Faamasinoga o Fanua & Suafa Tusi Taiala - PacLII

• le auai fa'alauaitele i talanoaga fa'a-upufai ua feteenai ae vagana ai i mataupu e faatatau tonu
ma a'afia ai le fa'agaioioiga o Faamasinoga, le tumaoti o Faamasinoga poo manaoga
fa'amaufa'ailogaina o le fa'afoega o le amiotonu;
• le sainia o talosaga e u'unaia ai se fa'aiuga fa'a polokiki;
E i ai i le auaiga o se Fa'amasino aia uma e auai ma le sogasoga i tulaga faa-upufai. O lenei tulaga, e i ai
taimi e ono a'afia ai manatu o tagata lautele e fa'atatau i le tulaga le faaituau o le Fa'amasino. Ae i soo se
mataupu ua i luma o le Faamasinoga e ono tulai mai ai se manatu fa'apea, o le'a le tatau ona se'ei pe saofai
ai lea Fa'amasino.
Feteenai Manaoga
E tatau i Fa'amasino lava i latou ona faaleaogaina pe tulai ese mai faamasinoga ua latou talitonu o le'a o
latou le mafaia ona fa'amasinoina ma le le fa'aituau.
E tatau ona tula'iese pe fa'aleaogaina e Faamasino i latou lava i soo se faamasinoga ua latou talitonu o le'a
ono i ai se masaloga a se tagata o tonuga lelei, sa'o ma malamalama i le fete'enaiga i le va o le aafiaga
patino o le Faamasino (poo le aiga o le Faamasino poo uo mamae poo pa'aga) ma le tiute o se Fa'amasino.
O le'a le talafeagai le faaleaogaina poo le tula'iese pe'afai:
• O le mataupu ua fa'amafua mai ai le manatu o le ono iai o se fete'enaiga e fa'atauva'a poo ua
le vasaga lelei se finauga e alagatatau ai le fa'aleaogaina poo le tula'iese.
• Ua leai nisi fa'amasino e fa'avae ai se Faamasinoga e tauaaoina le mataupu poo, ona o le
tulaga fa'anatinati ua aliae mai, ae leai se gaioiga e faia e ono tulaga mai ai se aveeseina o le
amiotonu.
5. Malosiaga Faa-le-Tulafono
Ua iai i le Faamasinoga o Fanua ma Suafa malosiaga uma fa'a-Faamasinoga o fa'amaumauga ma le pule
patino i mataupu ma finauga uma, fa'atatau i tu, aganu'u ma agaifanua a tagata poo le atunu'u o Samoa.
Silasila i le Vaega 1V: Pule a le Faamasinoga ua talanoaina auiliili ai malosiaga fa'a-le-tulafono o le
Faamasinoga.
6. Natura Fa'a-Suesuega
O le matafaioi a Fa'amasino o le Faamasinoga o Fanua ma Suafa e ese mai na i lo le matafaioi a
Faamasino o leisi lala o Faamasinoga i Samoa.
O lenei eseesega i matafaioi ua mafua ona e eseese fa'atulagaga faa-faamasinoga a lala taitasi nei.
• O le Faamasinoga o Fanua ma Suafa e fa'agaioia i se faiga fa'a-suesuega;
• O leisi lala o Faamasinoga i Samoa e fa'agaioia i le faiga fa'a-finau.
Novema 2003 Faamasinoga o Fanua ma Suafa Tusi Taiala