İslam Səfərli

_____________Milli Kitabxana_____________
LAYLAY
Göydə bulud lal keçər,
Axar sular dayanar.
Oxuma, şeyda bülbül,
Ceyran qızım oyanar.
Laylay, beşiyim laylay,
Evim, eşiyim laylay.
Qayalarda sürünür,
Yenə səhər dumanı,
Şirin yuxu yat, qızım,
Olum gözün qurbanı.
Laylay, beşiyim laylay.
Evim, eşiyim laylay.
KÖNÜL MAHNISI
Təzə eşqə düşən könlüm,
Mizrab götür, teli dindir.
Çəmənə çıx, seyrana gəl,
Bülbül olub gülü dindir.
Mən nazlıyam, sən naz çəkən.
Naz yaraşar nazlı yara.
Əsən külək, şana götür,
Tellərimi özün dara.
TƏRANƏ
duet
Oğlan: Sönməz gözünün atəşi bu mavi Xəzərdə,
Nöqsan da tapılmaz, aman allah, bu gözəldə.
Qız:Yadlar da olubdur sənə heyran, mənə heyran
Kim ki, bizi sevmir sənə qurban, mənə qurban.