Orden social e loucura en Galicia - Repositorio Institucional da USC ...

diferenciada do presente. Así, concluímos a existencia de moitas formas diversas de psiquiatría, coa
industria farmacolóxica e as tendencias do managed care facendo realmente complexa a observación da
EM realizada dende o sistema médico.
O paso seguinte (capítulo 3) foi percorre a historia da semántica da ciencia da sociedade. Vimos
como coincidindo coa aparición do capitalismo e o colonialismo (a sociedade funcionalmente
diferenciada en linguaxe luhmaniano) xorden dúas disciplinas con dous métodos contrapostos para a
observación científica do novo sistema social. A antropoloxía observando dende a distinción do
concepto cultura, e a socioloxía facendo o propio dende a distinción do concepto sociedade. Aplicados
ambos conceptos á observación do sistema sanitario emerxente, constatamos a súa inexistencia dende
unha perspectiva complexa estrita aplicada a España ou a Galicia (salvo raras excepcións parciais ou
incompletas). Constatamos así a non existencia dunha socioloxía da EMG en Galicia.
O segundo grande obxectivo desta investigación fíxose entón patente: facer unha descrición da
complexidade social da EMG en Galicia dende unha socioloxía médica estrita. Tódolos capítulos da
segunda parte analizaron fragmentos desa complexidade. En tódolos capítulos seguintes (do 4 ao 11)
describiuse un fragmento da mesma.
Fixemos unha primeira incursión no sistema político-terrotorial e económico para describila historia
e características específicas de Galicia. Perfilamos así a complexidade político-territorial e
administrativa na que a EMG se comunica en Galicia. Na orde social de Galicia conviven varias
entidades política territoriais: a municipal, a comarcal, a provincial, a autonómica Galega, a nacional
Española, a internacional Europea. Cada unha delas achega opcións, recursos e institucións dende os que
os sistemas psíquicos intercambian expectativas, debuxando o ámbito político territorial e administrativo
no que vive a EM.
Un segundo paso consistiu en delimitar a historia da asistencia pública de Caridade e Beneficencia no
século XIX e ata o ano 1992 en Galicia. De acordo co noso marco teórico, as institucións creadas (con
especial atención neste capítulo aos elementos xurídicos en xogo) non desapareceron 885 , senón que son a
base e caldo de cultivo da complexidade asistencial na que a EMG comunicase en Galicia.
Constatáronse a existencia dunha rede extremadamente complexa de dispositivos asistenciais
relacionados coa EMG en Galicia. Pretender que a visión dende un só deles, digamos a asistencia
pública hospitalaria, sexa a clave da EM en Galicia, é, non só inxenuo, senón sobre todo falso. A historia
descrita neste capítulo foi difícil de reconstruír, e é incompleta. O interese das institucións existentes en
impoñer unha determinada observación (prestación política ou económica na maior parte dos casos)
desmóntase cos datos achegados neste capítulo.
Pero neste segundo paso chegouse a outra conclusión importante. Existe un elemento oculto, opaco
no mellor dos casos. É a asistencia psiquiátrica privada. Non é posible atopar nin un só estudo científico
serio e fiable sobre ela en Galicia. Pero a súa presenza nas vidas dos relacionados coa EMG en Galicia
885 Como no caso da psiquiatría privada non existe un estudo completo e científico das ONG do "voluntariado" caritativo na actualidade.
Caritas diocesano, Mans Unidas e toda unha rede complexa de asociacións católicas organizan a moderna caridade. Definen ademais os seus
datos sen contrastalos con outras observacións, dese xeito captan subvencións ao mesmo tempo que "evanxelizan" segundo o seu vocabulario.
Excede os límites desta tese, pero un estudo sociolóxico científico é necesario.
~ 263 ~