Faamasinoga o Fanua & Suafa Tusi Taiala - PacLII

Sa'olotoga o feoaiga ma nofoaga
I re the Constitution Taamale v Attorney - General (1995) WSCA 1 (18 Aokuso 1995; C.A. 2/95B, o i
latou na talosaga, o le aiga o Ta'amale, na o latou talosaga apili fa'asaga i le fa'aiuga a le Faamasinoga
Maualuga. Na fa'atumauina e le Faamasinoga Maualuga le poloaiga mo le fa'atulaieseina na faia e Alii
ma Faipule o Sapunaoa, Falealili lea foi na fa'atumauina e le Faamasinoga o Fanua ma Suafa. Sa finauina
e i latou na talosaga tete'e e fa'apea o lenei poloaiga ua solia ai la latou aia i le saolotoga o feoaiga ma le
saolotoga o le nofoaga e nonofo ai.
Na fa'aiuina e le Faamasinoga o Talosaga Apili e fa'apea e mafai e le Faamasinoga o Fanua ma Suafa ona
faia se poloaiga o le fa'atulaieseina ma o le fa'atulaieseina ua le solia ai le aia tatau i le nofoaga e nofo ai
po o feoaiga e pei ona fa'atulagaina i totonu o le faavae ona o le fa'atulaieseina o se fa'atatauga talafeagai
ua fa'atulagaina e tulafono fa'amamaluina mo le lelei o le tulaga toafilemu o tagata lautele.
I le Taipu v Sila ma isi (1983) WSLR 19, na faaiuina e le Faamasinoga Maualuga e faapea o le poloaiga
mo le fa'atulaieseina na faia faasaga i le na tagi, ona na musu e alu i le lotu, ua solia ai le aia tatau a le ua
tagi i le saolotoga o tapuaiga. O lona uiga o le poloaiga mo le fa'atulaieseina na faaiuina sa faia ma le le
tusa ai ma le tulafono. E taua le maitauina o le faamasinoga lenei aua e ese mai nai lo le faamasinoga a
Taamale ona sa finauina i luga o le saolotoga o tapuaiga ae le o le saolotoga o feoaiga poo nofoaga e nofo
ai.
Saolotoga o tapuaiga po'o aoaoga faa-tapuaiga
I le Sefo v The Attorney - General (2000) WSSC 18 (12 Iulai 2000), o i latou na tagi na talosaga apili i
le Faamasinoga Maualuga ona o le faaiuga a le Faamasinoga o Fanua ma Suafa. Na fa'atumauina e le
Faamasinoga o Fanua ma Suafa le faaiuga a Alii ma Faipule o Saipipi ina ia fa'atapula'a le numera o lotu i
lo latou nuu ma ia fa'asa i latou na tagi mai le fa'atinoina o aoga tusipaia poo sauniga lotu i Saipipi.
Sa finauina e i latou na tagi e fa'apea o lenei fa'aiuga ua solia ai la latou aia tatau i le sa'olotoga mo
tapuaiga atoa ai ma la latou aia tatau e fa'atatau i aoaoga fa'a-tapuaiga, ma e fa'apea o le Faamasinoga o
Fanua ma Suafa atoa ai ma Alii ma Faipule o Saipipi e le i ai so latou malosiaga fa'a-le-tulafono poo se
pule e faatapulaaina le saolotoga o tapuaiga ma aoaoga fa'a tapuaiga.
Na fa'aiuina e le Faamasinoga Maualuga e faapea o le Faamasinoga o Fanua ma Suafa atoa ai ma Alii ma
Faipule e le'i iai sa latou pule e faia ai se poloaiga e faatapulaaina ai tapuaiga i totonu o le nu'u ma o le
faia o lenei fa'aiuga ua solia ai le aia tatau o le saolotoga i tapuaiga o i latou na tagi. Na fa'aiuina foi e le
Faamasinoga Maualuga o nei aia tatau o le'a solia pe ana fa'atagaina le Fono a le Nu'u e fa'atapula'a le
numera o lotu i totonu o le nu'u poo le faapea sa tatau i tagata o le nuu ona sailia se fa'atagaga e amata ai
se lotu. Na teena foi e le Faamasinoga le finauga a le Loia Sili e faapea o le fa'atapula'aina o le saolotoga
o tapuaiga i lenei faamasinoga e tatau ona fa'atagaina e fa'avae lea i le tulaga ese aloaia o le "to'afilemu o
tagata lautele" o lo'o maua i le Tulafono o Fono a Nu'u 1990 ma le Tulafono o Fanua ma Suafa 1981.
Novema 2003 Faamasinoga o Fanua ma Suafa Tusi Taiala