1kYBRBWHf

M. A. Conde Teira suxire que o nome xenérico de pentumeiro, citado por X. M. Penas Patiño
en Malpica, recollido tamén alí por F. Bernis Madrazo como vendumeira (bendumeira), pode ter
relación con "bandumeira", de bando (12B). O nome vendiñeira, recollido por M. C. Ríos Panisse,
podería ter relación con vendumeira e pentumeiro.
Os modificadores mariño ou do mar indican que se trata dunha especie mariña, que o normal
é velo no mar; negro e negrola aluden á súa plumaxe, totalmente negra como o acibeche. A respecto
da motivación semántica de pato, véxase A. platyrhynchos.
● Discusión / explicacións sobre a preferencia dalgunhas denominacións. Ríos Panisse rexistra
tamén a voz chupona en Cambados, que non dá identificado especificamente, e que define como
pájaro que se zambulle en el mar y que puede estar mucho tiempo dentro e suxire se talvez non será o
somormujo.
pentumeiro de á branca Melanitta fusca
● Bibliografía ornitolóxica especializada. Parrulo mourelo foi o nome proposto por C. Pedreira
López e X. M. Penas Patiño en 1977-1978, naquela Lista patrón de aves de Galicia (4B e 5B); utilizouse
nas guías de aves destes autores (5A e 22A) e recolleuse ou utilizouse tamén noutras publicacións
ornitolóxicas (2A, 6A, 11A e 17A). F. Bernis Madrazo recolle pato mourelo (11B). Pentumeiro de á
branca foi a denominación proposta en 1999 por M. A. Conde Teira (12B) e tamén se ten empregado
nalgunhas publicacións (13A, 15A e 16A). Nalgunha publicación utilizouse pentumeiro fosco (4A).
Noutras publicacións empregouse pentumeiro especulado (10A, 12A e 14A). Na bibliografía
ornitolóxica, os nomes portugueses son pato-fusco (2A e 2D) e negrola-d’asa-branca (1D, 2D e
3D).
● Nomes populares. Aínda que esta anátida é máis rara que a anterior, é posíbel que ás veces
reciba popularmente as mesmas denominacións, xa que son dous patos mariños bastante parecidos.
● Dicionarios consultados. Inclúen as denominacións xenéricas apuntadas en Melanitta nigra e
en A. platyrhynchos.
● Etimoloxía / motivación semántica. Sobre a motivación semántica de pato, véxase Anas
platyrhynchos; sobre pentumeiro, véxase Melanitta nigra. Os modificadores de á branca,
especulado ou similares apuntan a característica mancha branca que ten no espello alar e que o
distingue das outras especies do xénero (talvez do nome castelán: negrón especulado); os
modificadores mourelo, fosco e similares, ou o nome negrola, aluden á súa plumaxe, negra como o
acibeche.
● Discusión / explicacións sobre a preferencia dalgunhas denominacións. O nome pentumeiro
de á branca foi preferido por M. A. Conde Teira ao portugués pato fusco, por este nome describir
pouco os trazos da especie (12B).
De modo similar, o modificador mourelo non é moi acaído, xa que é moi inespecífico,
poderíase aplicar a calquera das especies do xénero Melanitta.
pentumeiro de á branca americano Melanitta deglandi
● Bibliografía ornitolóxica especializada. Non se teñen empregado até o momento.
● Nomes populares. Esta ave é de presenza en extremo esporádica na Galiza, mais os
comentarios poden ser os mesmos no referente aos nomes populares para o xénero Melanitta.
● Dicionarios consultados. Non inclúen ningunha denominación específica para M. deglandi, só
as xenéricas apuntadas en Melanitta nigra e en A. platyrhynchos.
● Etimoloxía / motivación semántica. Sobre a motivación semántica de pentumeiro, véxase M.
nigra. É unha especie moi moi semellante ao M. fusca, co mesmo espello branco nas ás (de feito, até
hai pouco eran consideradas dúas subespecies; na actualidade considéranse dúas especies diferentes).
O modificador americano alude á súa área de distribución orixinaria, de onde proceden os escasos
exemplares que se ven algunha vez na Europa.
pentumeiro careto Melanitta perspicillata
● Bibliografía ornitolóxica especializada. Petumeiro careto foi o nome proposto en 1999 no
traballo de M. A. Conde Teira (12B); tense empregado nalgunhas publicacións ornitolóxicas (10A, 12A,
13A, 14A e 16A). Nas guías de aves de X. M. Penas Patiño e C. Pedreira López utilizouse parrulo
pentumeiro americano (5A e 22A). Nalgunha publicación ornitolóxica utilizouse pentumeiro
americano (4A). Na bibliografía ornitolóxica, o nome portugués é negrola-de-lunetas (1D, 2D e 3D).
74