Orden social e loucura en Galicia - Repositorio Institucional da USC ...

Prólogo.
A miña primeira experiencia cunha Enfermidade Mental Grave (EMG) foi a do meu propio pai. El
viviu cun diagnóstico psiquiátrico de Enfermidade maníaco depresiva (hoxe bipolar) durante corenta
anos. O seu diagnóstico levou consigo un tratamento farmacolóxico (litio) que aliviaba os síntomas da
súa enfermidade: os seus cambios de humor eran máis suaves e a nosa vida familiar infinitamente máis
sinxela. Supuxo dende logo un estigma (nunca aceptou a etiqueta diagnóstica) ao que enfrontarse e
comprender; unha marca tanto para el coma para a familia e a súa rede de amigos. Pero tivo ademais os
seus aspectos positivos. Grazas a el, obtivo o meu pai unha pensión por incapacidade que lle deu,
deunos, vinte anos de tranquilidade relativa, e unha atención sanitaria gratuíta na súa invalidez primeiro,
e na súa xubilación posterior.
Esta investigación é froito sen lugar a dúbidas do meu esforzo por comprender. O traballo cos EM
usuarios da Asociación de Familiares de EM “Pérgola”, base da segunda parte desta tese, iniciáronse un
par de anos despois da súa morte. A miña curiosidade inicial por temas relacionados coa EMG foi
sempre, dende logo, “persoal”. O que quero indicar con isto, neste prólogo, é un apuntamento
importante para o lector desta tese. A EMG non é para min un tema alleo. A construción teórica
luhmaniana dende a que se interpretan os datos recollidos neste estudo require a comprensión este dato.
Marcou e marca a perspectiva dende a que se realizou a observación. Ter claro ese vínculo persoal do
autor coa EM axudara ao lector a comprender a análise da EMG en Galicia que construiremos.
~ 7 ~