afriga dossier: mamite - Transmedia 2009

40
EXPLOTACIÓN
Os xatos acabados de nacer
permanecen en boxes colocados no
exterior da nave
Os cubículos, situados na parte central da nave, son de biomasa
sobre a que se deposita unha capa de cal e serrín
A granxa conta con dous depósitos de xurro, con capacidade
para 980.000 litros e situados debaixo da nave. De
momento non separan o sólido e o líquido, se ben é algo no
que xa pensaron de cara ao futuro.
Todo o gando está estabulado e practican a separación
por lotes. As vacas de produción están separadas das secas,
mentres que as xovencas permanecen nas instalacións vellas.
Á súa vez, estas últimas organízanse por lotes de idade
para controlar a súa alimentación e desenvolvemento.
Ademais, faise pastoreo coas vacas secas e coas xovencas
próximas ao parto.
En canto á recría, non toda se realiza na granxa. Unha
parte vai para o Rancho Las Nieves aos poucos días de nacer,
onde permanece ata que a xovenca, xa preñada, está próxima
ao parto. E non toda se destina á propia produción leiteira,
xa que a cría é moi superior á capacidade da granxa, polo que
venden unha media de catro xovencas ao ano.
A idade media da primeira inseminación é aos 15 meses,
se ben as do centro de recría se inseminan aos 13 ou 14 en
función do tamaño e o peso. A media de inseminacións por
preñez é de dúas doses e media e o intervalo entre partos
sitúase en torno aos 400 días.
RACIÓN E FORRAXES
En Cesares Holstein optan por unha alimentación equilibrada,
pero tamén sinxela e económica debido aos actuais
prezos do leite. A ración faise para 42 vacas, non varía en
función dos litros de leite que produce cada unha e está
integrada por 250 gramos de palla, 8 quilos e medio de
penso, 9 quilos e medio de silo de herba e 28 quilos de silo
de millo. A que si varía é a dieta das vacas secas, a base de
palla, herba seca e pastoreo. En canto ás xovencas, a súa
ración componse de herba seca, palla e penso.
AFRIGA ANO XVII - Nº 92
As vacas poden rascarse cando queren
con este cepillo mecánico
Vista xeral dos comedeiros
A RACIÓN É EQUILIBRADA, SINXELA
E SIMILAR PARA TODAS AS VACAS EN
LACTACIÓN
Cesares Holstein conta con 17 hectáreas de superficie
agrícola propias e outras 10 alugadas. O terreo divídese en
18 fincas caracterizadas polas súas pequenas dimensións e
pola dispersión xeográfica existente entre elas.
A maior parte (20 hectáreas) dedícase ao cultivo de millo
(ciclo 300 e ciclo 400) para silo, aínda que antes se sacan
dous cortes de herba westerwold. As boas condicións do
terreo para o cultivo do millo quedan demostradas cuns
resultados medios de 65 toneladas por hectárea. Outras
dúas hectáreas e media destínanse a raigrás (dous cortes
para silo e un para seco). O resto emprégase para pastoreo.
A maquinaria coa que traballan téñena en propiedade.
Trátase de tres tractores de 161, 100 e 70 cabalos, respectivamente,
carro mesturador de arrastre horizontal, dous
rastrillos, dúas cisternas, un remolque, un autocargador,
unha abonadora e un arado de tres regos. Tamén posúen
unha fresadora, unha sulfatadora e unha rotoempacadora
en sociedade con outro gandeiro da zona. Por outra parte,
para a realización de tarefas como a campaña do millo optan
polo sistema de contratación externa do servizo.
MELLORA GANDEIRA
Segundo Domingo Ces Ares, o segredo para conseguir
unha boa selección gandeira está na elección dos touros.
Pero tamén recoñece que unha boa xenética sen máis non
equivale a unha boa produción. En cambio, unha vaca cunha
xenética normal chegará a ser unha boa produtora leiteira
se conta cun bo manexo, un bo confort e unha boa
alimentación.
Na granxa inclínanse por touros moi equilibrados. O encargado
da selección é Domingo. O primeiro no que se fixa
é na morfoloxía do animal, sobre todo na profundidade
do ubre (que sexa superior a +5 en touros canadenses e a
+1,5 nos nacionais e americanos) e nas patas (sobre todo
no ángulo podal e na vista posterior). Ademais, repara en
que teñan boa calidade de óso e angulosidade.
Aos datos de produción non lles dá tanta importancia,
aínda que busca touros que non sexan negativos en graxa e
proteína. Así mesmo, préstalle especial atención ao nivel de
células somáticas (que sexa o máis baixo posible), así como
á saúde e á vida produtiva do animal.