Lindeiros Noviembre Decembro 2015

8 Santiago
Lindeiros
Doce codelas de millo. (IV)
A muller na caixa
por Jorge del Oro Aragunde
-¿Podo levar unha destas cabazas, avoa? -preguntou Marina toda
contenta.
-¿E logo para que a queres? -respondeulle a avoa mentres
desplumaba un polo.
-É para a festa de Halloween...
-¡Ai! ¡A trapallada esa do “ghalogüín”! -bufou a vella-. ¡Boa gana
tedes de estragar unha cabaza cunha festa de fóra!
-Chámalle Samaín, se queres, que ao final vén todo do mesmo
-defendíase fera a Marina.- Trátase de celebrar que os defuntos
están máis preto dos vivos...
-Os defuntos non se achegan a ninguén -interrumpiuna brusca,
secando as mans contra o mandil-. Cando un marcha non
volve. Todo o demais son contos que nacen do medo, da mala
conciencia e de catro cousas raras.
Marina sacou un paquete de galletas do peto e ofreceulle unha á
avoa coma quen non quere a cousa.
-¿Cousas raras coma cales? -preguntou sorrindo.
A avoa colleu unha; eran de chocolate.
-A familia do teu avó coidaba da igrexa -empezou a contar,
logo de dar un bocado-. Sempre deron acólitos, campaneiros
e sancristáns. Cando el era un rapaz o enterrador e mais o seu
axudante foron baleirar un nicho dos importantes, dos que
hai dentro do templo. Mandaron a teu avó a limpar a sancristía
porque dicían que era demasiado novo para axudar con aquilo.
Ao cabo dun anaco apareceron espantados na sancristía, dicindo
que a defunta do nicho non estaba morta de todo. El botuse a rir e
chamoulles parvos; que tal cousa non era posible. Eles desafiárono
a ir vela, que se atrevese a ir alí atravesando a igrexa ás escuras. E
teu avó marchou todo teso, sen pensalo. Era inverno e na igrexa
non había máis luz ca un par de farois dos enterradores e varias
candelas prendidas. Foi ata o nicho, que tiña a pedra sacada e
a caixa a medio caer no chan. A tapa soltárase e dentro había
unha muller amortallada. Estaba tan enteira coma o día que a
enterraron; ou iso parecía. Teu avó achegouse ben e puido ver
que a pel era un coiro seco, os ollos estaban afundidos e baleiros.
Sempre que o contaba dicía que debeu ser unha muller ben
bonita para lucir así despois de corenta anos enterrada. Tentou
a caixa co pé e o corpo moveuse coma se quixese saír porque
non pesaba nada. Unha cousa rara, si, pero o nicho estaba lonxe
da humidade, a caixa chea de teas e a muller xa era fraca cando
a enterraron. Era cousa diso e non de asuntos de aparecidos
ou medio mortos. Volveu á sancristía, onde os enterradores
escorrentaban o medo co viño da misa. “Está seca coma un coiro,
papóns” dixo facendo mofa deles. “¡Cagho no demo, Xan! ¡Es
igual ca teu pai; non lle tes medo a nada!”. El mirounos todo serio,
cun aire de persoa insultada. “Si, teño tal” replicoulles. “E logo ¿a
que lle tes medo ti, trasno?”, preguntoulle o enterrador inquedo,
esperando outra burla das súas. “Á fame”, contestou.
Ames baixa o IBI sen acordo claro dos grupos
Aprobouse con 9 votos a favor e 12 abstencións
Unha baixada de impostos
que non queda clara, a oposición
amiense presentou distintas
propostas aínda que deixou que
o goberno municipal seguira co
seu plan.
O executivo informou no pleno
de outubro que a súa intención é
establecer medidas de fiscalización
progresivas coa intención
de redistribuír os recursos e incorporar
novas bonificacións.
En este contexto explicouse que
o IBI baixa de 0.5 a 0.44 eliminando
reducindo a taxa imposta
nos últimos 4 anos. Os inmobles
desocupados durante dous anos
terán un recargo do 25% e existen
distintas bonificacións para
as familias numerosas con membros
en paro ou para as vivendas
que instalen sistemas de aproveitamento
térmico o eléctrico de
enerxía solar.
Antes estas propostas Pacto X
Ames presentou enmendas encamiñadas
a baixar o imposto
ao 0.40 pero a falta de informes
técnicos impediu a votación das
mesmas.
Ciudadanos mostrouse máis
favorable a que as baixadas foran
progresivas e Ames Novo propuxo
debater primeiro os orzamentos
do 2016 para saber si esta
baixada de impostos, e a consecuente
diminución de ingresos,
pode afectar a prestación dalgún
servizo municipal.
Fontes: Ames Novo, Ciudadanos,
concello de Ames, Pacto x Ames,
Lindeiros
Oroso actualiza as ordenanzas fiscais
Os cambios seguen o establecido no plan de saneamento do 2009
O pleno de outubro en Oroso
caracterizouse pola unanimidade
xa que todos os grupos municipais
fixeron valer o acordo
tomado polo pleno en xuño de
2009, data na que se aprobou o
Plan de Saneamento Económico
e Financeiro que establecía as
actualizacións das distintas taxas
municipais nos seguintes anos.
A partir do 1 de xaneiro de
2016, o imposto sobre bens inmobles
pasa do 0,46% ao 0,47%;
o coeficiente do imposto sobre
vehículos de tracción mecánica
pasa do 1,16 ao 1,17; e o imposto
sobre o incremento de valor dos
terreos de natureza urbana actualízase
ao 2,64% (sobre o 3,7%
máximo que permite a lei) e a
taxa do lixo medra unha media
de 13 céntimos.
Por outra banda, a taxa pola
subministración de auga reducirase
nun 0,5%, de acordo coa
baixada do IPC. E é que a taxa de
abastecemento de auga non está
incluída nas actualizacións previstas
dentro do Plan de Saneamento
Económico Financeiro,
senón que depende da evolución
do IPC.
O pleno aprobou a modificación
da ordenanza fiscal reguladora
dos prezos públicos pola
prestación de servizos culturais,
educativos, deportivos e de ocio,
que supón un cambio na xestión
dos mesmos e substitúen ao
modelo de autoliquidación. Así
mesmo, aprobouse unha nova
ordenanza fiscal reguladora do
prezo público das instalacións
deportivas municipais, que sinala
que as asociacións que queiran
utilizar de balde as instalacións
deberán estar rexistradas no
Rexistro de Asociacións do Concello
de Oroso.
Fontes: concello de Oroso, Lindeiros
Ordes sumarase aos camiños ao cole seguros
O último pleno aprobouse unha moción do Psoe en este sentido
O primeiro da bisbarra en recuperar
a tradición foi Santiago e
parece que o seguinte será Ordes.
A voceira socialista, Verónica
Gómez, defendeu a importancia
de acometer o camiño escolar seguro
para nenos e nenas a partir
de 2º de Primaria que se dirixan
aos CEIP Castelao e Campomaior
e conseguiu que a súa pro-
posta fora aprobada.
Verónica Gómez sinala que
“haberá que establecer un punto
de encontro para que se xunten
todos os nenos con algún pai da
ANPA, que terá que controlar
que todos os nenos que están
anotados nesa parada cheguen
correctamente ao colexio así
como agardar se algún deles queda
rezagado na marcha”. Ademais,
os socialistas propoñen a
participación dos establecementos
a través da colocación de distintivos
para que, se algún neno
ou nena se desorienta, saiba que
pode preguntar neles.
Fontes: Psoe Ordes, Lindeiros