afriga - Transmedia 2009

10
CONVOCATORIAS
Fotos: Fernando Rodríguez Gandoy (Africor Lugo)
MOSTRA EXPOSICIÓN DE MUIMENTA. COSPEITO, 3-5 DE ABRIL
As gradas e os arredores da pista
estiveron ateigados de público
ESPECTACULAR XXIII EDICIÓN DO CONCURSO DA
MOEXMU, CON PREDOMINIO DE RESES ADULTAS
A Mostra Exposición de Muimenta, no concello chairego de Cospeito, celebrou este
ano as súas vodas de prata e tamén a vixésima terceira edición do concurso de gando
frisón. Foi unha edición de gran vistosidade na pista, con 94 animais pertencentes a 28
ganderías. A maioría, reses adultas.
CONCURSO PIONEIRO EN
DOUS DETALLES
No XXIII concurso de gando frisón
da Moexmu, por primeira vez en
España, incluíuse unha sección
para primerizas de ata 26 meses. A
organización estimouno conveniente
por ser cada vez máis as vacas
que paren por debaixo desa idade,
evitándolles así ter que competir con
animais de ata 30 meses.
Esta última edición da Moexmu
deixará tamén pegada no mundo da
raza frisona por un curioso detalle:
foi a primeira vez que un portugués
xulgou un concurso de gando no
Estado español. José Manuel Simoes
Dias, da Asociación Holstein
de Portugal, foi o encargado de
emitir os dictames da proba. Con el
desprazouse ata a Moexmu Carlos
Diogo, presidente da Asociación
Portuguesa de Criadores de Raza
Frisona (APCRF).
Un excelente ambiente puido gozarse
no XXIII concurso de gando frisón da Moexmu,
os pasados 4 e 5 de abril, coas gradas
cheas de público e unha gran calidade de
animais en pista. O feito de que a maioría
das reses a concurso, prácticamente o 60%,
fosen vacas fixo que a proba resultara este
ano especialmente espectacular. Gozaron
os criadores, gozaron os espectadores e os
premios estiveron moi repartidos.
O concurso e a exposición de gando,
sen dúbida os pratos fortes desta cita, tiveron
como complemento, como é habitual,
a exposición de maquinaria agrícola,
produtos galegos de calidade, automóbiles
e artesanía popular no recinto feiral
Manuel Vila López. Este veciño que
lle dá nome ao recinto, un dos primeiros
promotores da Moexmu, foi este ano o
encargado de pronunciar o pregón de
apertura da feira o venres 3.
A mañá do sábado 4 dedicouse ás
seccións de animais novos. O título de
xata campiona foi para Nodi Affirmed
Lola, da gandería Nodi de Barreiros.
Esta xata xa fora segunda de sección
(8-10 meses) no campionato autonómico
de gando frisón do 2008. A súa
nai, unha Iron, vén quedando entre as
tres primeiras de sección nos dous últimos
campionatos autonómicos. O xuíz
de pista definiuna como unha gañadora
sobrada, destacando o seu arco de costela
e a súa grupa.
O título de xovenca campiona foi para
Sandamil Decker Melany, da gandería
Sandamil de Castro de Rei, que xa
triunfara na súa sección no campionato
autonómico do 2008. Trátase dunha xovenca
con moita potencia no terzo anterior,
fortaleza de lombo e boa colocación
de patas.
AFRIGA ANO XV - Nº 80