1kYBRBWHf

● Discusión / explicacións sobre a preferencia dalgunhas denominacións. Os criterios para a
escolla do nome xenérico ganso como o estándar comentáronse en A. anser.
ganso campestre Anser fabalis
● Bibliografía ornitolóxica especializada. Ánsar bravo foi o nome proposto por C. Pedreira
López e X. M. Penas Patiño en 1977-1978, naquela Lista patrón de aves de Galicia (4B e 5B); utilizouse
nas guías de aves destes autores (1A, 5A e 22A) e recolleuse ou utilizouse tamén nalgunha outra
publicación ornitolóxica (2A e 4A). Nunha publicación utilizouse para esta especie o nome de ánsar
campestre (17A). Ganso campestre foi a denominación proposta en 1991 e 1999 nos traballos de M.
A. Conde Teira e T. A. Vidal Figueroa (10B e 12B); recolleuse ou empregouse nalgunhas publicacións
(10A, 12A, 13A e 14A). Na bibliografía ornitolóxica, o nome portugués é ganso-campestre (2A, 1D,
2D e 3D).
● Nomes populares. A. Villarino Gómez rexistrou especificamente para Anser fabalis as
denominacións de ganso e pato ganso nas terras da desaparecida lagoa de Antela, na Limia, Ourense
(9A).
● Dicionarios consultados. Atopáronse as entradas xenéricas apuntadas en Anser anser.
● Uso dos seus nomes na literatura galega. A respecto do emprego da voz ganso na nosa
literatura, véxase A. anser.
● Etimoloxía / motivación semántica. O nome ánsar vén do latín anser; o nome ganso, do
gótico gans. Os modificadores campestre e bravo indican que é unha especie salvaxe, non
domesticada; de modo particular para esta especie, campestre alude a campos, pois A. fabalis inverna
caracteristicamente terra adentro, en campos e prados non moi lonxe da auga.
● Discusión / explicacións sobre a preferencia dalgunhas denominacións. Os criterios para a
escolla dun nome xenérico estándar comentáronse en A. anser. O modificador bravo é moi inespecífico
(véxase esta mesma alínea referida a A. anser).
ganso de cabeza listada Anser indicus
● Bibliografía ornitolóxica especializada. Ánsar índico foi o nome proposto por C. Pedreira
López e X. M. Penas Patiño en 1977-1978, na Lista patrón de aves de Galicia (4B e 5B); utilizouse nas
guías de aves destes autores e recolleuse nalgunha outra publicación (1A, 2A e 5A). Ganso de cabeza
listada foi o nome proposto en 1999 no traballo de M. A. Conde Teira (12B); tamén se empregou esta
denominación nalgunha publicación ornitolóxica (13A). Noutras publicacións aparece o nome de ganso
indio (4A, 10A, 12A e 14A). Na bibliografía ornitolóxica, os nomes portugueses son ganso-índio e
ganso-de cabeça-listada (2A, 4A, 1D e 2D).
● Nomes populares. É unha especie de aparición extremadamente rara na Galiza e non se lle
coñecen denominacións populares galegas, agás a xenérica.
● Dicionarios consultados. Atopáronse as entradas xenéricas apuntadas en Anser anser.
● Uso dos seus nomes na literatura galega. A respecto do emprego da voz ganso na nosa
literatura, véxase A. anser.
● Etimoloxía / motivación semántica. Ánsar vén do latín anser; ganso, do gótico gans. O
modificador de cabeza listada fai referencia ás conspicuas listas negras que ten nas costas da cabeza,
que o distinguen dos outros gansos; índico e similares aluden á súa área de distribución (cría na Asia
central, inverna no norte da India).
● Discusión / explicacións sobre a preferencia dalgunhas denominacións. M. A. Conde Teira e T.
A. Vidal Figueroa comentan que optan optaron pola denominación de ganso de cabeza listada por
reflectir mellor as características da especie do que o nome ganso indio e por ser ademais o nome
proposto na lista sistemática portuguesa (10B).
ganso de testa branca Anser albifrons
● Bibliografía ornitolóxica especializada. Ánsar careto grande foi o nome proposto por C.
Pedreira López e X. M. Penas Patiño en 1977-1978, naquela Lista patrón de aves de Galicia (4B e 5B);
utilizouse nas guías de aves destes autores e recolleuse ou utilizouse tamén nalgunha outra publicación
ornitolóxica (2A, 5A, 6A e 22A). Ganso de testa branca foi o nome proposto en 1999 no traballo de
M. A. Conde Teira (12B), que se utilizou nunha publicación ornitolóxica (13A); noutras publicacións
(10A, 12A e 14A) empregouse o nome de ganso testibranco. Na bibliografía ornitolóxica, o nome
portugués é ganso-grande-de-testa-branca (2A, 1D e 2D) e ganso-de-testa-branca (3D).
57