İslam Səfərli

_____________Milli Kitabxana_____________
SƏMƏD GEDƏN MAŞINDA MƏN
İldırımlar vermir ara,
Dırmanırıq göy dağlara.
Maşın gedir ağır-ağır,
Uzaqlara yağış yağır,
"Ölən şəhər" dalda qalır.
Ağ buludlar qanad çalır –
Şahin görmüş durna kimi
Dəyişərək səmtlərini
Ötüb keçir üstümüzdən –
O, çəkinir deyən bizdən.
* * *
Qızıl-ala darvazatək
Qövsi-qüzeh düşdü yola.
Maşın qalxdı tövşüyərək,
Yollar dedi: Uğur ola...
Şofer dönüb mənə baxdı:
Əlli dörddə lap bu vaxtı,
-Bu maşında yanımdaca
Səməd Vurğun yol boyunca
Qaşlarını dartıb yaman
Düşünürdü zaman-zaman..."
Xatirələr nə dadlıdır,
Xəyal şahin qanadlıdır.
Sanıram ki, "Piyaz dağı"
Elə bilir Vurğun gəlir.
(Tutulubdur qaşqabağı,
Nədən belə yorğun gəlir?)
Şofer həmin o şoferdir,
Həmin məkan, həmin yerdir.
Qarlı zirvə nə soyuqdur,
Bu büsatda nəsə yoxdur.