Orden social e loucura en Galicia - Repositorio Institucional da USC ...

Premisas luhmanianas.
1.A.
A socioloxía de Luhmann exposta ao longo deste capítulo
sintetizámola a continuación en vinte e cinco teses. Ordenámolas na
mesma secuencia na que acaban de ser explicadas. Numerámolas para
facilitar referencias posteriores. Ao final de cada unha indicamos entre paréntese os conceptos clave
empregados na súa enunciación, sempre nunha complexidade conceptual crecente. Cada tese convértese
a partir deste momento nunha premisa na construcción da socioloxía médica desta investigación. Cada
unha é a base de observación da nosa investigación sobre a EMG en Galicia.
[Tese 1] Unha observación é unha operación baseada no establecemento dunha diferenza e
indicación dun dos lados. Toda observación parte dun punto cego que a constitúe e a converte, dende o
paradoxo, en comunicable e pensable [Observación, diferenza, forma,].
[Tese 2] A observación de segundo orde é a observación doutras observacións e observadores. Só
dende unha observación de segundo orde é detectable o punto cego doutra observación [observación de
segundo orde].
[Tese 3] Un sistema é un conxunto de elementos relacionados entre si mediante unha operación
autorreferente e autopoiética fronte a un contorno. Un sistema é a diferenza establecida co seu contorno,
pechado sobre esa diferenza sobre si mesmo [sistema /contorno, autorreferencia, autopóiesis, clausura
operativa,].
[Tese 4] A complexidade é a imposibilidade dun sistema de ofrecer unha observación, e polo tanto
de comunicala, da totalidade de elementos que o constitúen. Para ofrecer unha descrición de si mesmo,
sempre parcial, debe de eliminar cousas, debe elixir, debe seleccionar [complexidade].
[Tese 5] Un sistema psíquico constrúese no conxunto de todas os pensamentos con sentido posibles.
A súa operación é a conciencia, sendo a memoria o pensamento recursivo do sistema psíquico. Un
sistema social constrúese no conxunto de toda as comunicacións con sentido posibles (a súa operación),
sendo a cultura a memoria recursiva do sistema social [sistema psíquico, sistema social, cultura].
[Tese 6] A comunicación é a operación coa que se diferencia o sistema social. Comunicar é asegurar
a selección da observación nunha situación de dobre continxencia. A comunicación é sempre
improbable [comunicación, dobre continxencia,].
[Tese 7] O sentido é o medio no que sistemas psíquicos atopanse acoplados e interpenetrados. O
sentido é a selección de posibilidades (pensamento e comunicación) en situación de dobre continxencia.
O sentido é a ferramenta básica para o acoplamento estrutural entre sistemas psíquicos e sistemas sociais
[sentido, linguaxe,].
[Tese 8] A semántica é a acumulación de sentidos no interior dun sistema, é a cultura ou memoria
dun sistema [semánticas; cultura].
[Tese 9] Acoplamento estrutural define a interpenetración entre dous sistemas, sendo o un o
contorno do outro. Cada sistema acoplado pon a disposición do outro a súa complexidade a través da
linguaxe [acoplamento estrutural, interdependencia, linguaxe].
~ 57 ~