1kYBRBWHf

específicos cabecirrubio, de-barrete e similares aluden á cor da plumaxe da cabeza, rubia e
rechamante. Pega rebordá é unha denominación propia de Garrulus glandarius, que ás veces úsase
tamén para as especies do xénero Lanius (e tamén o modificador rebordá ).
● Discusión / explicacións sobre a preferencia dalgunhas denominacións. M. A. Conde Teira
comenta que a denominación de picanzo cabecirrubio define mellor os trazos da especie que
picanzo encapuchado (12B). M. A. Conde Teira, tamén comenta que rebordá e un adxectivo
característico nas denominacións populares de Garrulus glandarius, que estaría inxustificado para L.
senator (12B).
picanzo real norteño Lanius excubitor
● Bibliografía ornitolóxica especializada. Cando L. excubitor e L. meridionalis aínda non estaban
diferenciadas como especies diferentes, picanzo real foi o nome proposto para L. excubitor por C.
Pedreira López e X. M. Penas Patiño en 1977-1978, naquela Lista patrón de aves de Galicia (4B e 5B), e
tamén por M. A. Conde Teira e de T. A. Vidal Figueroa en 1991 e 1999 (10B e 12B). Empregouse ou
recolleuse nas primeiras guías de aves de Penas Patiño e Pedreira López (1A e 5A), no Atlas de
vertebrados de Galicia (7A) e mais noutras publicacións ornitolóxicas (2A, 6A, 8A, 10A, 11A, 13A, 15A,
18A e 11B), sen dispor aínda doutra denominación para diferencialo de L. meridionalis.
Cómpre dicir que até hai pouco a ciencia consideraba que esta especie era a mesma que Lanius
meridionalis; na actualidade, malia seren moi semellantes, a ciencia considera que se trata de dúas
especies diferentes. En poucas publicacións ornitolóxicas se acharon nomes galegos que diferenciasen
Lanius excubitor e Lanius meridionalis: picanzo real nórdico para L. excubitor e picanzo real para L.
meridionalis (14A); picanzo real setentrional para L excubitor e picanzo real meridional para L
meridionalis (en 5B e en 22A, a terceira guía de Penas Patiño e Pedreira López). Na bibliografía
ornitolóxica, os nomes portugueses son picanço-real e picanço-real-nortenho (2A, 10A, 11B, 1D e
2D).
● Nomes populares. Véxase Lanius meridionalis.
● Dicionarios consultados. No Dicionário da língua galega de I. Alonso Estravís (1995), da
editorial Sotelo Blanco, aparece a entrada xenérica picanzo, na que especifica a denominación de
picanzo-real para L. excubitor.
● Uso dos seus nomes na literatura galega. Sobre o emprego de pigarzo, voz que talvez estea
referida a estas especies, véxase Lanius collurio.
● Etimoloxía / motivación semántica. Para picanzo, véxase L. collurio. Os modificadores
específicos real e rei probabelmente son por causa do seu tamaño e da súa vistosidade. Os
modificadores nortenho, nórdico e setentrional aluden a súa área de distribución.
● Discusión / explicacións sobre a preferencia dalgunhas denominacións. Após esta
diferenciación como especies, talvez habería que concretar o nome máis acaído para L. excubitor
(picanzo real setentrional, picanzo setentrional, ou mesmo picanzo real norteño, de modo
paralelo ao portugués), téndomos en conta a denominación de L. meridionalis. Aínda que un nome con
dous modificadores pode parecer un pouco longo, é ben interesante mantermos a base común,
picanzo real, tanto para L. excubitor como para L. meridionalis, pois así o nome reflicte que son dúas
especies moi próximas filoxeneticamente. Talvez habería que pensar mellor se engadimos o
modificador setentrional ou o modificador norteño; calquera das dúas opcións son válidas e talvez
sexa máis interesante mantermos na ornitoloxía especializada o paralelismo co portugués: picanzo
real norteño.
picanzo real Lanius meridionalis
● Bibliografía ornitolóxica especializada. Cómpre dicir que até hai pouco a ciencia consideraba
que Lanius meridionalis e Lanius excubitor eran subespecies da mesma especie; na actualidade, malia
seren moi semellantes, a ciencia considera que se trata de dúas especies diferentes. Nunha publicación
ornitolóxica úsase picanzo real para L. meridionalis, diferenciándoo de L. excubitor, para o que se
emprega a denominación de picanzo real norteño (14A). Na terceira guía de C. Pedreira López e X. M.
Penas Patiño úsase picanzo real meridional (22A). Na bibliografía ornitolóxica, o nome portugués é
picanço-real (1D), coa posibilidade de empregar tamén picanço-real-meridional (2D e 3D).
● Nomes populares. A. Villarino Gómez rexistrou as denominacións populares de pega brava,
pego bravo e cascorro para L. excubitor –ou L. meridionalis– nas terras da Limia (9A). No Atlas de
vertebrados de Galicia apúntanse para L. excubitor –ou L. meridionalis– os nomes populares de pico
gordo, picanzo rei e tamén pega rebordá (7A). X. M. Penas Patiño e C. Pedreira López apuntan a
denominación popular xenérica –impropia, indican xa os autores– de pega rebordá (1A). F. Bernis
253