solia e le tagata agasala. O lenei sauniga, na faatusa mai ai le aveina atu o le agasala i
totonu o le malumalu e ala i le toto. I nisi o taimi e le'i aveina atu le toto i totonu o le
nofoaga paia; ae na faatonuina ina ia aina e le faitaulaga le tino o le manu, e pei ona
faatonuina e Mose atalii o Arona, faapea: 'Ua tuuina atu e le Atua ia te outou ina ia outou

tauaveina le agasala a le faapotopotoga' (Levitiko 10:17). O sauniga nei e lua na fa'atusalia
mai ai le aveina atu o le agasala mai i le tagata agasala aga’i atu i totonu o le malumalu.
"Na faapena le galuega na faia, i aso taitasi, i le tausaga atoa. Na faapena ona aveina
atu agasala a Isaraelu i le malumalu, ma na manaomia ai la se galuega faapitoa mo le
aveeseina o le agasala. Na faatonuina e le Atua ina ia faia se togiola mo potu paia taitasi."
– The Great Controversy, pp. 418, 419.
b. O anafea na faatuina ai le fa'atulagaga o faigā taulaga i manu fasia, ma aisea
foi? Kenese 4:3-5; Kalatia 3:19.
________________________________________________________________________
"Ina ua pa'ū le tagata ona o le solia o le tulafono, e le'i suia ai le tulafono, peitai na
faatuina se fa'atulagaga e fai ma fofō ina ia toe aumaia ai o ia i le usitai. Na aumaia se
folafolaga o se Fa'aola, ma na faatuina loa faiga taulaga faia i manu fasia ia na faasino atu
i luma i le maliu o Keriso o Ia lea o le taulaga silisili mo le agasala. Peitai ana lē solia lava
le tulafono a le Atua, semanu e leai lava se oti, ma leai foi se manaomia o se Faaola; o le
iuga na semanu e lē manaomia fua ni taulaga faia i manu fasia." – Patriarchs and Prophets,
p. 363.
Aso Lulu Me 13
4. O LE FAITAULAGA O ASO FAI SO’O
a. O ai na valaauina e le Atua e auauna e avea ma faitaulaga o le malumalu?
Esoto 28:1; 29:4. O le a le faatonuga manino lava na tuuina atu ia i latou? Levitiko
10:9-11.
________________________________________________________________________
"O faitaulaga na fa'amuina mea manogi i luma o le Alii na manaomia i latou ina ia
fa'aaoga le afi na tutuina e le Atua, lea na mumū i le ao ma le po, ma e le'i tapēina lava. Na
tuuina atu e le Atua faatonuga manino lava i le faiga o vaega taitasi uma lava o Lana
auaunaga, ina 'ia fetaui ma Lana amio paia mea uma lava e fesootai ma Lana tapuai'ga
paia. Ma o soo se liliu ese lava mai i faatonuga manino a le Atua i le fesootai atu ma Lana
auaunaga paia, na fa'asalaina lava i le oti." – Temperance, p. 43.
" Na faia e Arona taulaga na manaomia e le Atua ma na fesoasoani ona atalii ia te
ia, ma na ia sii a'e i luga ona lima ma fa'amanuia atu i le nuu. Ua uma ona faia mea uma
lava e pei ona faatonu mai e le Atua, na Ia taliaina le taulaga, ma na Ia fa'aalia Lona
pupula i se uiga mata'utia maoa'e lava; na sau le afi mai i le Alii ma susunu a'i le taulaga i
luga o le fata." – Patriarchs and Prophets, p. 359.
b. Na faafia ona faia taulaga e le faitaulaga? Esoto 29:39. O le a le mea o loo
faatusalia e lenei masaniga i o tatou aso? Salamo 55:17.
________________________________________________________________________

"A'o ulufale atu faitaulaga i le taeao ma le afiafi i le potu paia i le taimi o le
susunuina o le mea manogi, o le taimi foi lena ua sauni ai le taulaga o aso taitasi ina ia
ofoina atu i luga o le fata faitaulaga i totonu o le lotoā i fafo. O se taimi taua tele lenei i
tagata tapua'i na fa'apotopoto i le falefetafa'i. A'o latou le'i ulufale atu i luma o le Atua e
ala i le auaunaga a le faitaulaga, na manaomia i latou ina ia latou matuā su'esu'e lava ma le
finafinau o latou loto ma le fa'aalia o a latou agasala. Na latou au faatasi i tatalo lē leoa ma
o latou foliga na faasaga aga'i atu i le nofoaga paia. Na faapena ona alu a'e fa'atasi a latou
aioiga ma le asu o le mea manogi, a'o taofi mau atu e le faatuatua le amiotonu o le Fa'aola
na folafolaina mai lea na fa'atusalia e le manu na fai a'i le togiola. O itula na faatonuina
mo le taulaga o le taeao ma le afiafi na manatu i ai o ni itula paia, ma na o'o ina tausia nei
itula o ni taimi faatulagaina mo tapuaiga i le malo uma lava o Iutaia. Ma ina ua
fa'ataapeapeina tagata Iutaia fa'atagataotauaina i taimi mulimuli ane i laueleele mamao, na
latou liliu atu pea o latou foliga i le taimi fa'atulagaina i Ierusalema ma avatu a latou
aioiga i le Atua o Isaraelu. O le masaniga lenei o loo maua mai ai e Kerisiano le latou
fa'ata'ita'iga mo le tatalo i le taeao ma le afiafi. A'o inosia e le Atua faasologa o sauniga na
ona faatinoina, e aunoa ma le agaga o le tapua'i, Na te silasila mai ma le fiafia tele lava ia i
latou e alolofa ia te Ia, ma latou ifo atu i le taeao ma le afiafi e saili le fa'amagaloga mo
agasala na faia ma tuuina atu o latou manaoga mo fa’amanuiaga e manaomia." – Ibid., pp.
353, 354.
Aso Tofi Me 14
5. O LE FAITAULAGA SILI
a. O ai na filifilia e le Atua e avea ma faitaulaga sili i le malumalu i le vao? Esoto
29:5-7. O le a le tiute o le faitaulaga sili? Eperu 9:25.
________________________________________________________________________
"E na o le fa'atasi lava i le tausaga ona mafai ona ulufale atu le ositaulaga sili i
totonu o le nofoaga sili ona paia, ina ua mae'a lea ona faia o le sauniuniga sili ona mae'ae'a
ma le fa'aeteete lava. E leai se tagata na mafai ona vaai i le pupula paia mata'utia silisiliese
o lena potu a ua na o le faitaulaga sili lava, auā o le nofoaga faapitoa lava lena o le pupula
vaaia o le Atua. Na ulufale atu i ai le faitaulaga i tausaga taitasi uma lava e ulufale atu ai i
totonu, ma le gatete tele, a'o fa'atali atu ma le fifilemu tagata i lona toe fo'i mai." – The
Spirit of Prophecy, vol. 1, pp. 274, 275.
b. A'o auauna le faitaulaga sili i totonu o le potu sili ona paia i le Aso o le Togiola,
o le a le mea na faatonuina tagata ina ia latou faia? Levitiko 23:27-32. O anafea na
amata ai le Aso o le Togiola i le lagi? Tanielu 8:14; Isaia 22:12-14, 20-22 (fesootai
Fa'aaliga 3:7, 8).
________________________________________________________________________

"I le 1844 na ulufale atu ai lo tatou Faitaulaga Sili i le nofoaga sili ona paia o le
malumalu fa'alelagi, e amata le galuega o le fa'amasinoga su'esu'e. . . . Ina o faia e le
faitaulaga sili le galuega o le togiola i totonu o le nofoaga sili ona paia o le malumalu i le
lalolagi, na manaomia tagata ina ia latou puapuagatiaina e i latou i latou lava i luma o le
Atua, ma fa'aali a latou agasala, ina ia togiolaina a latou agasala ma soloiesea. E i ai ea se
mea e itiiti ifo o le a manaomia mai ia i tatou i lenei aso moni o le togiola, a'o aioi atu
Keriso i totonu o le malumalu i lugā mo Ona tagata, ma o le a fetalaia mai ai loa le
filifiliga mulimuli e lē mafai ona suia i tagata taitoatasi uma?" – Selected Messages, bk. 1,
p. 125.
Aso Faraile Me 15
FESILI TOE FAAMANATU
a. O a fa'amanuiaga e o'o mai i le mauaina o se Atua e auauna i ai i le malumalu?
b. Na vaaia e Mose se ata o le amio a le Atua (o Poloaiga e Sefulu) ma se ata o
Lona afioaga. O faapefea ona fesoota'i vaega nei e lua?
c. Na faapefea ona faia fa'asologa o sauniga fai ata i Isaraelu anamua, ma o
faapefea ona faia i le taimi lenei?
d. O le a le mea e tupu pe afai tatou te fa'atalale e fai le tapuaiga o le taeao ma le
afiafi?
e. Aisea e taua ai le malamalama i le Aso o le Togiola?
Lesona 8 Sapati, Me 23, 2009
O Le Aso O Le Togiola
"O le aso lona sefulu o lea masina lona fitu o le aso o le togiola lea, o le
faapotopotoga paia lea ia te outou; ia puapuagatia ai outou e outou, ma avatu ai se
taulaga e fai i le afi ia Ieova" – (Levitiko 23:27).
"E fa'atasi i le tausaga, i le Aso tele o le Togiola, ona ulufale atu ai le faitaulaga i
totonu o le potu sili ona paia mo le fa'amamāina o le malumalu. O le galuega lea na faia ai
iina, na fa'amae'aina atoa ai le fa'asologa o auaunaga o le tausaga atoa." – Patriarchs and
Prophets, p. 355.
Faitauga Fautuaina: The Great Controversy, pp. 479-491.
Ulua'i Aso Me 17

1. TOGIOLA MO LE AGASALA
a. O le a le fuafuaga alofa na faia ina ia togiola ai le agasala a Atamu? Kenese
3:15, 21.
________________________________________________________________________
"O le taimi lava na gaua'i ai Atamu i le fa'aosoosoga a Satani ma na ia faia ai le mea
tonu lava lea na fetalai mai le Atua e lē tatau ona ia faia, na tula'i ai loa Keriso, le Alo o le
Atua i le va o ē ola ma ē oti ma fetalai faapea: 'Ia pa'ū mai i luga ia te A'u le fa'asalaga. O
le a Ou tula'i i le tulaga o le tagata. Avatu ia te ia se isi avanoa.' O le solitulafono na tuuina
ai le lalolagi atoa lava i lalo o le fa'asalaga o le oti. Peitai i le lagi, na faalogoina ai se leo o
faapea mai, 'Ua Ou maua se tau/togiola' (Iopu 33:24). O Lē na lē iloa le agasala na faia o
Ia ma agasala mo le tagata pa'ū." – The Signs of the Times, June 27, 1900.
b. O le a le fa'atulagaga na filifilia e le Atua, ma o le a se lagona o Atamu ina ua
faatonuina o ia e tatau ona ia fasimatea le manu muamua lava mo le agasala?
________________________________________________________________________
"A'o fasi mate e [Atamu] le manu lē sala, na ia gatete i lona iloaina o lana agasala o
le a faamaligiina ai le toto o le Tama'i Mamoe a le Atua e leai Sana agasala. O lenei
vaaiga na avatu ai ia te ia se lagona sili atu ona loloto ma sili atu ona manino o le telē tele
o lana solitulafono lea e leai lava se isi auala a ua na o le maliu o le Alo pele o le Atua e
mafai ona togiola ai." – Patriarchs and Prophets, p. 68.
Aso Gafua Me 18
2. O LE AUAUNAGA O ASO TA'ITASI
a. O le a le tiute i aso taitasi o le faitaulaga o aso taitasi i totonu o le malumalu?
Numera 28:4; Eperu 10:11.
________________________________________________________________________
"O le auaunaga o le malumalu i le lalolagi e lua ona vaega; na auauna faitaulaga i
aso taitasi i totonu o le nofoaga paia, ae fa'atasi i le tausaga na faia ai e le faitaulaga sili se
galuega faapitoa lava o le togiola i totonu o le nofoaga silisili ona paia, mo le fa'amamāina
o le malumalu. O lea aso ma lea aso na aumai ai e le tagata agasala ua salamo lana taulaga
i le faitoto'a o le falefetafa'i ma, o lona tuuina o ona lima i luga o le ulu o le manu lē sala,
na ia fa'aaliina ai ana agasala, na fa'apena ona fa'atusa mai ai le aveina atu o ana agasala
mai ia te ia i le manu lē sala. Ona fasi mate loa lea o le manu." – The Great Controversy,
p. 418.
"O taeao ma afiafi taitasi uma lava na susunuina ai se mamoe e tasi lona tausaga i
luga o le fata, fa'atasi ai ma ona taulaga fetaui o meaai, na fa'apena ona faatusa mai ai le
tuuina atu atoatoa o le malo i aso taitasi ia Ieova, ma lo latou faalagolago atu i taimi uma

lava i le toto o Keriso e togiolaina ai. Na faatonu manino mai lava e le Atua o taulaga uma
lava e tuuina atu mo le auaunaga o le malumalu e 'lē tatau ona i ai se ila poo se pona'
(Esoto 12:5). Na faatonuina le au faitaulaga ina ia latou iloiloina uma manu na aumaia e
avea ma taulaga fasia ma na faatonuina i latou ina ia latou teena manu uma lava na maua
ai se mea leaga lava e tasi." – Patriarchs and Prophets, p. 352.
b. A'o le'i ulufale atu le au faitaulaga i totonu o le malumalu, o le a le mea na
fa'au'uina i latou e latou te faia? Esoto 30:18-21; 40:30-32.
________________________________________________________________________
"Sa i le va o le fata faitaulaga ma le faitotoa o le falefetafa'i le tanoa vai, na faia foi i
le apa memea, na faia mai i fa'ata na ofofuaina mai e fafine o Isaraelu. Na faatonuina le au
faitaulaga ina ia latou fufuluina o latou lima ma o latou vae i soo se taimi lava na latou ulu
atu ai i totonu o potu paia, poo le fa'alatalata atu foi i le fata ina ia faia se taulaga mu i le
Alii." – Ibid., pp. 347, 348.
"E le'i fa'atagaina la faitaulaga e ulufale atu i totonu o le malumalu ma seevae i o
latou vae. O le pefu e pipii atu ia i latou o le a fa'aleagaina ai le nofoaga paia. Na
faatonuina i latou ina ia tuua o latou seevae i le lotoā a'o le'i ulufale atu i le malumalu, ma
ia fufulu foi o latou lima ma o latou vae a'o latou le'i auauna i totonu o le malumalu poo le
auauna foi i le fata e susunu a'i taulaga mu. Na faapena ona a'oa'oina i taimi uma lava le
lesona, o mea leaga ma agasala uma lava e tatau ona tuueseina mai ia i latou o le a
fa'alatalata atu i luma o le Atua." – Ibid., p. 350.
Aso Lua Me 19
3. O LE NOFOAGA E SILI ONA PAIA
a. O le a le mea lea na vaeluaina ai potu e lua, ma o le a foi le mea na tuuina i
totonu o le nofoaga e sili ona paia? Esoto 26:31-34; Eperu 9:3-5.
________________________________________________________________________
"O le ie matagofie lava lea na faia a'i le taualuga, sa teuteuina i ata o agelu i le lanu
moana ma le lanu violē ma le lanu moli-mumū, faaopoopo i le matagofie o le vaaiga. Ma
o tua atu o le veli lona lua sa i ai le Pupula paia, o le fa'aaliga vaaia lea o le mamalu o le
Atua lea e leai lava se isi a ua na o le faitaulaga sili na mafai ona ulufale atu i ai ma ola
pea." – The Great Controversy, p. 414.
"O meāfale uma lava o lenei potu [muamua] na foliga mai o ni auro sili ona mamā
ma na lafoia mai ai le ata o lē na ulufale atu i lena nofoaga. O le ie lea sa vaeluaina ai nei
nofoaga e lua na matuā matagofie lava. Sa eseese ona lanu ma mea na faia a'i, faatasi ai
ma se laina tuaoi matagofie lava, o ata auro na galuea'iina ai, na faatusa mai ai agelu." –
Spiritual Gifts, vol. 1, p. 159.

. Na faapefea ona fa'aalia e le Atua Lona faatasi mai i le lotolotoi o le fanauga a
Isaraelu, aemaise ai lava le falefetafa'i? Esoto 40:34, 35; Levitiko 16:2.
________________________________________________________________________
" O totonu i tua atu o le veli lona lua sa tuuina ai le ato laau o le molimau, ma o le ie
matagofie lava ma le tamaoaiga i ona teuteuga uma lava sa tautau i luma o le atolaau paia.
O lenei ie e le'i o'o a'e i luga o le taualuga. O le pupula o le Atua lea na i luga a'e o le
nofoa o le alofa, na mafai ona vaaia mai i nofoaga paia uma e lua, peitai na itiiti ifo le
vaaia o lona pupula tele mai i le potu muamua. O luma tonu lava o le atolaau, ae na
vaeluaina e le veli poo le ie, sa i ai le fata auro o le mea manogi. O le afi i luga o lenei fata
sa tŭtŭina e le Alii lava Ia, ma na tausia faapaiaina e ala i le fafagaina i mea manogi paia,
lea na fa'atumuina ai le malumalu i asu o lona manogi i le ao ma le po. O lona manogi na
o'o atu lona sasala i le tele o maila faataamilo i itu uma o le malumalu. Ina o ofoina e le
faitaulaga le mea manogi i luma o le Alii na ia vaavaai atu i le nofoa o le alofa. E ui lava
ina e le'i mafai ona ia vaai atu i ai i le nofoa o le alofa, ae na ia iloa o loo i ai iina; ma a'o
alu a'e la le mea manogi e pei o se asu, ona afio ifo lea o le pupula o le Alii i luga o le
nofoa o le alofa ma fa'atumuina ai le potu e sili ona paia ma na vaaia foi i totonu o le potu
paia; ma na masani lava ona fa'atumuina e le pupula o Ieova potu uma e lua o lea na lē
mafai ai ona auauna le faitaulaga ma na una'iina ai o ia ina ia tula'i i le faitotoa o le
falefetafa'i." – The Spirit of Prophecy, vol. 1, pp. 273, 274.
"I luga o le atolaau, ma sa fausia ai le ufiufi o le atolaau paia, o le nofoa lena o le
alofa, o se fausaga matuā matagofie lava, sa i ai i luga kerupi e to'a lua, tasito'atasi i itu
ta'itasi, ma sa faia atoa lava i le auro atoa. O totonu o lenei potu na fa'aalia ai le pupula o
le faatasi mai o le Atua i le ao o le pupula i le va o kerupi." – The Great Controversy, p.
412.
Aso Lulu Me 20
4. O LE GALUEGA A LE FAITAULAGA SILI
a. O le a le mea taua lava na faia i le aso lona sefulu o le masina lona fitu?
Levitiko 16:29-31; Numera 29:7.
________________________________________________________________________
"Na fa'atasi i le tausaga, i le Aso o le Togiola, ona ulufale atu ai le faitaulaga i le
potu silisili ona paia mo le fa'amamāina o le malumalu. O le galuega lea na faia ai iina na
fa'amae'aina pe na fa'aatoatoaina ai le auaunaga i tausaga taitasi." – The Spirit of
Prophecy, vol. 4, p. 263.
"I lalo o le fa'atulagaga o le faatinoga o tulafono i le taimi o Mose, o le fa'amamāina
o le malumalu, poo le Aso tele lea o le Togiola, na faia i le aso lona sefulu o le masina
lona fitu fa'aIutaia (Levitiko 16:29-34), ina ua ulufafo mai le faitaulaga sili ma fa'amanuia
i le nuu ina ua uma ona faia o le togiola mo Isaraelu uma, ma faapena ona aveesea ai a
latou agasala mai i le malumalu." – The Great Controversy, p. 400.

. A'o le'i ulufale atu i totonu o le nofoaga sili ona paia, o le a le mea na
faatonuina le faitaulaga sili na te faia? Levitiko 16:2-6, 16.
________________________________________________________________________
"Na talanoa le Atua ma le faitaulaga sili i luma o le nofoa o le alofa. Afai e i ai o ia
i totonu o le nofoaga sili ona paia i se taimi e sili atu nai lo le taimi masani, na masani lava
ona matuā fefefe le nuu, ma latou matata'u ai po ua fasia e le Alii le faitaulaga ona o a
latou agasala poo ni agasala foi a le faitaulaga. Peitai ina ua fa'alogoina le leo o le tagitagi
mai o logo i ona ofu, na latou matuā fiafia lava. Na ia sau loa i fafo ma faamanuia le nuu."
– The Spirit of Prophecy, vol. 1, p. 275.
"O A'U O LĒ OLA, O LOO OLA LAVA sa afio i totonu o le potu sili ona paia, ma
e le'i i ai se tagata ola na fa'atagaina e ulufale atu i ai iina seivagana ua fa'atagaina mai e le
Atua. O iina, i luga o le nofoa o le alofa, lea sa fa'amalumalu ifo i ai apaau o kerupi, na
afio ai le pupula o Lona mamalu, le fa'ailoga e faavavau lea o Lona faatasi mai; a'o le
ufifatafata o le faitaulaga sili lea na i ai ma'a taua, na fa'ailoa mai ai mai i nofoaga paia o
le malumalu feau taua a Ieova mo le nuu. Se fa'aaliga ina a matuā matagofie, ina ua
fa'apena ona fa'aalia e le Atua Paia Lona mamalu, o Lē na Foafoaina lagi ma le lalolagi,
ma fa'aalia ai Lona finagalo i le fanau a tagata!" – The Review and Herald, March 2,
1886.
Aso Tofi Me 21
5. O ‘OTI E LUA
a. O le a le uiga o ‘oti e lua na aumaia i le Aso o le Togiola, ma o le a le mea na
faia i le ‘oti na filifilia e avea ma taulaga mo le agasala? Levitiko 16:7, 8, 16.
________________________________________________________________________
"I le Aso o le Togiola na aumaia ai tama'i oti e lua i le faitoto'a o le falefetafa'i, ona
faia ai lea ia i la'ua o le vili, 'o le tasi vili mo le Alii, ma le isi foi vili mo le oti o le a tuu
atu e alu' (Levitiko 16:8). O le oti na pa'ū i ai le vili mo le Alii, na fasia e avea o se taulaga
mo le agasala mo le nuu." – The Great Controversy, p. 419.
b. O le a le mea na tupu i le oti lea na filifilia e tuu atu e alu – Asaseli – lea e le'i
fasia? Levitiko 16:20-22. O a mea na faatusalia mai e oti taitasi nei e lua?
________________________________________________________________________
"O le galuega a Keriso mo le fa'aolataga o tagata ma le fa'amamāina o le vateatea
mai i le agasala o le a fa'amae'aina i le aveesea o le agasala mai i le malumalu i le lagi ma
le tuuina atu o nei agasala i luga o Satani, o lē o le a tauaveina le fa'asalaga mulimuli." –
Patriarchs and Prophets, p. 358.

"Ina ua mae'a le auaunaga i totonu o le potu sili ona paia, ma ua aveesea mai
agasala a Isaraelu mai i le malumalu e ala i le toto o le taulaga mo le agasala, ona tuuina
ola atu loa lea o le ‘oti lea e tuu atu e alu, i luma o le Alii. . . . O le a faapena foi, a mae'a
loa le galuega o le togiola i totonu o le malumalu i le lagi, ona tuuina atu loa lea o agasala
a tagata o le Atua i luga o Satani i luma o le Atua ma agelu o le lagi ma le 'au uma o le au
fa'aolaina; o le a fa'aalia manino lona agasala i mea leaga uma na ia faaosoina i latou e
latou te faia. Ma e faapei la ona auina atu le oti e tuu atu e alu i se laueleele tuufua, o le a
faapena foi ona tuliina atu Satani i le lalolagi fa'atafunaina, ma le vao matua lē ainā ma le
tu'ulafoa'iina." – The Great Controversy, p. 658.
Aso Faraile Me 22
FESILI TOE FA'AMANATU
a. Fa'amatala le togiola i faatusa ma le mea moni.
b. Ta'u mai ni mea moni e faailoa mai ai le paia tele o auaunaga o le malumalu.
c. O le a le mea sa i totonu o le potu poo le nofoaga lona lua o le falefetafa'i, le
potu sili ona paia?
d. O le a le mea o loo fa'aalia ai le alofa tunoa tele o le Atua i totonu o le sauniga
poo auaunaga o le falefetafa'i?
e. O ai na fa'atusalia e ‘oti e lua?
Lesona 9 Sapati, Me 30, 2009
Fa'aipoipoga – o se Sauniga Fa'alelagi
"O le mea lea e tuua ai e le tane lona tamā ma lona tinā, ae faatasi ma lana
avā; ona avea ai lea o i la'ua ma tino e tasi" (Kenese 2:24).
"A'o tuufa'atasia e le Atua Foafoa lima o le ulugalii paia i le fa'aipoipoga, ma faapea
atu, O le a 'tuua e le tane lona tamā ma lona tinā, ma o le a fa'atasi atu i lana avā: ma o le a
avea ai i la'ua ma tino e tasi' (Kenese 2:24), na Ia fa'amatala manino mai ai lava le
tulafono o le fa'aipoipoga mo fanau uma lava a Atamu seia o'o i le i'uga o le taimi." –
Thoughts From the Mount of Blessing, pp. 63, 64.
Faitauga Fautuaina: Thoughts From the Mount of Blessing, pp. 63-65.
Ulua'i Aso Me 24
1. NA FA'AVAEINA E LE ATUA LE FA'AIPOIPOGA

a. Ina ua uma ona fa'aigoaina e Atamu manu uma lava, o le a le mea na tupu?
Kenese 2:18, 21, 22. O le a le finagalo o le Atua i le faaipoipoga? Eperu 13:4.
________________________________________________________________________
"O le Atua na faia le ulua'i fa'aipoipoga lava. O loo faapena ona avea ai le Atua
Foafoa o le vateatea ma tupuga o lea sauniga. . . . A amanaia ma usitaia tapulaa fa'alelagi i
lenei sootaga, o le fa'amanuiaga la le fa'aipoipoga; e puipuia ai le mamā ma le fiafia o le
aiga tagata, e maua ai e le tagata ona manaoga i lona sootaga ma le isi tagata, e siitia ai le
natura fa'aletino, fa'alemafaufau, ma le natura fa'aleagaga." – Patriarchs and Prophets, p.
46.
b. O le a le uiga o le foafoaina o Eva mai i le ivi asoaso o Atamu? Efeso 5:22-24;
Kolose 3:18.
________________________________________________________________________
"Na foafoaina Eva mai i se ivi asoaso na aumaia mai i le itu o Atamu, o loo fa'ailoa
mai ai e lē tatau ona ia(Eva) puleaina o ia (Atamu) e peiseai o ia o le ulu, e lē tatau foi ona
solia o ia i lalo i vae e peiseai o ia o se tagata e maulalo ifo nai lo ia (Atamu), peitai 'ia tula'i
o ia i ona autafa e tutusa ma ia, ina ia alofagia ma puipuia e ia. Talu ai ona o ia o se vaega
o le tane, o le ivi o ona ivi, ma le aano o lona aano, o ia o lona tino lona lua, o loo fa'ailoa
mai ai le sootaga vavalalata lava ma le piitaga alofa e tatau ona i ai i totonu o lenei
sootaga." – Ibid., p. 46.
Aso Gafua Me 25
2. O SE TAIMI O LE OLIOLI
a. O le a se mea na tupu e fa'ailoa mai ai na ioeina e le Alii le sauniga o le
fa'aipoipoga? Ioane 2:1, 2.
"Na afio mai Keriso i lo tatou lalolagi ina ia fa'asusulu mai le malamalama o le lagi
i le lotolotoi o le pogisa fa'aleagaga. Na Ia afio mai ina ia fa'amalamalamaina tane/alii ma
fafine/tama'ita'i ina ia latou iloa o le fa'aipoipoga e paia. O Lona i ai i Kana na tuuina atu
ai se ioega maualuga lava i lenei sauniga." – Manuscript Releases, vol. 10, p. 188.
"E le'i afio mai Keriso ina ia fa'aumatia lenei sauniga [paia], a ia toe fa'afoisia lenei
sauniga i lona ulua'i tulaga paia ma le maualuga sa i ai. Na Ia afio mai ina ia toe fa'afoisia
le faatusa paia o le Atua i totonu i le tagata, ma na Ia amataina Lana galuega e ala i le
lagolagoina o le sootaga o le faaipoipoga. O Lē na faia le ulua'i ulugalii, ma na Ia
foafoaina mo i la'ua se parataiso, ua Ia tuuina Lana faailoga i le faaipoipoga, lea na ulua'i
faia i Etena." – Ibid., p. 203.
"O le Feagaiga Tuai ma le Feagaiga Fou o loo fa'aaogaina ai le sootaga
fa'alefa’aipoipoga e faatusa mai ai le sootaga alofa ma le paia o loo i ai i le va o Keriso ma

Ona tagata, o le au faaolaina ia o ē na Ia faatauina i Lona soifua i Kalevario." – Thoughts
From the Mount of Blessing, p. 64.
b. O le a le faamatalaga a le Tusi Paia e faatatau i se aiga fiafia? Salamo 128.
________________________________________________________________________
"O loo fai mai mau o le Tusi Paia o Iesu ma Ona soo na valaauliaina i le faigaai o le
faaipoipoga [i Kana]. E le'i tuuina mai e Keriso se fa'atagaga i Kerisiano mo lo latou
faapea mai, pe a valaauliaina i latou i se faaipoipoga, E lē tatau ona tatou auai i se sauniga
matuā fiafia faapea. O Lona auai i lenei faigaai na a'oa'o mai ai Keriso ia i tatou Na te
finagalo ia i tatou ina ia tatou olioli faatasi ma i latou o loo olioli i le tausiaina o Ana
poloaiga. Na te le'i faitioina lava fiafiaga a tagata ina o faia e tusa ai ma tulafono a le Lagi.
O se faapotopotoga na fa'amamaluina e Keriso e ala i Lona auai ai, e sa'o foi pe a ö i ai
Ona soo. Ina ua uma ona Ia auai i lenei tausamiga, na faatasi atu Keriso i isi tausamiga e
tele, ma fa'apaiaina ai nei faatasiga e ala i Lona auai ai ma Ana faatonuga." – The Signs of
the Times, August 30, 1899.
"'Afai o lo tatou fiafiaga e maua i lo tatou fa'afiafiaina o isi, tatou te fiafia moni ai
foi. O le so'o moni o le a lē ola ina ia fa'amalieina ia lava, peitai e ola mo Keriso, ma le
lelei o ona uso a tagata. E tatau ona ia fa'asatauroina lona olaga faafifilemu, o ona fiafiaga,
o lona olaga faafifilemuina o ia, o mea o loo fetaui ma ia, o lona lava loto, ma ona lava
manaoga faapito mo le galuega a Keriso, poo lona lē nofo tupu lava faatasi ma Ia i luga o
Lona nofoalii.'" – Testimonies, vol. 1, pp. 85, 86.
"O le faaipoipoga, o se sootaga lea e faia mo le olaga atoa, o se faatusa lea o le
sootaga i le va o Keriso ma Lana ekalesia. O le uiga o loo faailoa mai e Keriso i le
ekalesia, o le uiga lea e tatau ona fa'aalia e le tane ma le fafine e le isi i le tasi." – Ibid.,
vol. 7, p. 46.
Aso Lua Me 26
3. O LE TIUTE O LE TANE
a. O le a le mea ua faatonu mai e le Tusi Paia i le tane, le "fusi o le aiga”? Efeso
5:25, 28; Kolose 3:19.
________________________________________________________________________
"Ua faia e le Alii le tane le ulu o le avā ina ia avea ma lē na te puipuia o ia; o ia o le
fusi o le aiga, ma fusia faatasi ai tagata o le aiga. . . . O le pule a Keriso e faia i le poto, i le
agalelei uma lava ma le agamalu; ia faia la e le tane lana pule ma fa'ata'ita'i i le Ulu tele o
le Ekalesia." – The Faith I Live By, p. 259.
b. Ta'u mai uiga sa'o e fa'atusatusa atu i uiga sese i se tane ma se tamā. Kenese
18:18, 19; Efeso 6:4; Eperu 12:7-9.
________________________________________________________________________

"E tatau ona fa'amalosia e le tamā i totonu o lona aiga uiga sili atu ona mausali –
malosi, faamaoni, onosa'i, loto tele, finafinau vilivilita'i, ma le aoga fa'atinoina. Ma o le
mea na te manaomia mai i lana fanau e tatau ona faatino muamua e ia lava, ma fa'aataina
atu ai nei uiga lelei i ona lava uiga fa'atane." – The Ministry of Healing, p. 391.
"E le'o se fa'amaoniga o le avea ma tane i le tane poo le tamā lona tautala ma lona
manatunatu i taimi uma i lona tulaga o le avea o ia ma ulu o le aiga. E lē fa'atuputeleina ai
le fa'aaloalo mo ia i le fa'alogo atu o ia sii mai mau o le Tusi Paia ina ia lagolagoina ai ana
fa'aupuga i lona mana'o i le pule. O le a lē faia ai o ia ma tane i se tulaga sili atu i lona
mana'o i lana avā, le tinā o lana fanau, ina ‘ia ia faia ana fuafuaga e peiseai o ana fuafuaga
e sa'o atoatoa." – Manuscript Releases, vol. 13, p. 82.
"O le tele ma tele o tane latou te lē malamalama atoa ma latou te lē fa'atāuaina
popolega ma faigata o loo onosa'ia e a latou avā, o loo galulue i galuega masani i le aso
atoa lava i ni fa'asologa e lē mafa'amutalia o tiute fa'aleaiga. E masani lava ona latou o
mai i o latou aiga ma muaulu fa'anunumi mai, ma lē aumaia ai se fiafia i le li'o o le aiga. A
lē vela le meaai i le taimi na te mana'o ai, ua fa'afeiloa'ia loa le avā vaivai ma le lē lavā lea
e avea i taimi uma ma tagata tapena fale, foma'i, kuka, auauna, tiute uma lava na te faia
to'atasi, i upu su'esu'e masei. O le tane pule fa'amalosi e mafai ona ia fa'amaulalo ifo ina ia
na avea le tamaitiiti popole mai i lima vaivai o lona tina ina ia fa'avave ai fuafuaga a le
tina mo le meaai a le aiga; peitai a lē filemu ma lē onosai le tamaititi i lima o lona tamā, o
le a seāseā ona ia lagona o sona tiute le avea o ia ma foma'i ma saili ai e fa'afilemu le
tamaitiiti. Na te lē nofo ina ia manatunatu i le tele o itula na onosa'i ai le tina i le lē filemu
ma le tagi o le tamaititi, peitai na te valaau atu ma le lē onosa'i, 'Ia, Tina, ave lau tama.' E
lē o tamaitiiti ea o lona atalii/afafine e pei foi ona avea ma tama a le tina? E lē o ia i ai ea i
lalo o se tiute fa'alenatura ina ia tauave ma le onosai lana vaega o le avega i le tausiga o
lana fanau?" – The Adventist Home, pp. 224, 225.
Aso Lulu Me 27
4. O LE MASIOFO O LE AIGA
a. O faapefea ona faamatala e le Tusi Paia se avā Kerisiano moni amio lelei?
Fa'ataoto 18:22; 19:14; 31:10, 11, 30.
________________________________________________________________________
"O le tane o le ulu ia o le aiga, e pei o Keriso o Ia o le ulu o le ekalesia; ma soo se
mea lava e ono faia e le avā e fa'aitiitia ai le aafiaga o le tane ma ta'ita'ia ai o ia ina ia alu
ifo i lalo mai i lena tulaga mamalu o matafaioi, e lē o fiafia mai i ai le Atua. O le tiute o le
avā lona gaua'iina atu o ona faanaunauga i lana tane. O i la'ua uma e to'alua e tatau ona
gaua'i le tasi i le tasi, peitai o le Upu a le Atua ia fa'asilisiliina lea nai lo le manatu o le
tane. Ma o le a lē avea o se tulaga ua toesea mai i le tiute o le avā lona gaua'i atu ia te ia o
lē ua ia filifilia e avea ma ona fautua, ma sē e puipuiina o ia." – Testimonies, vol. 1, pp.
307, 308.

"O le toatele o tane e fa’agata le latou faitau i upu ia, 'O outou avā, ia outou gaua'i i
a outou tane,' peitai o le a tatou faitauina le atoaga o le faatonuga lava lea e tasi, fai mai, 'E
pei ona tusa ai ma le finagalo o le Alii.'" – Manuscript Releases, vol. 13, p. 74.
b. O le a le faatonuga ua tuu mai e le Alii i le masiofo o le aiga? 1 Peteru 3:1, 2;
Filipi 2:14.
________________________________________________________________________
"A'o faia ma le maoti e le tina o loo puleaina le faagaioiga o le aiga, ona tiute i le
vaaiga i fafo, atonu o loo ia alaga a’e i taimi uma i le galuega pologa ua tuuina i ai o ia,
ma fa'atelēina ai ona matafaioi ma ona tiute ua taofia ai o ia, e ala i le fa'atusalia o lona
tiute ma le tiute lea ua ia manatu o le olaga sili atu lea ona maualuga o le fafine, ma
teufatuina ai faanaunauga lē paia mo se tiute sili atu ona faigofie, e saoloto mai i popolega
i mea e lē tāua ma galuega e fa'amalosia atu ia te ia e tiga ai lona agaga. Na te lē iloa o
lena tulaga o gaioiga ese lava ua ia faanaunau i ai, o tofotofoga ia e matuā tumu i mea e
tiga ai, e ui lava ina atonu e ese ona faigata, ae o le a osofaia mautinoa ai lava o ia. A'o ia
faanaunau ma le lē fa'amanuiaina mo se olaga e ese atu, o loo ia fafagaina ai se uiga
agasala o le lē malie ma ia faia ai lona aiga o se nofoaga matuā lē fiafia lava mo lana tane
ma lana fanau.
"O le avā moni lava ma le tina o le a ia mulimuli i se filifiliga e matuā fa'afeagai
lava ma lenei uiga. O le a ia faatinoina ona tiute ma le fa'atāuaina o lana galuega ma le
fiafia, ma o le a ia lē manatu ai o se galuega maulalo le faia i ona lava lima o soo se mea
lava e manaomia na te faia i totonu o se aiga e pulea lelei. Afai na te vaavaai i le Atua mo
lona malosi ma le faamafanafanaga, ma saili i Lona poto ma le mata'u ia te Ia ina 'ia ia
faia lona tiute o aso taitasi, o le a ia fusia atu lana tane i lona loto, ma vaai atu i lana fanau
o matutua a'e, o ni tane ma ni fafine fa'amamaluina, e i ai o latou malosi o le amio e
mulimuli ai i le fa'ata'ita'iga a lo latou tina." – The Health Reformer, August 1, 1877.
Aso Tofi Me 28
5. O SE SOOTAGA O LE OLAGA ATOA
a. E tusa ai ma le upu a le Atua, o le a le umi e fusia ai e le ta'utinoga o le
fa'aipoipoga le tane ma le avā? Mareko 10:6-12; Roma 7:1-3; 1 Korinito 7:39.
________________________________________________________________________
"O lenei tautoga o le [fa'aipoipoga] e fesootaia ai iuga o tagata e to'alua i fusi e na o
le oti lava e mafai ona motusiaina." – Testimonies, vol. 4, p. 507.
Ae faapefea le sootaga o le faaipoipoga i le taimi lenei? E lē ua fa'auigaseseina ea
ma faaleagaina, ma ua faia e faapei lava ona i ai i ona po o Noa? O le tatalaina o lea
faaipoipoga ma le tatalaina o lea faaipoipoga o loo ua tusitusia i nusipepa i aso taitasi. O le
faaipoipoga lenei o loo fetalai aga'i i ai Keriso ina ua Ia fetalai mai a'o le'i o'o i le Lolo sa

latou 'fa'aipoipo ma tuuina atu i faaipoipoga' (Mataio 24:38)." – Manuscript Releases, vol.
7, p. 56.
b. Afai e i ai se tulaga lē lelei o le tete'a poo le nonofo eseese o le tane ma le avā, o
a auala e lua e mafai ona faia? Malaki 2:13-16; 1 Korinito 7:10, 11.
________________________________________________________________________
"Na afio mai Iesu i lo tatou lalolagi ina ia toe fa'asa'o amioga sese a le [tagata] ma ia
toe fa'afo'i le faatusa o le amio a le Atua i totonu i le tagata. O manatu sese e faatatau i le
faaipoipoga na maua sona nofoaga i totonu o mafaufau o faia'oga o Isaraelu. Na latou
fa'alēaogaina le sauniga paia o le faaipoipoga. Na matuā fa'ama'a'aina lava le loto o le
tagata o lea na ia manao ai e tete'a ma lona to'alua ona o se mafuaaga e matuā itiiti lava e
lē tāua. . . .
"Na afio mai la Keriso e fa'asa'o nei uiga leaga, ma o Lana vavega muamua lava na
faia i le taimi o le fa'aipoipoga. Na faapena ona Ia fa'ailoa atu ai i le lalolagi, o le
faaipoipoga, a faatumauina i le tulaga mamā, lē fa'aleagaina, o se sauniga paia lea." –
Ibid., vol. 10, p. 198.
Aso Faraile Me 29
FESILI TOE FA'AMANATU
a. O faapefea ona fa'amatalaina e le Tusi Paia le foafoaina o le fafine?
b. O le a le taimi lava e tasi e mafai ai ona avea le faaipoipoga o se taimi olioli
moni lava – ma aisea foi?
c. E faapefea ona mafai e se tane ona faaleleia atili lana sootaga ma lana avā?
d. E faapefea ona mafai e se avā ona faaleleia atili lana sootaga ma lana tane?
e. O le a le faamaoniga e iloa ai na fuafuaina e le Atua i Lona poto le faaipoipoga
ina ia avea o se ta'utinoga o le olaga atoa?
Lesona 10 Sapati, Iuni 6, 2009
O le Aiga Kerisiano
“Ina ia avea o matou atalii e pei o laau totō, ua tupu tele a’o talavou i latou, ina
ia avea o matou afafine e pei o ni ma’a tulimanu ua fa’amatagofieina e pei o se
maota” (Salamo 144:12).
"O le fa'amaoniga silisili lava o le malosi o le Faakerisiano e mafai ona faailoa atu i
le lalolagi, o se aiga lea e faatulaga lelei a'oa'iina ma usiusita'i. O lenei faamaoniga o le a
lagolagoina ai le upu moni i se auala e lē mafai e se isi lava auala ona lagolagoina; auā o

se molimau ola lea o le malosi faatinoina o le upu moni i le loto." – Testimonies, vol. 4, p.
304.
Faitauga Fautuaina: Child Guidance, pp. 318-325, 434-443.
Ulua'i Aso Me 31
1. O SE TAMA'I LAGI I LUGA O LE LALOLAGI
a. O le auala e maua ai se aiga fiafia, o le a le faatonuga ua aumaia e le Upu a le
Atua i luga o tane ma avā? 1 Korinito 7:3, 4; Kalatia 6:2; Efeso 5:33.
________________________________________________________________________
"Aua lua te taumafai e fa'amalosi e le tasi le isi ina ia faia le mea e te lua manana'o
ta’ito’atasi i ai. E lē mafai ona oulua faia lenei mea ma lua faatumau ai pea lo lua alofa o
le tasi i le isi. O le fa'aalia o le loto ma'a'a loto malosi e fa'aumatia ai le filemu ma le fiafia
o le aiga. Aua ne'i avea lo lua aiga faaipoipo o se aiga fefinaua'i. Afai lua te faia o le a
oulua lē fiafia uma. Ia agalelei i le tautala ma alofa i gaioiga, ma lafoa'ia ai oulua lava
manaoga. Ia matuā fa'autauta lava i a oulua upu, auā e matuā malosi lava lo latou aafiaga
mo le lelei poo le leaga foi. Aua ne'i fa'atagaina se leo ma'ai e o'o mai i o oulua leo. Ia
aumaia i o oulua olaga tuufaatasia le manogi o le amio fa'aKeriso." – Testimonies, vol. 7,
p. 47.
b. O faapefea ona fa'amatalaina e le Tusi Paia se aiga Kerisiano moni? Salamo
128; Isaia 61:9. E faapefea ona avea le aiga o se fa'amanuiaga poo se malaia foi?
________________________________________________________________________
"E tatau ona tatou fa'atagaina Keriso i totonu o o tatou loto ma aiga pe afai tatou te
mananao tatou te savavali i le malamalama. O le aiga e tatau ona faia i le tulaga atoa lava
o loo aumaia i le uiga o le upu. E tatau ona avea o se tama'i lagi i le lalolagi lenei, o se
nofoaga o loo fausiaina a'e ai lagona alofa e aunoa ma le maitau i taimi uma ina ia
nutilili'iina. O lo tatou fiafiaga e faalagolago i lenei fausiaina a'e o le alofa, agalelei, ma le
fa'aaloalo moni o le tasi i le tasi." – Ibid., vol. 3, p. 539.
Aso Gafua Iuni 1
2. MATUA MA FANAU
a. O a fa'amatalaga a le Tusi Paia e fa'atatau i fanau a matua-matata'u i le Atua?
Salamo 127:3; Fa'ataoto 17:6; Isaia 54:13.
________________________________________________________________________

"Ia manatua e lē tatau ona faia fanau e peiseai o i latou o ni a tatou lava meatotino.
O fanau o meatotino ia a le Atua, ma o le fuafuaga o le faaolataga e aofia ai lo latou
fa'aolataga e faapena ai foi ma lo tatou fa'aolataga. Ua tuuina mai i latou i matua ina ia
tausia a'e ai i latou i le a'oa'oga ma fa'atonuga a le Alii, ina ia saunia ai i latou e faia le
latou galuega i le olaga nei ma le ola e faavavau." – The Adventist Home, p. 280.
O fanau o meatotino ia a le Alii, ma seivagana ua avatu e matua ia i latou le ituaiga
koleniga lea o le a mafai ai e i latou ona tausia le ala o le Alii, ua latou fa'atalale i tiute
taua. E lē o le finagalo poo se fuafuaga a le Atua le avea o fanau ma tagata lē mafaufau, lē
fa'aaloalo, lē usiusita'i, lē fa'afetai, amio lē fa'apaiaina, ulu malō lē fa'alogo, manatu fia
sili, fiafia i fiafiaga e sili atu nai lo lo latou alolofa i le Atua. Fai mai Afioga a le Atua, o
lenei tulaga o amioga a le lalolagi o le a avea ma fa'ailoga o aso mulimuli." – Child
Guidance, p. 229.
"O [Fanau] . . . .e tatau ona ta'ita'iina i latou i le ala o le usitai, ae aua le fa'amalieina
sa'oloto i latou i le tuinanau o le 'ai poo le fa'alialiavale foi." – The Adventist Home, p.
279.
b. O le a le fa'atonuga ua tuuina mai e le Alii i matua uma lava e manana'o i a
latou fanau ina ia fa'aolaina? Teuteronome 6:4-7; 11:18, 19; Fa'ataoto 22:6.
________________________________________________________________________
"I le vaiaso atoa lava ia manatua ai e matua o lo latou aiga e tatau ona avea ma
a'oga e saunia ai a latou fanau mo lotoā oi lugā. Ia sa'o upu latou te tautala ai. E lē tatau
lava ona alu atu nai o latou laugutu ni upu e lē tatau ona faalogo i ai le fanau. Ia tausia le
agaga ia sa'oloto mai i le uiga o le itaitagofie. Matua, i le vaiaso atoa ia outou ola e faapei
o loo outou i luma o le Atua paia, o Lē na foa'iina atu ia te outou fanau ia koleniina mo Ia.
Ia koleni mo Ia le tama'i 'ekalesia o loo i totonu o o outou fale, ina ia sauni ai tagata uma e
tapua'i i totonu o le malumalu o le Alii i le Sapati. O taeao taitasi uma lava ma afiafi
taitasi uma, ia outou tuuina atu ai a outou fanau i le Atua o Lana fanau lea na fa'atauina i
Lona toto. A'oa'o i latou o lo latou tiute ma lo latou avanoa silisili lava ona maualuga lo
latou alolofa ma auauna i le Atua.
"E tatau ona ma'oti matua ina ia faia le tapuaiga i le Atua o se lesona autu mo a
latou fanau. O mataupu ma faitauga mai i le Tusi Paia e tatau ona sili atu ona latou tautala
so'o ai, aemaise ai lava mataupu ia e saunia ai le loto mo auaunaga fa'aletapuaiga. O upu
taua e mafai ona taulotoina so'o: 'Lo'u agaga e, ia ē faatali atu tau lava o le Atua; auā e mai
ia te Ia lava lo'u fa'amoemoe' (Salamo 62:5)." – Testimonies, vol. 6, p. 354.
Aso Lua Iuni 2
3. O LE POLOA'IGA LONA LIMA
a. O a mea o loo manaomia le fanau e latou te faia i o latou matua? Esoto 20:12;
Efeso 6:1-3.
________________________________________________________________________

"E lē o i ai se vaegā taimi o le olaga o fa'asa'olotoina ai fanau mai i lo latou ava i o
latou matua. O lenei tiute taua o loo tumau pea i luga o atalii ma afafine taitasi uma lava
ma o le tasi lenei o aiaiga i le fa'aumiina o lo latou ola i luga o le laueleele o le a foa'i mai
e le Alii i ē fa'amaoni. E lē o se mataupu lenei e lē aoga ona iloaina, peitai o se mataupu e
matuā sili ona taua. O le folafolaga ua tuuina mai i aiaiga o le usitai. Afai tou te usitai, o le
a outou ola umi i le laueleele ua foa'i atu e le Alii lo outou Atua ia te outou. Afai tou te lē
usitai, o le a lē fa'aumiina o outou ola i lena laueleele." – The Adventist Home, pp. 292,
293.
"Fanau, tou te mananao ea i le ola e faavavau? Ia fa'aaloalo la ma ava i o outou
matua. Aua le fa'amanu'alia ma fa'atiga i o latou loto ma faia ai i latou ina ia fa'aaluina po
e tele o le lē moe i le popole ma le atuatuvale ona o outou. Afai ua outou agasala ona o le
lē tuuina atu o le alofa ma le usitai ia i latou, amata nei loa ona toe fa'ataunuu lo outou
tiute e le'i faia i le taimi ua tuana'i. E lē mafai ona outou uia se isi lava auala; auā o lona
uiga ia te outou o lo outou lē maua lea o le ola e faavavau. O Le Atua o loo su'esu'eina
loto, o loo Ia silafia o outou uiga i o outou matua; auā o loo Ia fuaina amio i fua auro o le
malumalu fa'alelagi. Oka, fa'aali nei lau agasala o lou fa'atalale i ou matua, fa'aali nei lau
agasala o lou lē amanaiaina o i la'ua, ma lou inoino i le poloaiga paia a le Atua." – The
Youth's Instructor, June 22, 1893.
b. O le a le tasi o fa'ailoga e iloa ai le lata tele mai o le afio mai o lo tatou Alii o
Iesu Keriso? Roma 1:30; 2 Timoteo 3:2.
________________________________________________________________________
"O le agasala o loo ua i ai nei i lenei tupulaga i fanau, o lo latou 'lē usiusita'i lea i
matua, lē fa'afetai, lē paia, manana'o i fiafiaga e sili atu nai lo lo latou alolofa i le Atua' (2
Timoteo 3:2, 4). Ma o lenei tulaga o le olaga ua i ai nei ua matuā o'o lava i se tulaga
ta'atele o lea ua faia ai ma mataupu o valoaga o se tasi lea o fa'ailoga e iloa ai ua tatou ola
nei i aso mulimuli lava o le taimi." – Letters to Young Lovers, p. 53.
"O le upu a le Atua ua tumu i poloaiga ma fautuaga o loo faatonu mai ai le
fa'aaloalo mo matua. O loo una'iina mai ai i fanau ma talavou laiti le tiute paia o le alofa
ma le teufatuina o i latou na ta'ita'ia maia i latou a'o latou pepe, laiti, talavou, seia o'o lava
ina avea i latou ma tane ma fafine, ma ua tele lava ina latou fa'alagolago mai nei i le taimi
lenei ia i latou mo le filemu ma le fiafia. E lē o aumaia e le Tusi Paia se a'oa'oga lē
mautinoa e faatatau i lenei mataupu; peitai o ana a'oa'oga o loo tele lava ina lē
amanaiaina." – Fundamentals of Christian Education, p. 101.
Aso Lulu Iuni 3
4. O SE MALOSI FA'ATOLUINA
a. O le a le valoaga e fesootai ma le aiga o le a faataunuuina i aso mulimuli nei?
Malaki 4:5, 6; Luka 1:17.

________________________________________________________________________
"O le toe fausiaina ma le siitiaina a'e o le aiga tagata, e amata lea i totonu o le aiga.
O le galuega a matua e fa'avae ai isi galuega uma lava. O le lalolagi o loo fausia i aiga, ma
o le tulaga o loo i ai le lalolagi o loo i ai lea i le tulaga o loo faia ai e ulu o aiga. E sau mai
i le loto 'amio o le olaga' (Fa'ataoto 4:23); ma o le loto o le nuu, o le loto o le ekalesia, ma
le malo, o le aiga lea. O le manuia o le lalolagi lautele, o le manuia o le ekalesia, o le
manuia o le malo, e fa'alagolago lea i a'afiaga mai i le aiga." – The Ministry of Healing, p.
349.
"O i latou o loo tauaveina atu le feau mulimuli o le alofa tunoa i le lalolagi e tatau
ona latou lagona o lo latou tiute le a'oa'oina o matua e faatatau i le tapuaiga i le aiga. O le
latou fa'agaioiga toe fuata'i tele lava e tatau ona amata e ala i le fa'ailoaina atu o tapulaa o
le tulafono a le Atua i tamā ma tina ma fanau. A'o fa'ailoaina atu manaoga o le tulafono,
ma ua fa'atalitonuina ai tane ma fafine i o latou tiute ina ia usitai, ia fa'ailoa atu ia i latou le
matafaioi o le latou filifiliga, e lē gata mo i latou lava ae faapena ai foi mo a latou fanau."
– Child Guidance, p. 556.
b. A au faatasi loa tamā, tina ma le fanau i totonu o se aiga fiafia e tasi, o le a le
iuga o le a i ai? Salamo 144:12.
________________________________________________________________________
"E manaomia e matua le sili atu nai lo le poto fa'aletagata i laasaga taitasi uma lava,
ina ia latou malamalama i le auala sili lava e a'oa'oina ai a latou fanau mo se olaga aoga,
ma le fiafia iinei, ma auaunaga sili atu ma olioliga sili atu i le olaga oi lumanai. Tamā ma
tina, ia outou manatua i taimi uma lava ua tuuina atu ia te outou se matafaioi paia. O le
malosi o fa'ata'ita'iga e matuā telē lava. Afai tou te toilalo i le filifilia o uo e fetaui mo a
outou fanau ma fa'atagaina ai i latou e fa'auo ma fa'amasani i tagata e lē lelei a latou amio,
ua ē tuuina la i latou po ua ē fa'atagaina i latou ina ia latou tuuina i latou lava i totonu o se
a'oga o le a a'oa'oina ma fa'atinoina ai lesona o amioga leaga maulalo." – The Review and
Herald, September 13, 1881.
"Matua, ua ia te outou se matafaioi paia ua i luga ia te outou. O lo outou tiute lo
outou galulue faatasi ma Keriso i le fesoasoani ai i a outou fanau ina ia fausia amioga sa'o.
E lē mafai e Iesu ona faia o se mea e tasi e aunoa ma lou loto atu. E lē o se alofa poo se
agalelei le fa'atagaina o se tamaititi ina ia faia lona lava loto, ma gaua'i atu ai i ana
tulafono, ma ē fa'atalale ai e a'oa'i o ia ona e te alofa tele i ai ua ē lē fa'asalaina ai. O le a le
ituaiga alofa lea e fa'atagaina ai lau tama/fanau ina ia fausiaina a'e ituaiga amioga o le a
fa'anoanoa ma mafatia ai o ia lava ma isi tagata uma lava? Ia outou sola ese mai i le
ituaiga alofa lea! O le alofa moni lava o le a mataala mo le manuia o le agaga mo le taimi
lenei ma le ola e faavavau." – Ibid., July 16, 1895.
Aso Tofi Iuni 4
5. GALUEGA FA'AMAONI UA TAUIA

a. I le olaga e faavavau – pe a saogalemu le au fa'aolaina i totonu o le malo o le
Atua – o le a se mea o le a mafai ona tautala mai ai matua, ma o le a foi se molimau o
le a faia e a latou fanau? Isaia 8:18.
________________________________________________________________________
"Pe a nofoia le fa'amasinoga, ma ua tatala tusi; pe a fetalai mai le Fa'amasino sili
fa'apea, 'Le auauna lelei e, ma le fa'amaoni', ma ua tuua i le ulu o lē ua manumalo le pale o
le mamalu o le ola pea, e to'atele i latou o le a siitiaina o latou pale i luma o le vateatea o
loo fa'apotopoto mai, ma, latou faasino atu i o latou tina, 'Na ia faia a'u i le tulaga atoa
lava ua ou i ai nei e ala i le alofa tunoa o le Atua. O ana faatonuga, o ana tatalo, ua
fa'amanuiaina ua ou maua ai le fa'aolataga e faavavau.'" – Messages to Young People, p.
330.
"Tinā, manatua i lau galuega, o le Atua o Lē na foafoaina mea uma o le a Ia foa'i
atu ia te oe le fesoasoani. E mafai ona ē ta'ita'iina lau fanau ina ia avea ma tagata
manumalo e ala i Lona malosi ma Lona suafa. A'oa'o i latou ina ia latou vaavaai i le Atua
mo le malosi. Ta'u atu ia i latou o loo faafofoga mai o Ia i a latou tatalo. A'oa'o i latou ina
ia latou fa'atoilaloina le leaga i le lelei. A'oa'o i latou ina ia latou tuuina atu se aafiaga e
siitiaina ai ma se aafiaga lelei. Ta'ita'i i latou ina ia faatasi ma le Atua, ona ia i latou lea o
le malosi e teena ai le fa'aosoosoga sili ona malosi. O le a latou maua loa le taui o le tagata
manumalo." – Child Guidance, pp. 172, 173.
b. O le a le taui o le a maua e le aiga Kerisiano tutū fa'atasi pe a latou ulufale atu
i le malo o le Atua? Salamo 132:12; Fa'aaliga 5:13.
________________________________________________________________________
"Ua fetalai atu [Iesu] ia te oe ina ia e tofusia i Lona olioli, ma o le a lena? Tamā, o
le olioliga lea o lo outou vaai atu ia i latou na mafatia ai outou agaga. O le olioliga lea o lo
outou vaai atu tina, ua tauia au taumafaiga. O lau fanau lenei; o le pale o le ola ua i luga o
o latou ulu, ma ua fa'atumauina e agelu a le Atua igoa o tina ua manumaloina mai e a
latou taumafaiga a latou fanau ia Iesu Keriso." – Ibid., pp. 567, 568.
Aso Faraile Iuni 5
FESILI TOE FA'AMANATU
a. O a uiga o se aiga Kerisiano moni lava?
b. Ta'u mai ni vaega fa'amanuiaina autu i le tausiaina o fanau e matata'u i le
Atua.
c. O le a le lu'i fa'apitoa ua fetaia'i ma matua i nei aso mulimuli?
d. Aisea o le a seāseā ai ona maua ni aiga Kerisiano moni lava i le i'uga o le
taimi?

e. O le a le mea e manaomia ina ia tatou vaaia ai a tatou fanau i le malo o le
Atua?
Lesona 11 Sapati, Iuni 13, 2009
A'oa'oga Moni
"Talu fo'i ona ē tamaititi ua e iloa Tusi Paia, e mafaia ona faapoto ai ia te oe e
i'u ai i le ola i le fa'atuatua ua ia Keriso Iesu. " (2 Timoteo 3:15).
"O le to'atele o tagata, o le a'oga, o lona uiga o se malamalamaaga lea e faatatau i
tusi; peitai 'o le mata'u i le Alii o le amataga lea o le poto' (Salamo 111:10). O le sini moni
lava o le a'oga o le fa'afoisiaina lea o le faatusa o le Atua i le tagata." – Testimonies, vol.
5, p. 322.
Faitauga Fautuaina: Education, pp. 13-27.
Ulua'i Aso Iuni 7
1. I TOTONU O ETENA
a. O le a le uiga o le a'oga moni? Salamo 111:10; Fa'ataoto 9:10.
"O le a'oga moni lava o le sauniga lea o malosi fa'alemafaufau, fa'aleagaga, ma le
fa'aletino mo le fa'atinoina o tiute ta'itasi uma lava, tiute lelei ma tiute lē lelei foi, o le
koleniina lea o masaniga ma fa'atinoga taitasi uma lava, o le loto, mafaufau, ma le agaga
mo auaunaga fa'alelagi." – Selected Messages, bk. 3, p. 228.
"O le sini moni lava o le a'oga o le toe fa'afoisia lea o le faatusa o le Atua i le
tagata." – Patriarchs and Prophets, p. 595.
b. O le a le siomaga na foa'iina atu ia Atamu ma Eva mo le la a'oga? Kenese 2:8,
15.
________________________________________________________________________
"O le fa'atulagaga poo le faiga o a'oga na fa'atuina i le amataga o le lalolagi e tatau
ona avea ma fa'ata'ita'iga mo le tagata mo taimi uma lava o mulimuli atu ai." – Child
Guidance, p. 294.
"Ina ua talanoa le Alo ma le Tamā a'o le'i faia le lalolagi, na fuafuaina ai o le a
totōina e le Alii le Atua se fa'atoaga mo Atamu ma Eva i totonu o Etena ma avatu ai ia i
la'ua le galuega o le tausia o laau e i ai o laau fua ma le teuteuina o laau. O galuega aoga
na fuafuaina e avea ma o lā puipui, ma na fuafuaina ina ia fa'atumauina i augatupulaga

uma lava e o'o lava i le i'uga o le talaaga o le lalolagi. O le mauaina o se a'oga e atoatoa i
ona itu uma, e manaomia ai ina ia tuufa'atasia a'oa'oga ma galuega fa'atinoina." – The
Signs of the Times, August 13, 1896.
Aso Gafua Iuni 8
2. O A'OGA A LE AU PEROFETA
a. O le toe fa'afo'isiaina mai o se fuafuaga sili atu fa'aleAtua, o le a le mea na faia
mo "atalii o le au perofeta" i Isaraelu"? 1 Samuelu 7:15, 16; 2 Tupu 2:2-5, 15.
________________________________________________________________________
"O a'oga e tolu mai i nei a'oga [a le au perofeta], o le tasi i Kilikala, tasi i Peteli, ma
le isi i Ieriko, o loo ta'uina mai i le fa'amaumauga a le Tusi Paia. I le taimi na soso'o tonu
lava ma le aveina a'e o Elia i le lagi, na lā asiasi atu ai ma Elisaia i nei nofoaga tutotonu o
koleniga." – Prophets and Kings, pp. 224, 225.
"I nei 'a'oga a le au perofeta' na a'oa'oina ai talavou e i latou e le'i gata ina latou
matuā tomai malamalama lelei i le upu moni fa'alelagi, ae faapena foi ona faatumauina e i
latou lava le mafutaga mafana lava ma le Atua ma ua latou maua le liligi faapitoa mai o
Lona Agaga." – The Signs of the Times, July 20, 1882.
b. Ta'u mai mataupu faapitoa na su'esu'eina i a'oga a le au perofeta. Salamo
86:11; Ioane 17:3.
________________________________________________________________________
"O mataupu autu lava o suesuega i nei a'oga [a perofeta] o le tulafono lea a le Atua,
faatasi ai ma faatonuga na tuuina atu ia Mose, o talaaga paia, o musika paia, ma tusitusiga
o saafiafiga o mafaufauga i fuaiupu e faai’u i upu e tutusa o latou fa'aleoga. I nā a'oga o
aso anamua, o le sini autu lava o suesuega uma le suesue ina ia iloa le finagalo o le Atua,
ma le tiute o le tagata ia te Ia. I fa'amaumauga o talaaga paia, sa tusia ai la'asaga o Ieova."
– Christian Education, p. 62.
"E te manatu ea na fa'aaoga e [i latou sa i totonu o a'oga a perofeta] tusi a'oga ia sa i
totonu o a'oga lautele? E leai, E leai! O a mea na a'oa'oina ai i latou? Na a'oa'oina i latou
ina ia latou maua se malamalamaaga e faatatau ia Iesu Keriso." – Spalding and Magan
Collection, p. 357.
"I totonu o le a'oga ma le aiga o le tele lava o le a'oa'oga na faia lava i le tu'ugutu
atu; peitai na a'oa'o foi talavou ina ia latou iloa faitau tusitusiga Eperu, ma o tusi taai o le
Feagaiga Tuai na tatalaina atu i le latou suesuega. . . . O upu moni tetele na faailoa mai e
faatusa i auaunaga poo sauniga o le malumalu na fa'ailoa uma mai lava, ma na
taofimauina e le fa'atuatua le sini autu o lenā fa'atulagaga atoa lava – o le Tama'i Mamoe
lea a le Atua, o le a Na aveeseina le agasala a le lalolagi. Na teufatuina se uiga o le
fa'amaoni naunauta'i. E le'i gata ina a'oa'oina tamaiti a'oga i le tiute o le tatalo, peitai na
a’oa'oina foi i latou ina ia latou iloa tatalo, na a’oa’oina i latou ina ia latou iloa fa'alatalata

atu i lo latou Atua na foafoaina i latou, ia latou iloa le faatinoina o le faatuatua ia te Ia, ma
le auala e malamalama ma usitai ai i a'oa'oga a Lona Agaga. O le mafaufau fa'apaiaina na
aumaia ai mai i le fale oa o le Atua, a'oa'oga fou ma a'oa'oga tuai, ma na fa'aalia le Agaga
o le Atua i valoaga ma pese paia." – Education, p. 47.
Aso Lua Iuni 9
3. GALUEGA AOGA
a. O fea na maua ai e Iesu Lana a'oga? Mataio 13:54-56.
________________________________________________________________________
"O le tamaititi o Iesu na te le'i maua Lana a'oa'oga i totonu o a'oga i sunako. O Lona
tina o lona faia'oga muamua lava lea. Mai i ona laugutu ma tusi taai a le au perofeta, na Ia
a'oa'oina mai ai mea fa'alelagi. O upu lava ia na Ia fetalaia mai ia Mose mo Isaraelu, o
lenei ua a'oa'oina ai o Ia e lona tina. A'o ia tupu a'e mai i se tamaititi i le avea o Ia ma
talavou, na te le'i sailia a'oga a a'oa'o Isaraelu. Na te le'i manaomia le a'oa'oga lea e maua
mai i faia'oga faapea; auā o le Atua o Lona faia'oga lea. . . .
"I Lona olaga i le fogaeleele lenei, o Iesu, o Ia o se tagata faigaluega finafinau ma
sa galue i taimi uma. E tele fua o galuega na ia mana'o i ai, o le mea lea na Ia taumafai ai e
faia galuega e tele. Ina ua uma ona amataina lana galuega, na Ia fetalai mai, 'E tatau ona
Ou faia galuega a Lē na auina mai A'u, manū o ao: e o'o mai le po, e lē mafai ona toe
galue ai se tasi' (Ioane 9:4). E le'i alofia e Iesu tiute ma matafaioi, e faapei ona faia e le
toatele o loo ta'utino mai o i latou o Ona soo.E matuā to'atele lava tagata o loo vaivai ma
lē lelei i galuega talu ai ona latou te saili e alofia lenei matafaioi." – The Desire of Ages,
pp. 70-73.
b. O fea tatou te maua ai tusitusiga fetaui mo a'oa'oga moni e ese mai i le Tusi
Paia? 2 Tesalonia 3:8-10.
________________________________________________________________________
"O galuega e fa'agaioia ai lima e sili atu ona tatau ona mata'itu i ai nai lo le tulaga o
loo faia ai. O a'oga, e tatau ona fa'atuina ina ia lē gata i le a'oa'oina o le a'oa'oga silisili
lava fa'alemafaufau ma le fa'aleagaga, ae o le a maua ai foi auala ma atamai sili lava e
mafai ona maua mo le fausiaina a'e o le tino ma le koleniga i galuega. E tatau ona faia
a'oa'oga e faatatau i le fai faatoaga, o le fausiaina o galuega e faia i fale faigaluega – ma ia
tele lava a'oa'oga o matātā eseese sili ona aoga i le tulaga e mafai ona a'oa'oina ai – ae
faapena ai foi ma le iloa e faatatau i le faatulagaina ma le fa'agaioiga o le aiga, o le
kukaina o meaai maloloina, su'isu'i, o le su'iina o ofu i se tulaga maloloina, o le togafitiina
o tagata mama'i, ma matātā faapena. O potu e faia a'i a'oa'oga e faatatau i togalaau, e tatau
ona fausia, ma o le galuega i matātā ta'itasi uma lava e tatau ona i lalo o le faatonutonuga
a i latou o loo i ai le tomai ma le agavaa i ia matātā.

"O le galuega e tatau ona i ai sona sini maoti lava ma e tatau ona mae'ae'a lelei. A'o
manaomia e tagata taitasi uma lava se malamalamaaga e faatatau i matātā ese, e matuā
tatau lava ona ia matuā tomai lava i le tasi pe sili atu foi o nei matātā. O talavou taitasi
uma lava, pe a latou tuua a'oga, ua tatau ona latou mauaina se malamalamaaga e faatatau i
ni matātā poo se galuega e mafai ona maua ai sana galuega pe a manaomia." – Education,
p. 218.
Aso Lulu Iuni 10
4. O LE TUSI PAIA I A'OA'OGA
a. O le a le mea e mafai ona faia e le suesueina ma le finafinau o le Tusi Paia mo i
tatou? Salamo 119:98-101; Fa'ataoto 2:1-5.
________________________________________________________________________
"O le upu a le Atua e tatau ona avea ma a tatou suesuega ia sili atu nai lo isi tusi
uma lava, o le tusi sili lea o le a'oga, o le faavae lea o a'oa'oga uma lava; ma e tatau ona
a'oa'oina a tatou fanau i upu moni o loo maua ai iina, tusa lava poo a masaniga ma aganuu
muamua na latou a'oa'oina." – Testimonies, vol. 6, pp. 131, 132.
"O le Tusi Paia o loo ia a'oa'oina mai le finagalo atoa lava o le Atua e faatatau i
atalii ma afafine o Atamu. O le Tusi Paia o le tulafono lea o le olaga, o loo a'oa'o mai ai ia
i tatou le amio e tatau ona tatou fausiaina a'e mo le ola e faavavau oi lumana'i." –
Fundamentals of Christian Education, pp. 390, 391.
b. A'o tatou tuuina atu i tatou i le suesue ma ia a'oa'oina i tatou, o a mea e tatau
ona tatou fa'amuamuaina? Isaia 55:2, 3; Salamo 25:4, 5.
________________________________________________________________________
"O le taimi lenei o talavou alii ma tama'ita'i laiti latou te fa'aaluina le tele o tausaga i
le mauaina o se a'oa'oga lea ua na o ni laau lava ma aputi o saito, ina ia fa'aumatiaina i le
fa'aumatiaga tele mulimuli. E to'atele o loo latou fa'aaluina tausaga e tele o o latou olaga i
le suesueina o tusi, i le mauaina o se a'oa'oga o le a mate faatasi ma i latou. O a'oa'oga
faapena e lē fa'atauaina e le Atua. O lenei poto lē fa'amaonia na maua mai i le suesueina o
tusitala eseese, ua vavaeeseina ai ma fa'aitiitia ai le matagofie ma le taua o le upu a le
Atua. E to'atele tamaiti a'oga ua tuua a'oga ma ua lē mafai ona latou taliaina le upu a le
Atua i le ava ma le fa'aaloalo lea na latou tuuina atu i le upu a le Atua a'o latou le'i ulufale
atu i a'oga ia, o lo latou faatuatua ua leiloa ona o le taumafaiga ina ia latou atamamai i
mataupu eseese. O le Tusi Paia e le'i faia o se tapulaa i le latou a'oa'oga, peitai ua tuuina
atu i o latou luma tusi o loo faafefiloi ma uiga lē fa'amaoni ma le fa'asalalauina o manatu
sese." – Ibid., pp. 446, 447.
"E lē manaomia e tagata le malamalama taupulapula o aganuu ma masaniga ina ia
tau fa'amalamalamaina ai le Tusi Paia. E faapena foi ona mafai ona manatu, o le la, o lona

susulu i le lagi i le aoauli, na te manaomia le taupulapula o le tama'i malamalama o le
lalolagi ina ia fa'atuputeleina ai lona malamalama." – Ibid., p. 391.
"O le Tusi Paia, e lē tatau ona aumaia i totonu o a tatou a'oga ina ia tuuina i le va o
a'oa'oga leaga ma le lē fa'amaoni. O le Tusi Paia, e tatau ona avea ma faavae ma mataupu
o le a'oga. E moni e matuā tele atu lo tatou iloa e faatatau i le upu a le Atua soifua nai lo lo
tatou iloa i le taimi ua tuana'i, peitai o loo matuā tele pea mea e tatau ona tatou suesueina.
E tatau ona fa'aaogaina le Tusi Paia ma upu a le Atua soifua, ma e tatau ona tatou
fa'amuamuaina, fa'amulimuliina, ma ia fa'asilisiliina i mea uma lava. O le a vaaia loa le
tupu a'e fa'aleagaga moni lava." – Ibid., p. 474.
Aso Tofi Iuni 11
5. A'OGA MO LE OLA E FA'AVAVAU
a. O le a le fa'amatalaga a le Agaga Paia e faatatau i le Tusi Paia? 2 Timoteo
3:15, 16.
________________________________________________________________________
"I le olaga atoa lava e faavavau o le a susulu mai ai Upu o le Tusi Paia e sili atu ona
pupula ma sili atu ona malamalama, e pei o ma'a taua; peitai tatou te le'o malamalama atoa
i nei upu moni. O le upu moni o le Tusi Paia ua tatou talia e tatau ona ia faia se galuega
tele lava mo i tatou, ma o le tele o lo tatou malamalama i nei mataupu, o le a sili atu ai foi
ona tatou malamalama i le auala e tatau ona fa'atalitonuina ai isi mafaufau." – The Review
and Herald, April 10, 1888.
b. O a mataupu o le a suesueina i le malo o le Atua, ma o ai o le a a'oa'oina le au
fa'aolaina? Mataio 23:10; Efeso 6:9; 1 Korinito 2:9.
________________________________________________________________________
"[I le Ierusalema Fou,] o le a manatunatu ai mafaufau ola pea o le au fa'aolaina ma
le fiafia e lē mavae, i mea ofoofogia o le mana foafoa, o mea lilo o le alofa fa'aola. O le a
lē toe i ai se fili sauā taufaasese e fa'aosooso ina ia fa'agaloina le Atua. O tomai taitasi uma
lava o le a fausiaina a'e, o malosi taitasi uma lava o le a faatuputeleina. O le mauaina o le
malamalama o le a lē fa'avaivaiina ai le mafaufau pe fa'aitiitia ai foi malosi. O iina o le a
mafai ona tauaveina ai i luma galuega ma taumafaiga silisili lava, o le a ausia ai
faanaunauga silisili lava, o le a mafai ai foi ona faataunuuina finafinauga sili ona
maualuga; ma o le a tulai mai foi suesuega fou e suesueina, o mea ofoofogia fou e maofa
ai, o upu moni fou e manatunatu i ai, o mea fou e fa'aaoga i ai malosi o le mafaufau ma le
agaga ma le tino." – The Great Controversy, p. 677.
"O le mataupu autu o le faaolataga o le mataupu lea e tasi e finafinau agelu e
vaavaai i ai; o le a avea ma suesuega ma pese a le au faaolaina i tausaga lē mafaamutalia o
le olaga e faavavau. E lē aoga ea ona manatunatu ma suesue ma le faautauta i ai? E lē
tatau ea ona tatou vivii i le Atua ma o tatou loto ma o tatou agaga ma o tatou leo 'mo Ana

galuega ofoofogia ma le matagofie mo fanau a tagata'? (Salamo 107:8)." – Testimonies,
vol. 5, p. 318.
Aso Faraile Iuni 12
FESILI TOE FA'AMANATU
a. O le a le vaega sili ona taua o le a'oa'oga faaKerisiano o loo masani lava ona lē
amanaiaina i le taimi lenei?
b. Aisea na fa'amanuiaina ai "a'oga a le au perofeta" i le latou galuega?
c. E faapefea ona mafai ona tatou fa'alatalata lava i le auala na a'oa'oina ai Iesu?
d. O le a le uiga o loo masani ona punitia ai le Tusi Paia i le tele o a'oga
Kerisiano?
e. O le a le vaega e faia e le a'oga i le olaga e faavavau?
Lesona 12 Sapati, Iuni 20, 2009
O le Agaga o Valoaga
"E lē faia lava se mea e le Alii o Ieova, ae na te faaalia Lona finagalo i Ana auauna
o perofeta" (Amosa 3:7).
"O loo a'oa'o e le Atua Lana ekalesia, a'oa'i o latou sese, ma fa'amalosia lo latou
faatuatua, afai e lē o lea, Na te le'o faia la lea galuega i Lana ekalesia. O le galuega lenei o
le galuega a le Atua, afai e lē o lea, o lona uiga e lē o Sana galuega. E lē galue faatasi lava
le Atua ma Satani." – Testimonies, vol. 4, p. 230.
Faitauga Fautuaina: Selected Messages, bk. 1, pp. 24-39.
Ulua'i Aso Iuni 14
1. I LE AMATAGA
a. I le amataga, ina ua mavae ona fa'amutaina e le Atua le galuega o le foafoaga,
na fa'apefea ona Ia talanoa faatasi ma Atamu ma Eva? Kenese 3:8, 9. Na faapefea
ona Ia talanoa atu i le au pateriaka?
________________________________________________________________________
"O le ulugalii paia o [Atamu ma Eva] e le'i gata o i laua o ni fanau i lalo o le tausiga
fa'aletamā a le Atua peitai o i laua foi o ni fanau na mauaina faatonuga mai i le Atua
foafoa o loo i ai le poto atoatoa. Na asiasia i laua e agelu ma na faatagaina e talanoa ma Lē

na foafoaina i laua, e le'i i ai ma se veli poo se puipui na punitia ai i laua." – Christian
Education, p. 207.
"O Atamu, Noa, Aperaamo, Isaako, Iakopo, ma Mose na latou malamalama uma
lava i le tala lelei. Na latou vaavaai atu mo le fa'aolataga e ala i le Sui ma le Faaola o le
tagata. O nei tane anamua na latou talanoa ma le Faaola o Lē na fuafuaina o le a afio mai i
lo tatou lalolagi i le tino tagata; ma o nisi o i latou na talanoa faafesaga'i ma Keriso ma
agelu o le lagi." – Patriarchs and Prophets, p. 366.
b. Na faapefea ona faailoa atu e le Atua Lona finagalo ia Mose, le ta'ita'i o
Isaraelu? Esoto 33:11; Numera 12:7, 8.
________________________________________________________________________
"O Mose o le tagata sili lava lea na tulai e avea ma ta'ita'i o tagata o le Atua. Na
matuā fa'amamaluina lava o ia e le Atua, e le'i faamamaluina o ia i le iloa na ia maua i le
maota o le tupu i Aikupito, peitai na faamamaluina o ia ona o ia o se tagata na sili ona
agamalu i tagata uma. Na talanoa faafesagai le Atua ma ia, e pei ona talanoa o se tagata
ma lana uo." – The SDA Bible Commentary [E. G. White Comments], vol. 1, p. 1113.
Aso Gafua Iuni 15
2. TAGATA PAIA O LE ATUA – O LE AU PEROFETA
a. Ina ua uma ona faatuina e le agasala se puipui i le va o le Atua ma le aiga
tagata (Isaia 59:1, 2), o ai na fa'aaogaina e le Alii ina ia faaalia ai Lona finagalo ia i
latou? 1 Samuelu 9:9; 2 Peteru 1:21.
________________________________________________________________________
"O Keriso lea na fetalai mai i Ona tagata e ala i le au perofeta. . . . O le siufofoga o
Keriso lea e fetalai mai ia i tatou e ala i le Feagaiga Tuai. 'O le molimau a Iesu o le agaga
lea o valoaga' (Fa'aaliga 19:10)." – Patriarchs and Prophets, pp. 366, 367.
"O fetalaiga a Keriso e lē o se fa'aaliga fou lea. O tapulaa ia na Ia fa'amatalaina mai
sa fa'ailoa atu ia Mose mai i le ao faaniutu, ma na fa'ailoa atu foi i le au perofeta, o ē na
tautala mai ma tusia ia mea uma a'o osofia i latou e le Agaga Paia." – The Review and
Herald, July 7, 1896.
"O le sili atu o lo tatou taliaina atoatoa o le malamalama ua fa'ailoa mai e le Agaga
Paia e ala mai i auauna faamaoni a le Atua, o le sili atu foi lena o le loloto ma le mautinoa
e pei lava o le nofoalii e faavavau, o le tulaga o le a vaaia ai upu moni o valoaga anamua;
o le a tatou matuā mautinoa lava na tautala tane o le Atua a'o osofia i latou e le Agaga
Paia. E tatau foi i tane/tagata ona latou i lalo o le aafiaga o le Agaga Paia ina ia latou
malamalama ai i fetalaiga a le Agaga e ala mai i le au perofeta." – Selected Messages, bk.
2, p. 114.

. O le a le mea na folafolaina i tagata o le Atua e faatatau i Lona finagalo ma
Ana fuafuaga? Numera 12:6; Amosa 3:7.
________________________________________________________________________
Ua valaau e le Atua Lana ekalesia i le aso lenei, e pei ona Ia valaauina Isaraelu
anamua, ina ia latou tulai e avea o se malamalama i totonu o le lalolagi. E ala i le pelu
malosi o le upu moni, o feau a le agelu muamua, lona lua, ma le lona tolu, ua Ia
vavaeeseina ai i latou mai i ekalesia ma le lalolagi ina ia aumaia i latou i se mafutaga
vavalalata lava ma Ia. Ua Ia faia i latou o ni nofoaga e teu ai Lana tulafono ma ua Ia avatu
ia i latou upu moni tetele lava o valoaga mo le taimi lenei." – Testimonies, vol. 5, p. 455.
"E tatau ona tatou mulimuli i faatonuga ua aumaia e ala mai i le agaga o valoaga. E
tatau ona tatou alolofa ma usitai i le upu moni mo le taimi lenei. O le upu moni lenei o le a
lavea'iina i tatou mai i lo tatou taliaina o faaseseega malolosi lava. Ua fetalai le Atua ia i
tatou e ala i Lana upu. Ua Ia fetalai mai ia i tatou e ala i molimau mo le ekalesia ma tusi
ua fesoasoani ina ia faamaninoina lo tatou tiute o le taimi lenei ma le tulaga e tatau ona
tatou tulai ai nei." – Ibid., vol. 8, p. 298.
Aso Lua Iuni 16
3. O LE TIUTE O LE PEROFETA
a. O le a le tulaga faaletino o perofeta moni pe a latou mauaina fa'aaliga
fa'alelagi? Numera 24:2-4; Iopu 33:14-16. O le a le mea e tatau ona faia i fa'aaliga e
mauaina? Sapakuka 2:2.
________________________________________________________________________
"I se fa'atasiga na faia i Dorchester, Mass., Novema, 1848, na aumaia ai ia te a'u se
fa'aaliga o se vaaiga e faatatau i le alagaina o le feau o le fa'amaufa'ailoga, ma le tiute o le
au uso ina ia lomia ma fa'asalalauina le malamalama na susulu mai i lo tatou ala.
"Ina ua ou ala mai nai le fa'aaliga, na ou fai atu i la'u tane: 'Ua ia te a'u se feau mo
oe. E tatau ona e amata ona lolomiina se tusitusiga itiiti ma auina atu i tagata. Ia fa'ala'ititi
le tusitusiga muamua lea; peitai a'o faitau i ai tagata, o le a latou auina mai ia te oe tupe
ma auala eseese e lolomiina ai lea tusitusiga, ma o le a fa'amanuiaina mai lava i le
amataga. Mai i lenei amataga la'ititi na fa'ailoaina mai ia te a'u e pei o ni ave lē motusia o
le malamalama na susulu manino atu lava fa'ata'amilo i le lalolagi.'" – Life Sketches of
Elen G. White, p. 125.
b. E ese mai i le valoiaina o mea tutupu o le lumana'i, o a isi tiute o perofeta?
Hosea 6:5; 12:10, 13; Nehemiah 6:7.
________________________________________________________________________
"O perofeta a le [Atua] sa auina atu ma a'oa'iga ma lapata'iga i [tagata o Isaraelu sa i
le tafeaga]. Na fafaguina tagata ina ia latou iloa lo latou agasala, na latou fa'amaulaloina i

latou lava i luma o le Atua, ma latou liliu mai ai ia te Ia ma le salamo moni. Ona auina atu
lea e le Alii ia i latou feau o fa'amalosiga, ma faailoa atu o le a Ia lavea'iina i latou mai i lo
latou nofo pologa, ma toe fa'afo'isia mai i latou ia te Ia." – Testimonies, vol. 5, p. 468.
"O le galuega a Elisaia i le avea o ia ma perofeta na matuā ese lava i nisi o itu mai i
le galuega a Elia. O Elia na tuuina atu i ai feau o fa'asalaga ma le fa'ailoaina atu o agasala i
a'oa'iga; o lana feau o le leo lea o a'oa'iga lē fefe, valaauina ai tupu ma tagata ina ia liliu
ese mai i o latou ala leaga. O le galuega a Elisaia na sili atu ona lē leoa nai lo Elia; o lana
galuega o le fausiaina a'e lea ma le fa'amalosia lea o le galuega na amataina e Elia; o le
a'oa'oina lea o tagata i ala o le Alii. O loo fa'aataina mai o ia e le Tusi Paia o loo ia galue
vavalalata lava ma tagata, ma siomia ai o ia e atalii o perofeta, ma aumaia ai le
fa'amalologa ma le olioliga i ana vavega ma lana auaunaga." – Prophets and Kings, p.
235.
"O Ioane, i le avea o ia ma perofeta, na tulai atu o ia o se sui o le Atua, ina ia
fa'ailoa atu le sootaga i le va o le tulafono ma perofeta, ma le vaegā taimi fa'aKerisiano. O
lana galuega ma lana auaunaga na fa'asino atu i tua i le tulafono ma le au perofeta, a'o le
taimi lava lea e tasi, na ia faasinoina atu ai tagata i luma ia Keriso, o Ia o le Fa'aola o le
lalolagi." – The Spirit of Prophecy, vol. 2, p. 57.
Aso Lulu Iuni 17
4. PEROFETA FAFINE
a. Ta'u mai nisi o fafine na valaauina e le Atua i le auaunaga fa'aperofeta. Esoto
15:20; Fa'amasino 4:4; 2 Tupu 22:14; Luka 2:36; Galuega 21:8, 9.
________________________________________________________________________
"Sa nofo i Isaraelu se fafine na matuā iloga lona fa'amaoni i le Atua, ma o ia na
filifili le Alii na te lavea'i ai Ona tagata. O lona igoa o Tepora. Na fa'aigoaina o ia o se
perofeta, ma a lē i ai fa'amasino masani, na sailia o ia e tagata mo fautuaga ma le
fa'amasinoga tonu." – Daughters of God, p. 37.
"O le perofeta o Ulata sa nofo i Ierusalema, latalata ane i le malumalu. O le
mafaufau o le tupu, na faatumuina i manatunatuga popole, na ia toe liliu atu ia te ia, ma na
ia finafinau ina ia fesili atu i le Alii e ala i lenei ave feau filifilia, ina ia iloa ai, pe afai e
mafai ai, pe mafai i lona malosi i soo se auala lava ona ia lavea'iina Iuta agasala, lenei ua
latalata ina fa'afanoina." – Ibid., p. 44.
b. Ina ua mumusu tane e to'alua (William Foy ma Hazen Foss) e fa'ailoa le
fa'aaliga a le Atua i tagata, o le a le mea na fa'aalia ia Ellen Gould Harmon? O le a le
igoa na ia aveina mo ia – ma aisea foi?
________________________________________________________________________
"E le'i umi talu ona mavae le taimi i le tausaga e 1844 na aumaia ai loa le fa'aaliga
muamua ia te a'u. Sa ou asiasi i se uso pele ia Keriso, o lona loto na matuā mafana ma lo'u

loto; e to'alima i matou, tama'ita'i uma, sa to'otutuli filemu i le fata faitaulaga a le aiga. A'o
matou tatalo, na o'o mai i luga ia te a'u le mana o le Atua e le'i faapea lava ona ou
lagonaina muamua. Na foliga mai na siomia a'u e le malamalama, ma na foliga mai ua
siitia a'e a'u i luga ma sili atu ona maualuga nai le lalolagi. Na ou liliu ina ia ou vaai atu i
tagata fa'atalitali mo le toe afio mai o Iesu i le lalolagi, peitai e le'i mafai ona ou iloa atu i
latou, ae fai mai loa se leo ia te a'u: 'Toe vaai, ma vaai maualuga teisi a'e.' O lea leo na
siitia a'e ai loa la'u vaai ma ou iloa atu ai se ala sa'o ma le vaiti, o taatia mamao a'e lava i
luga o le lalolagi. O luga o lenei ala na savavali ai tagata fa'atalitali mo le afio mai o Iesu
aga'i atu i le aai." – Testimonies, vol. 1, pp. 58, 59.
"O le faapea o a'u o se perofeta o se fa'aupuga lea ou te le'i faia lava. Afai e
fa'aigoaina a'u e isi i lena igoa, e leai sa'u finauga ma i latou. Peitai o la'u galuega ua aofia
ai le tele o lālā eseese o lea e lē mafai ai ona ou fa'aigoaina a'u i se igoa e ese mai nai lo se
avefeau, na auina mai e alagaina se feau mai i le Alii i Ona tagata, ma ia faia galuega i soo
se lālā lava Na te fa'ailoa mai." – Selected Messages, bk. 1, p. 34.
Aso Tofi Iuni 18
5. PEROFETA MONI MA PEROFETA SESE
a. O le a le tasi o faailoga e iloa ai le ekalesia mulimuli a le Atua i aso mulimuli
nei? Efeso 4:11; Fa'aaliga 12:17; 19:10 (vaega mulimuli).
________________________________________________________________________
"O le tulafono a le Atua ma le Agaga o Valoaga e u'u lima faatasi lava ina ia ta'ita'ia
ma fautuaina ai le ekalesia, ma soo se taimi lava e amanaia ai e le ekalesia lenei ta’iala e
ala i le usitai i Lana tulafono, ua auina mai le Agaga o Valoaga e ta'ita'ia o ia i le ala o le
upu moni. . . .
"O le a amanaia e le ekalesia mulimuli le Atua i Lana tulafono ma o le a ia te ia le
meaalofa fa'avaloaga. O le usitai i le tulafono a le Atua, ma le Agaga o Valoaga o loo iloa
ai lava i taimi uma tagata moni o le Atua, ma o le tofotofoga e masani lava ona aumaia i
fa'aaliga/upu moni o le taimi lenei." – Loma Linda Messages, p. 33.
O le fuafuaga a Satani le fa'avaivaiina o le faatuatua o tagata o le Atua i Molimau.
Ona sosoo mai ai loa lea o le masalosalo e faatatau i vaega taua o lo tatou fa'atuatuaga, o
poutu o lo tatou talitonuga, ona masalosalo ai foi lea i le moni o le Tusi Paia, ona sosoo ai
loa lea ma le savali aga'i atu i lalo i le fa'afanoga. A masalosalo loa ma lafoa'ia Molimau ia
sa talitonu muamua i ai, ua iloa loa e Satani o i latou ua fa'aseseina o le a lē taofi ai iinei;
ma ia fa'aluaina ai loa ana taumafaiga seia o'o ina ia una'iina i latou i le tete'e fa'aaliali, lea
e matuā lē mafai lava ona fofō ma i'u ai i le fa'aumatiaga." – Testimonies, vol. 4, p. 211.
"Afai e te lē talitonuina molimau o le a ē tafea ese mai i upu moni o le Tusi Paia." –
Ibid., vol. 5, p. 98.
"O le fa'aseseega mulimuli lava a Satani o le fa'alēaogaina lea o le molimau a le
Agaga o le Atua." – The Faith I Live By, p. 296.

. A'o avea ma lamatiaga le teena o upu a perofeta moni, a'o le isi itu, o le a le
lapataiga o loo aumaia foi ia i tatou e faatatau i perofeta sese? Mataio 7:15; 24:24,
25; 2 Peteru 2:1, 2; 1 Ioane 4:1.
Aso Faraile Iuni 19
FESILI TOE FA'AMANATU
a. Na faapefea ona talanoa le Atua ma Atamu ma Eva i totonu o Etena?
b. O fa'apefea ona fetalai mai le Atua i Ona tagata i aso mulimuli nei?
c. Ta'u mai tiute masani o se perofeta.
d. Na faapefea ona tutusa le galuega a Elena Uaita ma galuega a perofeta anamua?
e. O le a se mea tatou te faia pe afai e tuia e Molimau o tatou loto, o tatou ala, ma mea
o loo tatou faatinoina?
Lesona 13 Sapati, Iuni 27, 2009
O Malō Tetele O Le Lalolagi Oi Le Valoaga
"Fa'aali mai ia, ma ia outou fa'alatalata mai; ia filifili faatasi foi i latou. O ai
ea ua na fa'ailoa mai lenei mea mai anamua, ua fa'aalia mai talu anamua? E lē o a'u
ea o Ieova? E leai se tasi atua, ua na o a'u lava; o le Atua amiotonu, i le ma le Faaola;
e leai se tasi na o a'u" (Isaia 45:21).
"O le Alii, o Lē na te silafia mea uma, o le a Ia fa'ailoa maia mea tonu lava ia e mo
le manuia silisili lava o Lana fanau; ma afai Na te silafia e tatau ona natia mea tutupu o le
lumana'i, e tasi lava le mafuaaga e ala ai ona Ia faia ona o Lona alofa ia i tatou, ma o le a
Ia galuea'iina lo tatou lelei silisili lava." – The Signs of the Times, August 19, 1889.
Faitauga Fautuaina: Prophets and Kings, pp. 492-502.
Ulua'i Aso Iuni 21
1. O LE MALO O PAPELONIA
a. O a upu o loo fa'amatala ai e perofeta le aai matagofie o Papelonia anamua?
Isaia 13:19; 14:4. Na faapefea ona aafia manatu o le tupu o Papelonia, o Nepukanesa
ona o le matagofie o Papelonia? Tanielu 4:30.
________________________________________________________________________

. A'o manatunatu Nepukanesa i le mamalu tele o lona malo, o le a se mea na
fa'aalia atu ia te ia i lana miti? Tanielu 2:1, 26-29, 31-38.
________________________________________________________________________
"O le miti o le tupua tele, lea na tatalaina atu ai i luma o Nepukanesa mea tutupu e
o'o atu i le i'uga o le taimi, na tuuina atu ina 'ia ia malamalama ai i le vaega na fuafuaina
na te faia i le talaaga o le lalolagi, ma le sootaga e tatau ona faia e lona malo i le malo o le
lagi. I le fa'amatalaina o le uiga o le miti, na fa'atonuina manino lava o ia e faatatau i le
faatuina o le malo e faavavau o le Atua." – Prophets and Kings, p. 503.
"O le Atua o le pule lea o loo pule aoao nei i mea uma o lenei lalolagi. Na te suia
taimi ma tau, Na te aveesea tupu ma fa'atuina mai tupu, ina ia fa'ataunuuina ai Lona lava
finagalo." – Manuscript Releases, vol. 1, p. 49.
Aso Gafua Iuni 22
2. METAI MA PERESIA
a. Na fa'apefea ona valoiaina mai le fa'aumatiaga o Papelonia? O ai
meafaigaluega fa'aletagata na fa'ataunuuina lena valoaga? Isaia 45:1, 2; Tanielu
5:30, 31.
________________________________________________________________________
"A'o sailia le Alii e i latou na tumau fa'amaoni i le Atua i le lotolotoi o Papelonia
ma latou suesueina valoaga o loo valoia mai ai lo latou lavea'iga, na saunia e le Atua loto
o tupu ina ia latou fa'ailoa atu le alofa i Ona tagata salamo." – The Review and Herald,
March 21, 1907.
b. O le a le mea taua na tupu i le nofoaiga a Tariu le Metai? Tanielu 6:13-22. O le
a le galuega taua na fuafuaina e fa'ataunuuina i le taimi o le malo o Metai ma
Peresia? Esera 5:13; 6:1; 7:12, 13.
________________________________________________________________________
"Na fa'asilisiliina Tanielu nai lo peresitene ma perenise ona sa ia te ia le agaga o le
Atua. . . . I le tala e faatatau i lana tatalo i le Atua, na lafoina o ia i totonu o le lua o Leona.
Na faapena ona faataunuuina ai le faufauga a agelu leaga. Peitai na fa'aauau ona tatalo
Tanielu, i totonu o le lua o Leona. Na fa'atagaina ea Tanielu ina ia fa'aumatiaina? Na
fa'agaloina ea o ia e le Atua iina? Oi e leai; o Iesu, le Ta'ita'i au malosi o le 'au uma a le
lagi, na Ia auina mai Ana agelu ina ia tapunia gutu o na Leona fia aai ina ia aua ne'i latou
fa'amanu'alia le tagata tatalo o le Atua, ma na filemu mea uma lava i totonu o lena lua
mata'utia. Na molimauina e le tupu lona lavea'iina ma aumaia ai loa ma le mamalu o ia i
fafo." – Ibid., February 18, 1862.

"Na malosi silisili lava o le lagi sa latou galulue i loto o tupu, ma na tuuina atu i
tagata o le Atua ina ia galulue ma le malosi sili lava ina ia fa'ataunuuina ai le poloaiga a
Kuresa." – Prophets and Kings, p. 572.
"O ta'ita'i o itumalo o le faigamalo uma o Metai ma Peresia, na latou asiasi atu i le
nuu uma na toe fo'i, ma na latou mananao ia i latou ina ia latou fa'ailoaina mai le igoa o lē
na fa'atonuina i latou ina ia latou amata ona toe fausiaina Ierusalema. Ana faapea e le'i
faatuatua tagata Iutaia i le Alii i le taimi lena mo le ta'ita'iga, semanu o se i'uga matuā
toilalo lava ia i latou na fausiaina pa o le aai, lenei manaoga na faia e tane sa i tulaga
maualuga o puleaga. 'Peitai sa i luga o toea'i'iina o Iuta fofoga o lo latou Atua, o lea na lē
mafai ai ona latou osofia i latou ina ia fa'amutalia le galuega, seia o'o ina o'o mai le
mataupu ia Tariu' (Esera 5:5). Na matuā poto lava le tali na tuuina atu i ta'ita'i o itumalo ia
na o mai o lea na latou filifili ai e tusia se tusi e avatu ia Tariu (Darius Hystaspes) le tupu
o Metai ma Peresia, ma taula'i ai lona mafaufau i le ulua'i poloaiga lea na faia e Kuresa,
lea na faatonuina ai ina ia fausia le fale o le Atua i Ierusalema, ma ia totogiina mai i oa a
le tupu mea uma e fa'aaluina mo le fausiaina o le fale o le Atua." – Ibid., December 26,
1907.
Aso Lua Iuni 23
3. ELENI
a. O le a le vaega o le tupua ma o le a foi le mea o loo faia a'i na faatusalia le malo
lona tolu o le lalolagi? Tanielu 2:39. Aisea na muta ai le malo o Metai ma Peresia ma
sosoo atu ai loa Eleni?
________________________________________________________________________
"O le malo o Metai ma Peresia na o'o mai i ai le toasa o le Atua ona sa solia i lalo o
vae Lana tulafono i totonu o lea malo. O le mata'u i le Atua e le'i i ai sona malosi i tagata.
O amiogaleaga, upu leaga, ma amioga pepelo, o aafiaga ia sa taatele i totonu o lenei malo;
ma o malo na sosoo atu ai na sili atu ona maulalo ma amioleaga lē fa'amaoni. Na latou
pa'ū maulalo ona sa latou lafoa'ieseina le Atua. O lo latou fa'agaloina o Ia, na latou pa'ū
maulalo ai ma atili maulalo ifo ai i le fua." – The Review and Herald, February 6, 1900.
"O le faia o ē ua oti ma atua, na matuā maualuga lava lona nofoaga i le tele lava o
fa'atulagaga fa'apaupau, e pei foi o talanoaga, i o latou lava manatu, ma tagata ua feoti. O
atua nei na talitonuina lo latou fa'ailoa maia o o latou manao i tagata, ma na talitonuina
foi, a fesiligia i latou, latou te aumaia foi fautuaga. O le tulaga lenei o le puna o le poto
lauiloa o Eleni ma Roma." – Evangelism, p. 603.
b. O le mulimuli i le fa'ata'ita'iga a malo e lua na mavae atu muamua, na
faapefea ona muta le malo o Eleni? Tanielu 7:6, 12; 8:5-8.
________________________________________________________________________

"O malo taitasi uma lava na tulai mai i le tulaga pule na fa'atagaina na te tulai i lona
nofoaga i luga o le lalolagi, ina ia iloa ai pe na te faataunuuina le finagalo 'o le Leoleo ma
Lē e Paia.' Ua tusia e valoaga le tulai mai ma le pa'ū o malō tetele o le lalolagi –
Papelonia, Metai ma Peresia, Eleni, ma Roma. I nei malō taitasi, e faapei foi ona faia i
malo e itiiti ifo lo latou malosi, na toe fa'aluaina ai le talaaga. Sa taitasi ona i ai i nei malo
lona vaegā taimi o le tofotofoga, sa taitasi nei malo ma toilalo, na mavae atu lona mamalu,
ma aveesea lona malosi, ma na tauaveina lona nofoaga ma lona tulaga e se isi malo." –
Education, pp. 176, 177.
"Mai i le tulai mai ma le pa'ū atu o malo e pei ona faamaninoina mai i totonu o tusi
o Tanielu ma Fa'aaliga, tatou te manaomia ai ina ia tatou a'oa'oina ma iloa le lē aoga ma le
faatauvaa o le mamalu i le vaaiga i fafo ma le fa'alelalolagi. O Papelonia, ma lona malosi
uma lava ma lona matagofie, e le'i toe vaaia lava e lo tatou lalolagi se malo faapea talu
mai ona taimi – o le malosi ma le matagofie lea na foliga mai i tagata o na aso na matuā
mausali lava ma tumau– a ua matuā mavae atoa atu lava! E faapei 'o le fuga o le mutia'
(Iakopo 1:10) ua matuā fano lava. Na faapena ona fano atu le malo o Metai ma Peresia,
ma malo o Eleni ma Roma." – The Faith I Live By, p. 345.
Aso Lulu Iuni 24
4. O LE MALO O ROMA
a. O le a le vaega o le tupua na faatusalia le malo o Roma, ma o le a foi le mea na
faia a'i? Tanielu 2:40. O a ni uiga o Roma?
________________________________________________________________________
"O u'amea i le tupua [lea na faailoaina atu ia Nepukanesa], faatusalia mai ai malo
eseese, na faaitiitia ma atili faaitiitia pea lo latou mamā ma lo latou aoga, amata mai i le
ulu aga'i ifo i lalo. O le ulu o le tupua na faia i le auro, o le fatafata ma ogalima na faia i le
siliva, o lona manava ma ona agavae na faia i le apa memea, ma ona vae ma tamatama'i
vae o le u'amea lea e fefiloi ma le omea. Na faapena malo na faatusalia mai e nei u'amea
na pa'ū maulalo lo latou taua." – The Review and Herald, February 6, 1900.
b. O a mea taua na tutupu i lalo o le puleaga a Roma? Luka 2:1-7; 21:20, 21. O a
vaega na vaevaeina mulimuli lava i ai le malo malosi o Roma?
________________________________________________________________________
"Na vaaia e agelu le au malaga vaivai, o Iosefa ma Maria, o aga'i atu i le aai a
Tavita, ina ia totogi a latou lafoga, e tusa ai ma le poloaiga a Kaisara Aokuso. O iinei, i le
taitaiga a le Atua, na aumaia i ai Iosefa ma Maria; auā o le nofoaga lenei na valoia mai e
le valoaga o le a fanau mai ai Keriso. Ua la sailia se nofoaga e malolo ai i le fale talimalo,
a ua teena i la’ua ona ua leai se avanoa. O tagata mauoa ma tagata mamalu ua taliaina, ma
ua latou maua meaai ma vaiinu ma potu e nonofo ai, a'o nei tagata malaga vaivai ua

una'iina i la'ua ina ia salia le sulufaiga i se fale maulalo e tausia ai manu gugū. O iinei ua
fanau ai le Faaola o le lalolagi." – Ibid., December 17, 1872.
"Na semanu e liliueseina e Keriso le fa'asalaga o le malo o Iutaia pe ana taliaina o
Ia e i latou. Peitai o le matau'a ma le loto leaga na avea ai i latou ma tagata lē alolofa. Na
latou finafinau ina ia aua ne'i latou taliaina Iesu o Nasareta e avea ma Mesia. . . . O o latou
lava uiga leaga, lē pulea, na galuea'iina ai lo latou faafanoga. O lo latou lilivau tauaso na
latou fa'aumatiaina ai e le tasi le isi. O lo latou faalialiavale faamaualuga tetee loto ma'a'a
na aumaia ai i luga ia i latou le toasa o o latou matai Roma o ē na pule ia i latou. Na
faaumatiaina Ierusalema, na taatia le malumalu i le faatafunaga, ma o le tulaga sa i ai na
matuā suatia e pei o se laufanua. O le fanauga a Iuta na fano i latou i le ituaigā oti sili ona
matautia. E miliona ma miliona i latou na faatauina atu ina ia auauna o ni tagata pologa i
nuu ese." – Prophets and Kings, pp. 712, 713.
"O le malo tele lava o Roma na nutilili'iina, o ona faatafunaga na tulai mai ai lena
pule malosi, o le Ekalesia Roma Katoliko lea." – The Youth's Instructor, September 22,
1903.
Aso Tofi Iuni 25
5. O LE MALO VAEVAEINA
a. O le malo o Roma na faatusalia mai e vae u'amea. O a mea o loo faia ai
tapuvae ma tamatama'i vae? Tanielu 2:41, 42.
________________________________________________________________________
"O lo tatou tulaga i le tupua o le miti a Nepukanesa o loo faatusalia mai e
tamatama'i vae, i se faigā malo vaevaeina, ma o loo faia i ni mea e lē mafai ona pipi'i
fa'atasi. Ua faailoa mai e le valoaga ia i tatou ua i o tatou luga tonu lava le aso tele o le
Atua. Ua matuā fa'ataalise mai lava." – Testimonies, vol. 1, p. 361.
b. O le a le mea na valoia mai e faatatau i le fefiloi o le u'amea ma le omea o vae
ma tamatama'i vae o le tupua? Tanielu 2:43. O le a le mea o le a tupu i le taimi o le
malo vaevaeina? Tanielu 2:44, 45; 7:18, 27; Salamo 37:29.
________________________________________________________________________
"O le tupua na fa'aalia atu ia Nepukanesa, a'o fa'ailoa mai le pa'ū maulalo o malo o
le lalolagi i lo latou malosi ma lo latou matagofie, o loo matuā fetaui foi le faailoaina mai
ai o le pa'ū maulalo o le tapuaiga ma amioga a tagata o nei malo. A'o fa'agaloina le Atua e
malo, ua faapena foi ona latou vaivai faaleagaga." – Manuscript Releases, vol. 1, p. 50.
"[Mika 4:8]. O le malo lea na aveesea ona o le agasala, ua toe maua mai nei e
Keriso, ma o le a fai mo le au faaolaina faatasi ma Keriso." – The Spirit of Prophecy, vol.
4, p. 489.
"O le fuafuaga tele lava o le faaolataga o lona i'uga o le toe aumaia atoa lava lea o
le lalolagi i le Atua. O mea uma lava na leiloa ona o le agasala ua toe fa'afo'isiaina mai. E

lē gata i le tagata a'o le lalolagi foi ua toe faatauina mai, ina ia avea ma nofoaga e
faavavau o le au faaolaina. E ono afe tausaga ua tauivi ai Satani ina ia na fa'atumauina
lana pule i le lalolagi. A'o lenei, o le ulua'i fuafuaga a le Atua i le foafoaina o le lalolagi,
ua fa'ataunuuina." – Patriarchs and Prophets, p. 342.
Aso Faraile Iuni 26
FESILI TOE FA'AMANATU
a. O le a le tala na matuā mata'u le tupu fa'amaualuga o Nepukanesa ina ua ia
faalogo i ai?
b. O le a se mea e mafai ona tatou a'oa'oina mai i le auala na galue ai le Atua i
totonu o loto o ta'ita'i faapaupau, e pei o Tariu le Metai ma Kuresa le Peresia?
c. O le a le lapataiga e tatau ona tatou talia mai i le tulai mai ma le pa'ū o malo
eseese?
d. Fa'amatala le malaia tiga lava na o'o mai i luga o i latou na teena Keriso.
e. O le a le mea o loo faatusa mai e le u'amea fefiloi ma le omea – ma o le a
faapefea ona i'u lenei vaega taimi?