Faamatua i se Aganuu Fou O se taiala mo matua ... - Spectrum

8
Faamatua lelei
O le a le auala aupito lelei e tausia ai fanau? E eseese auala a aganuu ma aiga taitasi, ma e le faia
e lenei taiala se faamasinoga poo le fea le auala e sili. Tasi le mea e tatau ona e faia o le faatinoina
lea o tulafono o le ‘faamatua lelei’. O lona uiga o le a’oa’oina lea o auala lelei e talanoa ai i lau
fanau, sailia auala fou e foia ai faafitauli ma a’oa’oina tomai fou. E aofia ai lou malamalama i
mafaufauga o lau fanau, taumafai ia faalogo mai i latou ia te oe ma e malamalama i mea mamafa
o loo feagai ma i latou i vaega taitasi o lo latou tuputupu a’e.
E mafai ona faafetaui le faamatua lelei i soo se aganuu. E aofia ai mea taua e lima e mafai ona e
faia mo lau fanau:
1. Saunia se olaga saogalemu ma le puipuia i le aiga
2. Fesoasoani i lo latou a’oa’oina
3. A’oa’o i matua ma fanau le foia o feeseeseaiga e aunoa ma le misa
4. I ai o ni faatatauga talafeagai
5. Tausia lelei o oe lava o le matua.
Avea ma faataitaiga lelei
Ia manatua pea o le tasi o aafiaga aupito tele o lau fanau e mai ia te oe. O le a mataina oe e lau
fanau ma o nisi taimi latou te faata’ita’i ia te oe i le faiga o mea. Mafaufau i ou lava matua: a’o e
taumafai e faaese mai oe ia i laua i le tele o faiga, e tele auala ua e soo ai ia te’i laua. O le avea
ma faataitaiga lelei mo lau fanau o le auala mautinoa lea e mafuta vavalalata ai ma i latou a’o
faasolo ina matutua.
Foia o Faafitauli
O le faataitaiga lelei e amata ai ona a’oa’oina auala fou e te fesoota’i ai ma lau fanau, o le muamua
ona e iloa o le auala na tausia ai oe. Pau lea, e mafai ai ona avea oe ma tagata mautinoa i mea
e tatau ona faia i le lumana’i ma mea e suia pe a tatau ai. Faamolemole amata le faataitaiga i lou
fesili ifo i fesili nei ia te oe.