Descargue o libro - Consello da Cultura Galega

[4]
[CARTA SOBRE A ORIXE E FORMACIÓN
DA LINGUA GALEGA EN RESPOSTA A ESTEBAN
DE TERREROS]
Reverendísimo Padre Maestro:
1. Dono, amigo e moi señor meu: ás dúas peguntas que
Vosa Reverencia se serviu facerme na súa carta de 11 de
decembro de 1754 non foi posible responder lixeiro, xa pola
gran distancia que hai desta vila de Pontevedra a Madrid, xa
pola estudiada ausencia que fixen desta vila, fuxindo da
molestia de visitar e ser visitado en tempo de pascuas (como
escribo na carta familiar xunta), xa porque vivindo aquí sen
os meus libros e desexando servir V. R. polo menos con moita
verba, non me era doado responder á volta de correo. O
caso é que aínda que eu me atopase no centro da miña cela
empapelado cos cinco mil libros que a ocupan, non podería
servir V. R. senón con parola e co corazón.
2. Isto débese á escuridade da pregunta primeira e no
pouco que hai escrito da segunda. Non se pode falar da orixe
da lingua galega sen ensarillarse na orixe das outras linguas
ou no labirinto non creditorum, que é máis enguedellado e
inextricable por non se ter atopado ata agora ningunha Ariadna
que lles comunicase o fío, ou para saír a salvo ou para formar
algunhas fías máis que de congruencia. Teño notado que
os que queren indagar a orixe dalgunha lingua fan o que algúns
xenealoxistas alugados, que queren apurar ata o ovo de
Leda a orixe dalgunha famila coñecidamente nobre. E do