Orden social e loucura en Galicia - Repositorio Institucional da USC ...

Chegamos por fin aos enfermos mentais mesmos. Son usuarios nas asociacións, pacientes para os
seus médicos ou enfermos para as súas familias. Os usuarios, pacientes ou enfermos non falan de EMG,
comunican as súas vivencias dende outras distincións que describimos no capítulo 10. As entrevistas
realizadas, a observación nas institucións xestoras da loucura en Galicia permitíronnos reunir datos para
debuxar os trazos comúns da vivencia en primeira persoa dunha EM. Hai toda unha serie de fases que
describimos neste apartado da investigación a longo da carreira moral que cada EMG percorre ao longo
dos anos de convivencia coa súa doenza.
Estes tres colectivos (familiares, xestores e enfermos) observan a EMG dende distincións ben
diferenciadas, con contradicións comunicativas internas que alimentan a súa evolución. As súas miradas
son por suposto complementarias, e só foron aquí analizadas por separado con fins descritivos. A
complexidade social está na suma inabarcable de todas elas. E todas foron descritas nos capítulos
correspondentes. O cal non quere dicir, por suposto, que non existan outros elementos desta mesma
complexidade que escapen a esta tese.
Finalmente observamos os problemas de “xestión informática” no intento de implantar a Historia
Clínica Dixital nas USM existentes en Galicia no século XXI (capítulo 11). Toda a complexidade
descrita nos capítulos desta tese “negase” obstinadamente a entrar nos modelos de racionalización
ofrecidos dende a administración. Un xestor informático ofreceunos unha descrición de tódalas
complexidades analizadas anteriormente nesta tese. Esa perspectiva constrúe unha visión ampla de toda
a complexidade da orde social e a loucura en Galicia, subliñando un dos principios delimitados na
primeira parte: a imposibilidade de ter unha descrición completa da complexidade do sistema social.
Unha e outra vez constátase, coa aparición dun novo dato, ou dunha nova investigación con distincións
novidosas, a necesidade de recoñecer con humildade a incompletude e limitación de calquera
observación da complexidade social. Esta investigación non é unha excepción.
Esta tese formulouse dous obxectivos. Por un lado construír unha perspectiva teórica para a
socioloxía médica da Enfermidade Mental Grave en Galicia. Entendemos que neste modelo a
complexidade social de por si indescritible veuse simplificada o suficiente para enxergala. A primeira
parte desta tese centrouse nesta construción, cumprindo así este primeiro obxectivo.
O segundo obxectivo consistía en construír unha descrición da complexidade da orde social en torno
á EMG en Galicia, aplicando así o marco teórico edificado na primeira parte. Esta complexidade require
unha visión da evolución e emerxencia no tempo. A segunda parte ocupouse de posicionar o lector para
obter unha perspectiva complexa da EMG na Galicia do ano 2008. Non se trataba de atopar unha
solución á EMG, nin por suposto de definila. Tampouco era a nosa intención criticar sen máis as
solucións existentes, diso ocupase xa o propio sistema social. Este segundo obxectivo consistía en
facilitar unha visión da complexidade da EMG na súa propia complexidade. O lector será dende logo o
mellor xuíz: se a súa visión da EMG é a mesma que ao inicio desta investigación teremos, ou non,
fracasado.
~ 265 ~