ramón suárez picallo escolma de textos en galego - Consello da ...

O ESTATUTO DE GALICIA
Un ano máis, unha vegada máis, da efeméride crucial na
historia galega do noso tempo. Fai, xustamente agora, 27 anos,
cando o noso pobo afirmou, plebiscitariamente, a sua vountade
de ser autónomo e libre dándose a si mesmo normas xurídicas
e políticas que lle permitirán vivir a sua propia vida, dacordo co
seu xeito e co seu xenio orixinaes, dentro do orden democrático
institucional e costitucional da Repúbrica Hespañola. É decir,
dentro dunha comunidade plurinacional de pobos e de nacións, con
idiomas, xeografías, historias, culturas i espranzas propias común,
enroitada cara a un futuro de progreso e de boandanza, xusta e
democrática, no concerto dos pobos libres do mundo.
O grandeiro acontecimento histórico galego, logrado no dia
de San Pedro, do ano 1936 ó conxuro dunha pergunta e dunha
resposta –Estatuto de Galicia? Si!− foi anulado, tronzado, aniquilado,
por unha moura traición, fraticida, que despois dunha pavorosa
guerra civil na que trunfou o esprito da Caín afundiu non somentes
a Galicia, senón que a tódolos outros pobos irmáns da órbita
peninsuar ibérica, nunha longa noite de tiranía de arbitrariedades, e
de agravio e de inxuría, os máis esgrevios direitos e valores morales
i esprituales da criatura humán e da sua índole natural de ser parte
dunha comunidade libre, civil e civilizada.
Nembargantes, nós, os galegos de hoxe, que estamos en
trance de ascender o cumio da ancianidade, e que fomos, de lonxe
ou de preto, autores, protagonistas e aitores naquil drama histórico,
non desexamos manter por máis tempo as súas lembranzas
rencorosas, nin a suas proieicións negativas. Preferimos asinalar os
feitos pasados como fitos de referencia obrigada. Mais coa ollada