O15. A cidadanía toma a palabra

32
Opinión
Xulio Ferreiro
Hai Marea!
Candidato
da Marea Atlántica
á alcaldía da Coruña
Temos
un
desexo
común
O próximo 24 de maio temos
diante de nós a oportunidade
de facer historia na cidade
da Coruña. Somos moitas as
persoas que non podemos
seguir indiferentes diante do
xeito en que se nos está a gobernar.
Somos moitos os veciños
e moitas as veciñas desta
cidade que xa non aturamos
que as institucións públicas,
incluído o noso Concello, se
poñan ao servizo duns poucos
e esquezan a súa verdadeira
función: defender os intereses
da maioría social, protexer aos
cidadáns máis golpeados pola
situación económica, polo desemprego,
pola precariedade,
pola pobreza.
Somos multitude os que non podemos mirar para outro
lado diante da corrupción, os que xa non queremos
ver máis como os nosos gobernantes exercen os seus
cargos coa única intención de enriquecerse, de usar a
súa influencia e as súas funcións públicas para mercar
e vender favores, para gañar as simpatías das elites. Somos
maioría as persoas que xa non podemos consentir
que os bens comúns, os que pertencen a todos e a todas
por igual, se poñan ao servizo dos de sempre, xa sexan os
parques, a auga que bebemos, o mar, o territorio, a sanidade,
a educación, os nosos servizos de benestar. Estamos
fartos de ver como se utiliza iso que chaman crise
económica para quitarlle aos que menos teñen e engordar
o peto dos que nunca terán suficiente.
Pero somos unha inmensidade os que cremos que isto
vai cambiar. E nas vindeiras eleccións municipais imos
comezar a darlle a volta a esta situación. Imos empezar
a poñer por diante os valores da honestidade, do benestar
de todas as persoas, da xustiza, do respecto aos bens
comúns. E imos comezar pola cidade que vivimos e queremos,
pola Coruña. Porque como di Manuel Rivas no
interior deste xornal, na Coruña existe hoxe un proceso
de unión, un proceso de xustiza social e un proceso de
esperanza. Un proceso que vai contribuír dende este recuncho
do mundo que habitamos a unha sociedade mellor.
Este proceso chámase Marea Atlántica.
Na Marea Atlántica confluímos, coincidimos, xuntámonos,
convivimos moitos homes e moitas mulleres,
mozas e mozos que decidimos pasar da indignación
á acción. Que perdemos o medo, que xa non estamos
paralizados. Temos ideas, temos experiencias e temos
ganas de facer as cousas ben. E sabemos como facelas.
Estas páxinas son a mostra. Estas páxinas conteñen
un proxecto de cidade. Un proxecto que non se mide
en metros cúbicos de cemento. Mídese en toneladas
de ilusión, de capacidade, de honestidade. Estamos
a facer cousas que nunca antes se fixeran. Estamos a
devolverlle a esperanza a moita xente. Estamos a poñer
de acordo a organizacións políticas e sociais que,
compartindo os mesmos valores, levaban demasiados
anos combatendo en solitario. Conseguimos respectar
as diferenzas e reunirnos nun desexo común. O desexo
de comezar a construír dende xa unha cidade máis xusta,
máis habitable, máis nosa. A cidade que queremos e
que imaxinamos. A cidade que hoxe non vemos e que
nos gustaría ver.
Este é o proxecto que quere encarnar a Marea Atlántica.
Propoñemos un xeito diferente de gobernar unha cidade
e unha cidade diferente que gobernar. Unha cidade
aberta, diversa, como sempre foi A Coruña, que lle sexa
devolta ás persoas ás que sempre pertenceu, aos veciños
e ás veciñas de Eirís, de Monte Alto, dos Mallos, dos Castros,
da Cidade Vella, da Praza de Lugo, do Birloque, de
Elviña, do Portiño... Un goberno transparente, participativo,
democrático, ético, comprometido coa súa xente,
que teña claras as súas prioridades. Con sentido común
e sentido do común. En definitiva, esa Coruña que
sempre soñamos e que non podemos construír sen ti.
apoia
a marea
atlántica!
MOITAS
PINGAS
xuntas
FAN UN MAR
ENTEIRO
A Marea Atlántica ten un proxecto
para A Coruña, pero só co teu esforzo
poderemos facer unha campaña
gañadora e sen deberlle nada a ningunha
entidade financeira.
Máis información:
www.achegas.mareatlantica.org