Descarga en formato PDF (4 MB) - Centro Ramón Piñeiro para a ...

xornais sobre as súas obras. Así, no artigo “Poesía e vida”, cuxa data
descoñezo, afirma: “En Vigo vive un gran poeta. Vive en Solitario.
Eduardo Moreiras es el nombre. Su último libro, ‘Los oficios’, es uno
de los más bellos libros de poesía escritos en estos últimos años...”.
Cando sae a versión de Moreiras do Xardín dos Cabaleiros de Malta
(Buenos Aires, 1955), Cunqueiro publica o fermoso artigo “Jardín de
los Caballeros de Malta”, do que din unha copia completa nos meus
estudos sobre as traducións poéticas de Moreiras 20 . En fin, de
Cunqueiro é o Limiar do segundo poemario galego de Moreiras,
Paisaxe en rocha viva (1958), onde poden lerse cousas como estas: “Por
de depronto hei de anunciar que ‘Paisaxe en rocha viva’ é o libro de
poesía escrito na nosa lingua galega que eu poño á cabeza dos publicados
despoixas da colleita dos anos trinta...”.
Emporiso, hai un momento, posiblemente despois deste Limiar,
ó meu ver ben gabancioso, en que os dous poetas deixan en suspenso
a súa amizade, a súa camaradería, de xeito que pasan a unha especie
de silencio desdeñoso e a saudarse cortesmente e nada máis cando se
ven pola rúa. Algún día haberá que explicar isto. Eu teño a miña teoría,
pero carezo da ousadía e da seguridade precisa para escribila. De
feito, as veces que fala Moreiras de Cunqueiro en Follas de vagar (lembremos
que é un diario só dos anos 1969 e 1970) e, sobre todo, o pouco
interese posto nelas, especialmente se as comparamos con canto vimos
nas alusións a Luís Pimentel, falan por si mesmas: a admiración polo
poeta queda viva, porque non pode morrer, pero agora é vista con non
disimulado alonxamento, malia seren moi fermosas:
“Álvaro Cunqueiro escribe igoal que cantan os grilos. Óiese de
lonxe o esfregar dos élitros que enchen de música a mañán.
Acheguémonos a modiño, descalzos pola herba”. (FV, p. 119)
“Álvaro Cunqueiro: Sitúa ben nun contexto artificioso o punxente
poder da súa imaxinación”. (FV, p. 132)
“Asegún a mística proustiana, cando morra Álvaro Cunqueiro
baixarán os anxos ás vitrinas das librerías e apañarán o 'Merlín', pra
léelo no Paradiso”. (FV, p. 174) 21 143
20
A. Pociña, “Eduardo Moreiras, poeta traductor”, cit., pp. 177-179.
21
Outras dúas citas apenas teñen interese: na p. 48 recorda a Cunqueiro entre os colaboradores
galegos en Mensajes de Poesía; na p. 158 hai unha simple alusión intranscendente.