1kYBRBWHf

I. Estruturación deste traballo e fontes bibliográficas
Como se pode ver no índice, o groso do corpo do traballo desenvólvese especie por especie
(sección II). Como aves da Galiza consideráronse todas as que se poden observar na nosa terra,
incluíndo as que son moi raras ou de aparición excepcional, como por exemplo a gaivota arxéntea
americana (Larus smithsonianus) ou o picafollas de Hume (Phylloscopus humei), e tamén algunha
especie para a que só existen referencias xa antigas, como é o caso da gralla calva (Corvus
frugilegus).
É importante termos en conta que, para cada unha das especies, a información estrutúrase
sempre coa orde e coas alíneas seguintes:
● Bibliografía ornitolóxica especializada (primeiro parágrafo). Son os nomes recollidos para esa
especie nas publicacións especializadas en ornitoloxía.
Aínda que, como se vai ver, recóllense de moitos traballos, os máis destacados son a Lista
patrón de aves de Galicia de Xosé Manuel Penas Patiño e Carlos Pedreira López, publicada na revista
Braña da Sociedade Galega de Historia Natural en dous números (o de 1977 e o de 1978); as
denominacións galegas das aves das tres guías de Xosé Manuel Penas Patiño e Carlos Pedreira López:
Guía das aves de Galicia (1980), Guía das aves de Galicia (1991) e igualmente Guía das aves de Galicia
(2004), a primeira editada por Galaxia e a segunda e a terceira por Bahía; a comunicación de Tiago A.
Vidal Figueroa e Miguel A. Conde Teira, Nomes galegos para as aves ibéricas, publicada no ano 1991
nas Actas do Primeiro Congreso de Ornitoloxía, editadas pola Universidade de Santiago de Compostela,
e o artigo de Miguel A. Conde Teira, Nomes galegos para as aves ibéricas: lista completa e comentada,
publicado no ano 1999 na revista Chioglossa, editada polo grupo naturalista Hábitat.
Canto aos nomes portugueses das aves, que se apuntan sempre como referente con que se
comparan ou cotexan os nomes galegos, recorreuse sobre todo aos Nomes portugueses das aves do
Paleárctico Ocidental (Helder Costa et al., 2000), á Lista sistemática das aves de Portugal Continental
(Rafael Matias et al., 2007) e á guía Aves de Portugal. Incluindo os arquipélagos dos Açores, da
Madeira e das Selvagens (Helder Costa et al., 2011).
● Nomes populares (é sempre o segundo parágrafo de cada especie). Son denominacións
populares para ese paxaro, quer xenéricas quer específicas, vivas na fala, rexistradas en diferentes
lugares da xeografía galega por moitos autores/as (o autor deste traballo inclusive).
Utilizáronse para esta alínea diversos traballos, entre os que é preciso salientarmos o excelente
17