1kYBRBWHf

traballo de M. A. Conde Teira (12B); empregouse nas guías de aves de X. M. Penas Patiño e C. Pedreira
López (5A e 22A) e recolleuse ou empregouse tamén noutras publicacións ornitolóxicas (6A, 10A, 13A,
14A, 15A e 16A). Na bibliografía ornitolóxica, o nome portugués é escrevedeira da Lapónia (1D e
2D), tamén grafado como escrevedeira-da-lapónia (3D).
● Nomes populares. É unha especie moi rara na Galiza e non se lle coñecen denominacións
populares, agás as xenéricas.
● Dicionarios consultados. Acháronse as denominacións xenéricas apuntadas en Emberiza cirlus.
● Etimoloxía / motivación semántica. Canto á semántica de escribenta e similares, véxase E.
cirlus. Os modificadores lapona e da Lapónia aluden á súa área de distribución.
escribenta das neves Plectrophenax nivalis
● Bibliografía ornitolóxica especializada. Escribenta das neves foi o nome proposto en 1999
no traballo de M. A. Conde Teira (12B); recolleuse ou empregouse nalgunhas publicacións ornitolóxicas
(10A, 12A, 13A, 14A, 15A e 16A). Na segunda e terceira guías de aves de X. M. Penas Patiño e C.
Pedreira López empregouse escribenta nival (5A e 22A). Na bibliografía ornitolóxica, o nome
portugués é escrevedeira-das-neves ou emberiza-das-neves (2A, 10A, 1D, 2D e 3D; o primeiro
con máis frecuencia).
● Nomes populares. É unha especie moi rara na Galiza e non se lle coñecen denominacións
populares, agás as xenéricas.
● Dicionarios consultados. Acháronse as denominacións xenéricas apuntadas en Emberiza cirlus.
● Uso dos seus nomes na literatura galega. Sobre o emprego de denominacións xenéricas na
nosa literatura, véxase Emberiza citrinella e E. cirlus.
● Etimoloxía / motivación semántica. Para escribenta e similares, véxase E. cirlus. Os
modificadores das neves e nival aluden á súa área nórdica de distribución e, talvez, á súa chegada ás
nosas latitudes asociada ás neves.
escribenta amarela Emberiza citrinella
● Bibliografía ornitolóxica especializada. Escribenta real foi o nome proposto por C. Pedreira
López e X. M. Penas Patiño en 1977-1978, naquela Lista patrón de aves de Galicia (4B e 5B); utilizouse
nas dúas guías de aves destes autores (1A, 5A e 22A), no Atlas de vertebrados de Galicia (7A) e
recolleuse nalgunha publicación ornitolóxica (2A). En 1991, M. A. Conde Teira e T. A. Vidal Figueroa
propuxeron a denominación de escribidor amarelo (10B). Escribenta amarela foi o nome proposto
en 1999 no traballo de M. A. Conde Teira (12B); tense empregado ou recollido nalgunhas publicacións
ornitolóxicas tanto no ámbito galego como no estatal (8A, 10A, 12A, 13A, 14A e 15A). Na bibliografía
ornitolóxica, o nome portugués para esta especie é escrevedeira-amarela (2A, 10A, 1D, 2D e 3D).
● Nomes populares. F. Bernis Madrazo rexistra o uso de millarengo para E. citrinella en
Becerreá, Lugo (11B). Algunhas denominacións xenéricas que tamén se poderían aplicar a esta especie
están comentadas en Emberiza cirlus.
● Dicionarios consultados. No Diccionario galego-castelán de X. L. Franco Grande (1968), da
editorial Galaxia, aparecen as denominacións xenéricas apuntadas en Emberiza cirlus. O Dicionário da
língua galega de I. Alonso Estravís (1995), da editorial Sotelo Blanco, inclúe a entrada verdusiña, que
define como "Páxaro pequeno co tamaño aproximado do pardau. O macho ten cor amarela limón a
cabeza e as partes inferiores do corpo, de castaño arruivado a mitra e o lombo" e identifica con
Emberiza citrinella; aparece tamén escrebedeira, que define de forma xenérica e identifica con varios
nomes científicos do xénero Emberiza; escribidora, que remite a escrebedeira; e escribenta, na que
especifica outra denominación para Emberiza citrinella: escribenta real. No Gran Diccionario Xerais da
Lingua Galega (2000), de varios autores, aparecen as entradas apuntadas en Emberiza cirlus e inclúe a
entrada millarengo, que nunha das acepcións define de maneira moi imprecisa, como paxaro que vive
nos milleirais e come millo.
● Uso dos seus nomes na literatura galega. F. Bernis Madrazo apunta a seguinte canción de
Becerreá onde aparece o nome popular e específico para E. citrinella de millarengo: "Paxarinho
millarengo qu’estás n-a punta d’o toxo, lévalle’esta carta âs nenas d’o pelo roxo" (11B). X. M. Penas
Patiño transcribe outra versión da canción popular apuntada en Emberiza citrinella, pero en relación con
E. cirlus: "Paxariño millarenco / que estás no bico dun toxo / daraslle moitas memorias / á nena do
pelo roxo" (7A). Véxase tamén Emberiza cirlus.
● Etimoloxía / motivación semántica. Canto á semántica de escribenta e similares, véxase
Emberiza cirlus. Os modificadores amarela, verdusiña e similares aluden á vistosa cor verde e
amarela da súa plumaxe; seguramente a motivación tamén de real. Millarengo fai referencia a millo
ou a milleiral, un dos seus hábitats.
278