Orden social e loucura en Galicia - Repositorio Institucional da USC ...

Fernando formúlase entón unha pregunta: “¿Trátase de medo á informática ou de medo á
información?” A resposta daraa o tempo, pero engade, a HCD fai aos médicos moito máis vulnerables,
exercendo un control sobre a súa función que antes non existía 872 . Supón un cambio de cultura, máis
traballo, máis esforzo, máis organización e dende logo máis control sobre o seu traballo.
Outro problema engadido é a idade de moitos dos psiquiatras e traballadores destas unidades.
Moitos deles son “dinosauros” nisto da informática, analfabetos funcionais diante dun ordenador 873
Fernando ve dúas vías como solución. Unha sería crear unha unidade por enriba de todas estas USM
para coordinalas. Englobaría a todas elas nunha mesma base de datos de pacientes 874 . Serviría de ponte
para ir pouco a pouco cara á HCD que “estamos a impoñer en tódolos Servizos” de Especialidade. O
outro modelo, o máis lóxico segundo Fernando, por ser coherente con outros Servizos, sería considerar
estas USM como consultas externas dos Hospitais. O seu xefe está tamén por esta segunda forma de
“implementación informática” 875 .
Estamos con todos estes problemas “en terra de ninguén”, porque a Consellería non ten unha clara
prioridade con estas USM. Os meus xefes non forzan ao cambio estas USM porque non hai presión
dende arriba. Por agora son as propias USM interesadas as que nos van chamando. Trátase dun
problema de prazos. Tarde ou cedo, a HCD acabarase impoñendo. Servirá para racionalizalo servizo de
atención psiquiátrica fóra dos hospitais, permitindo dispoñer dos datos de cada paciente, xerados en cada
servizo, para un “bo tratamento” noutros servizos médicos. Porque o feito de “que os Hospitais
psiquiátricos dispoñan de tódolos datos dun paciente para poder tratalo con toda a información a man, é
importantísimo, pero”, engade, “trátase dunha cuestión complexa” 876 .
872 Fernando 2: 10.
873 Fernando 2: 10-11.
874 Fernando 2: 3-4.
875 Fernando 2:11.
876 Fernando 2: 13. Neste único caso o énfase é noso.
~ 256 ~