Orden social e loucura en Galicia - Repositorio Institucional da USC ...

constatouse unha e outra vez todo ao longo desta tese. É necesaria unha investigación sociolóxica, non
médica, deste aspecto da complexidade. A nosa investigación é, nesta carencia, incompleta, fomentando
un imaxinario interesado do quefacer médico e a súa bondade asistencial.
A continuación ocupámonos, no capítulo 6 da tese, de dúas USM en dúas capitais galegas observadas
en 1992. A primeira, a denominada USM1, serviunos para observar o traballo interdisciplinar dirixido
polo seu psiquiatra xefe dende unha psiquiatría de orientación antropolóxica. As diferentes concepcións
da psiquiatría conviven alí no traballo desta unidade. A saturación asistencial e o traballo clínico
pragmático son os dous límites nos que a interdisciplinaridade se xera, como describimos, a
comunicación no interior deste sistema social. Os imaxinarios e as expectativas diferentes sobre a EMG
comunícanse na USM1 dentro dunha complexidade peculiar. O rural e o urbano, o psicótico fronte ao
neurótico e toda unha serie de distincións permiten aos traballadores e usuarios da USM1 comunicala
EMG.
A segunda unidade, que denominamos USM2, na que fixamos a nosa atención, noutro núcleo urbano,
permitiunos internarnos nos detalles dunha perspectiva diferente sobre a EMG tamén existente en
Galicia. Esta unidade traballa principalmente cun modelo psicoanalítico, que se engade aos xa descritos.
Describimos entón a complexidade de distincións e imaxinarios cos que comunicase a EMG no interior
da unidade.
Entramos despois (capítulo 7) na descrición dos datos recollidos entre 2005 e 2008 nunha Asociación
de Familiares e Enfermos Mentais en Esteiro. Primeiro describimos a súa forma de traballo coa
multiplicidade de funcións asumidas. Nesa multiplicidade de funcións describimos en detalle como se
elabora a comunicación na asociación Pérgola. Tralo peche dos manicomios nos anos 80 e a lenta
implantación dunha nunca rematada “Reforma Psiquiátrica“, as distincións e imaxinarios cos que se
traballa na asociación adquiren sentido. A complexidade deste traballo deunos pé para describir as
biografías de tres colectivos directamente implicados coa EMG en Galicia.
O primeiro colectivo no que nos centramos foron os familiares de EMG. Os familiares de EMG
comunican dende a intimidade a súa experiencia. No capítulo 8 describimos como a EMG é en Galicia
un mal de familia. Luhmann define o sistema familia sobre a base da comunicación íntima. No interior
dunha familia a intimidade coa EMG descríbese neste capítulo ao fío das opcións sociais existentes, xa
descritas. O perfil biográfico dun familiar próximo a un EMG en Galicia segue unha carreira moral da
que debuxamos neste capítulo as súas fases principais.
En contrapartida e coexistindo coa intima complexidade dos males de familia, os xestores da EMG
falan principalmente de responsabilidade médica. No capítulo 9 debuxamos un esquema da carreira
profesional dos xestores ou coidadores da EMG en Galicia. Dende a toma dunha decisión persoal para
especializarse no campo da psiquiatría, coas diferentes opcións descritas nesta tese, cada un segue unha
serie de fases máis ou menos comúns. Comparten un perfil similar ao longo das súas carreiras
profesionais na complexidade de redes asistenciais existentes. Neste capítulo describimos a complexa
responsabilidade médica dos xestores da EMG en Galicia no século XXI.
~ 264 ~