afriga - Transmedia 2009

76
SANIDADE
Unha boa ventilación que reduza as condicións de
temperatura e humidade é fundamental para evitar a
proliferación de moscas
As moscas poden transmitir multitude de enfermidades, sendo
de especial interese no gando vacún leiteiro as mamites de
verán. Foto: Rosana Tenreiro Merlán
Un axeitado manexo dos refugallos permite actuar decisivamente
no control destes insectos.
Actualmente hai dispoñibles produtos con microflora
liofilizada, constituída por enzimas e bacterias non patóxenas,
que aceleran a fermentación do esterco e do xurro, de
maneira que, sen perder as súas características como abono,
non cheiren a amoníaco nin se poñan duros, formando
costras por riba. O feito de que permanezan en estado líquido
impide que as moscas críen alí. Ademais, este esterco
é máis doado de estender, quedando máis fino sobre o
prado, o que impide o desenvolvemento das larvas.
O control biolóxico dos insectos pódese acadar tamén
mediante a actuación dos seus inimigos naturais: distintos
tipos de artrópodos depredadores de ovos e larvas de moscas
que se desenvolven naturalmente no esterco.
Existen numerosos traballos onde se estuda a actuación
de pequenas avespas que poden actuar como axentes de
control, coma as do xénero Spalangia, que parasita as pupas
das moscas. A femia emprega as pupas para poñer os seus
ovos, que se desenvolven nelas ata converterse en adultos, e
neste proceso a avespa aliméntase da pupa da mosca, destruíndoa
completamente.
Tamén existen estudos sobre o fungo Entomopthera spp,
que produce unha gran mortalidade das poboacións de
moscas en condicións de alta humidade ambiental.
A Musca domestica é unha das moscas que se atopan con maior frecuencia no
interior das explotacións
As cintas adhesivas constitúen un bo complemento a outras técnicas de control
das moscas. Tamén poden empregarse para monitorizar a efectividade das
medidas que se están levando a cabo. Foto: María Soilán López
MEDIDAS DE CONTROL QUÍMICAS
Os procesos químicos inclúen a aplicación de larvicidas,
adulticidas e outros métodos combinados. Estes insecticidas
matan as moscas por contacto, inhalación ou inxestión.
É especialmente importante lembrar que, para levar a cabo
estas medidas de control, é imprescindible utilizar produtos
específicos, nunca mesturas caseiras, e aplicar as doses
recomendadas polo fabricante.
a) Loita química contra as larvas
Na actualidade, para o control das larvas de moscas empréganse
os chamados reguladores do crecemento dos insectos
(IGR), que debido á súa forma de actuación non son
eficaces contra as fases adultas do insecto. Estes produtos
deben aplicarse nas zonas onde se dan as condicións idóneas
para a cría das moscas, como preto dos bebedeiros, comedeiros
e, sobre todo, nas instalacións onde se almacenen
o esterco ou o xurro. É importante sinalar que o tratamento
contra as larvas nos refugallos debe comezar a aplicarse
antes da tempada de máxima infestación de moscas.
AFRIGA ANO XV - Nº 80