Baixar aquí o pdf - Consello da Cultura Galega

Nancy Pérez Rey
Distribución residencial
Tratarei agora con algo máis de vagar aspectos máis específicos da vida
dos galegos en Nova York, momento na inserción dos inmigrantes que S. L.
Baily definiu como adjustment. O proceso de axuste é a fase do proceso migratorio
que comeza cando os inmigrantes chegan ao seu destino e continúa por
un tempo indeterminado, que depende das circunstancias que lle poidan
acontecer ao individuo ou ao grupo. Falamos de circunstancias relacionadas
coa procura de traballo, co lugar de residencia ou socialización, entre outras,
e sobre as cales trataremos de dar algunhas pinceladas para o caso dos galegos
(Baily, 1999: 17).
Neste sentido, considero que a elección do lugar de residencia é un elemento
clave no proceso de axuste dos inmigrantes no medio de acollida, xa
que vén determinado, na maioría dos casos, por aspectos de tipo laboral, de
custos inmobiliarios, de transporte e incluso variables de tipo cultural e individual.
Os galegos que chegaron a Nova York asentáronse, xa que logo, en
determinados barrios da cidade, tendo en conta a proximidade aos lugares
de traballo, coincidindo en moitos casos con outros paisanos ou familiares. J.
V. chegou a Nova Jersey en 1960, onde residían uns parentes distantes. Despois
de traballar un tempo na construción «por mediación deses gallegos que
eran do Freixo (Serra de Outes, A Coruña), recomendáronlle a outros señores
que eles conocían no estado de Nova York, un sitio que se chama Long Island
[...] e entonces foi para alí, a traballar, cuns señores gallegos que traballaban
en jardinería». 13
Como xa avanzamos un pouco máis arriba, semella que unha boa parte
dos galegos estaban concentrados no barrio de Astoria, en Queens, lugar
onde tamén se radicou nos últimos anos unha das sociedades máis importantes
da comunidade galega, a Casa Galicia de Unidad Gallega. A outra das
nosas entrevistadas, D. B. I., esperáballe unha casa, xa en propiedade, en Astoria
cando se reúne co seu home no ano 1947: «Ao meu lado vivía E. de Ríos, e
J. vivía en Broadway, na 74». D. B. I. naceu en Moruxo (Ouces, Bergondo), en
marzo de 1899 e aínda lembra cunha lucidez admirable a súa emigración e a
da súa familia a Nova York. O seu home, A. L., instalárase nesta cidade, aínda
solteiro, na década de 1910 e contaba ademais cunha experiencia migratoria
13. Fragmento dunha entrevista realizada a L. O. G., que emigrou en 1962 para reunirse co
seu home, J. V., ata o ano 1967. Esta parella volverá aos EE UU en 1990 e residirá esta vez por
tres anos entre Las Vegas e Nova York. Entrevista realizada pola autora a L. O. G. no Pino de
Val (Mazaricos, A Coruña), o 3 de setembro de 2000. (A partir de agora será citada como Entrevista
A).
6 [ ESTUDOS MIGRATORIOS. Revista Galega de Análise das Migracións, Vol. I, Núm. 2, 2008 (31-61) ]