Faamasinoga o Fanua & Suafa Tusi Taiala - PacLII

UPU TOMUA
Ua ou fiafia lava e fa'ailoa aloaia atu le ulua'i Tusi Ta'iala a le Fa'amasinoga o Fanua ma Suafa.
O lenei tusi ua fa'aagaga o se ta'iala mo Faamasino fa'atoa tofia ma o se to'omaga aoga foi i
Fa'amasino ua iai le poto masani o le Fa'amasinoga o Fanua ma Suafa.
O le matafaioi fa'a-le-faavae a le Fa'amasinoga ua avea ai Fa'amasino o le Fa'amasinoga o Fanua
ma Suafa ma itu-tino, o le fa'atinoina lea o le mea moni ia tutusa tagata uma, fa'amaoni ma le le
fa'aituau e tusa ai ma le tulafono ma molimau ua i ona luma, e aunoa ma se u'unaiga po'o se
faatosiga mai tua ma, aunoa ma le fefe po'o se fa'atu'ala mai o so'o se tasi. O se Faamasinoga
tumaoti o le aia tatau a so'o se Samoa.
O lona uiga, o Fa'amasino o le Fa'amasinoga o Fanua ma Suafa , e iai lo latou tiute o le tausia lea
ma malu puipuia le tulaga tumaoti o le Fa'amasinoga, ia le o se fa'amanuiaga o le tofi fa'amasino,
ae ona o le aia tatau fa'amaufa'ailogaina faa-le-faavae a tagata uma ina ia fofogaina ma iloiloina a
latou fe'ese'eseaiga e fa'amasino ua le fa'aituau e tusa ai ma tulafono.
O le Fa'amasinoga o Fanua ma Suafa, e masani ona fa'aupuina o le Fa'amasinoga a le atunu'u, ua
le aunoa ma to'atuga e la te fetaia'i i le faatinoina o lana matafaioi. E manino lelei, e le mafai ona
fa'amalieina e le Fa'amasinoga tagata uma. O le a iai pea faitioga ma fa'ameo mai i itu auai ua
fa'agaulemalie, e pei ona maitauina i le fuainumera fa'atupulaia o talosaga mo le toe iloiloina o
fa'aiuga.
I le maitauina la o nei mea, ua ou fautuaina ai Fa'amasino o le Fa'amasinoga o Fanua ma Suafa
ina ia fa'avagavaga ni taimi e fa'alautele ai lo latou silafia, sogasoga, fetalaa'i, tausili ma le filiga
e fa'amapu'e atili lo latou tomai faalegaluega ma le faatuatuaina.
O le tofa manino o le malosiaga lea e tumau ai pea se tasi e sa'oloto ma le fefe e tauave ona tiute
ma le pulunaunau ma le le femoumoua'i. O le a'oa'oina pea o le ki lea, ma o le mafua'aga tonu
lea o le fa'aauauina pea o faiga e fa'afaupu'e ai le malosiaga o tagata taitoatasi ma
faalapotopotoga i le lalolagi atoa. O lenei Tusi Taiala o lo'o fa'atula'i mai ai se laasaga lelei tele
mo lea tausiliga.
O tusitusiga o loo i lenei Tusi Taiala ua le fa'apea o le talanoaina mae'a ma le auiliili lea o le
matafaioi a le Fa'amasinoga o Fanua ma Suafa, ua le o mea uma foi ia e tatau i se Fa'amasino o
lena Fa'amasinoga ona ia silafiaina. O lo'o aofia ai i lenei Tusi fa'amatalaga aoga ma le anoa, ae
ua saunia faapitoa lava e maua mai ai se fesoasoani vave ma faigofie i le taua'aoina o
taualumaga, ma ia faigofie foi ona tagai iai a'o faagasolo se Fa'amasinoga.
E 8 ni Vaega ua faatulagaina ai le Tusi Taiala. O le Vaega I ma le II ua fa'amatalaina ai le
faatulagaga o lo'o fa'agaioi ai le Fa'amasinoga o Fanua ma Suafa. O Vaega III i le VIII o lo'o
faamanino ai tulafono ma faiga o lo'o aiaiaina ai le fa'agaioiga o le Faamasinoga o Fanua ma
Suafa ma faataatia mai ai taiala ma fa'amaninoga.
Novema 2003 Faamasinoga o Fanua ma Suafa Tusi Taiala