ramón suárez picallo escolma de textos en galego - Consello da ...

PRESENTACIÓN
A publicación deste libro pon de manifesto a vontade do
Consello da Cultura Galega de recuperar o traballo dos devanceiros
do galeguismo. A edición deste volume reviste especial importancia,
pois até o momento os textos que nel se recollen permanecían
dispersos por xornais e revistas, fundamentalmente da emigración.
Xa que logo, reunir unha escolma da obra de Ramón Suárez
Picallo, esparexida por publicacións periódicas, supón recuperar un
testemuño esencial sobre o pasado colectivo da comunidade galega.
Ramón Suárez Picallo, natural de Sada, emigrou á Arxentina,
onde adquiriu unha boa formación letrada e unha notable experiencia
política e sindical. Foi a súa escola a cidade de Bos Aires nos anos
vinte. Nesta década participou en destacadas empresas culturais,
como a fundación en 1924 da revista Céltiga. Nas páxinas desta
revista publicáronse moitos dos textos que recollemos neste libro.
A destacada presenza de Suárez Picallo no seo da colectividade
galega porteña, así como a súa dedicación ao xornalismo e ao
liderado sindical, fixeron del unha óptima escolla para ser un
dos “delegados”, xunto con Antón Alonso Ríos, que a emigración
galega en Bos Aires achegou á Galicia republicana para colaborar
na consolidación dun réxime democrático e na consecución da
autonomía política. Foi elixido deputado ás Cortes constituíntes da
II República, en xuño de 1931, nas listas comandadas pola ORGA.
O protagonismo de Suárez Picallo en Galicia ata 1936 e
na España republicana durante a guerra converteu o seu nome
nunha referencia ineludible, como político e parlamentario, como
xornalista e como combatente a favor da autonomía e da República.
A guerra, que tronzou as arelas e as esperanzas de toda unha