1kYBRBWHf

pilro común Calidris alpina
● Bibliografía ornitolóxica especializada. Pirlo curlibico foi o nome proposto por C. Pedreira
López e X. M. Penas Patiño en 1977-1978, naquela Lista patrón de aves de Galicia (4B e 5B); utilizouse
nas guías de aves destes autores (1A, 5A e 22A) e recolleuse ou utilizouse tamén noutras publicacións
ornitolóxicas (2A, 4A, 6A, 17A e 18A). Pilro común foi proposto en 1991 e 1999 nos traballos de M. A.
Conde Teira e T. A. Vidal Figueroa (10B e 12B); tamén se ten recollido ou empregado nalgunhas
publicacións ornitolóxicas (10A, 12A, 13A, 14A, 15A e 16A). Na bibliografía ornitolóxica, os nomes
portugueses son pilrito-comum e pilrito-de-peito-preto (2A, 1D, 2D e 3D, con máis frecuencia o
segundo).
● Nomes populares. M. A. Conde Teira comenta que, segundo as zonas de Galiza, as especies
de Calidris poden recibir indistintamente os nomes xenéricos de píllara, pírula, pilro, pirlo, píldora e
píldoro (12B). F. Bernis Madrazo rexistrou para o xénero Calidris as denominacións galegas de pilro,
píllara, pinaza e pinaca na provincia da Coruña e píldora na provincia de Lugo; ademais, rexistrou
as voces mazarico e masarico en varias localidades de Lugo e Pontevedra referidas ao xénero
Numenius, mais igualmente a Tringa e Calidris (11B). F. Bernis Madrazo tamén cita a L. Iglesias
(1927), que emprega píllara para se referir a Actitis hypoleucos e aos xéneros Charadrius e Calidris
(11B).
● Uso dos seus nomes na literatura galega. A respecto do uso de píllara na nosa literatura,
véxase Charadrius dubius; sobre o emprego de mazarico, véxase Numenius arquata.
● Dicionarios consultados. As voces xenéricas atopadas nos dicionarios consultados e apuntadas
en C. dubius poderían ser tamén aplicadas ao xénero Calidris. No Dicionário da língua galega de I.
Alonso Estravís (1995), da editorial Sotelo Blanco, aparece a entrada xenérica pirlo, nunha das
acepcións, para se referir a unha ave acuática abundante na Limia. No Gran Diccionario Xerais da
Lingua Galega (2000), de varios autores, aparece a entrada pirlo (como galega e non preferente), que
remite a pilro, e pilro (esta como galega e preferente), que define como aves limícolas de pequeno
tamaño.
● Etimoloxía / motivación semántica. Sobre a probábel orixe onomatopeica das denominacións
píllara, pilro, pirlo, píldora e similares, véxase C. dubius. O modificador común indica que é unha
das especies máis frecuentes; curlibico, refírese á característica forma do bico; de-peito-preto, á
característica mancha negra que ten en época nupcial, máis exactamente no ventre que no peito.
Mazarico é un nome xenérico para aves pernaltas que andan na auga; para unha posíbel significación,
véxase Numenius arquata.
pilro de Bonaparte Calidris fuscicollis
● Bibliografía ornitolóxica especializada. Pilro de Bonaparte foi o nome proposto en 1999 no
traballo de M. A. Conde Teira (12B); empregouse en dúas guías de X. M. Penas Patiño e C. Pedreira
López (5A e 22A) e recolleuse ou empregouse tamén nalgunhas publicacións ornitolóxicas (10A, 13A,
14A e 16A). Na bibliografía ornitolóxica, o nome portugués é pilrito-de-sobre-branco (1D e 3D) e
pilrito-de-uropígio-branco (2D).
● Nomes populares. É unha especie de aparación moi moi rara na Galiza e non se lle coñecen
nomes populares específicos. Algunhas denominacións populares xenéricas que podería recibir esta
especie están apuntadas en Calidris alpina.
● Dicionarios consultados. No Diccionario galego-castelán de X. L. Franco Grande (1968), da
editorial Galaxia, e no Diccionario de usos castelán-galego de X. M. Freixedo Tabarés e F. Álvarez
Carracedo (1984), da editorial Akal, aparecen as denominacións xenéricas apuntadas en Charadrius
dubius, que tamén se poderían aplicar a esta especie. No Dicionário da língua galega de I. Alonso
Estravís (1995), da editorial Sotelo Blanco, e no Gran Diccionario Xerais da Lingua Galega (2000), de
varios autores, aparecen as denominacións xenéricas apuntadas en Charadrius dubius e Calidris alpina,
que tamén se poderían aplicar a esta especie.
● Etimoloxía / motivación semántica. A respecto da probábel orixe onomatopeica das
denominacións píllara, pilro, pirlo, píldora e similares, véxase Charadrius dubius. O modificador "desobre-branco"
fai referencia á característica cor branca do uropixio ou mitra. Non se encontrou unha
explicación para o modificador de Bonaparte, mais probabelmente ha de aludir ao famoso naturalista
do século XIX.
pilro de Maur Calidris mauri
● Bibliografía ornitolóxica especializada. Pilro de Maur foi o nome proposto en 1999 no traballo
126