Orden social e loucura en Galicia - Repositorio Institucional da USC ...

sociais principais dende os que estas dúas ciencias sociais observan a EM. Trátase polo tanto de
comprender as distincións dende as que se observa a EM na ciencia da sociedade. O capítulo péchase
cun resumo da semántica onde o sentido é comunicado nunha socioloxía da EM en clave luhmaniana.
Nestes últimos capítulos aludidos faise un percorrido histórico pola semántica e os imaxinarios
sociais de dous sistemas sociais. O sistema médico e a psiquiatría primeiro, e o sistema ciencia despois,
coa antropoloxía e a socioloxía como especialidades da ciencia da sociedade. O noso primeiro paso é
pois edificar a nosa teoría sociolóxica, diferenciándonos de perspectivas sociais simplificadoras dunha
complexidade social crecente.
A segunda parte desta tese é a investigación na que aplicamos este marco teórico á EMG en Galicia.
Preténdese capacitar o lector para observar a complexidade sen prexulgar ningunha das perspectivas que
historicamente se foron perfilando. Os dous primeiros capítulos (Capítulos 4 e 5) desta segunda parte
describen Galicia dende unha perspectiva político territorial primeiro. Así comprenderemos a rede
complexa de administracións que alimentan as institucións encargadas de xestionar a EMG dende o
século XIX. Un segundo capítulo (capítulo 5) describe precisamente o estado legal da asistencia na súa
evolución da Beneficencia ata o ano 1992. O seguinte capítulo (o 6) céntrase entón en dúas Unidades de
Saúde Mental en dous capitais galegas observadas nos anos 90. O capítulo 7 céntrase na Asociación de
Familiares e Enfermos mentais Pérgola na que se recolleron datos durante os últimos 3 anos desde o
2005. Tras esta descrición o noso percorrido describe as carreiras biográficas en contacto coa EMG dos
tres grupos xa sinalados: familiares (capítulo 8), xestores (capítulo 9) e enfermos mentais (capítulo 10)
en Galicia. Rematamos cun capítulo centrado nunha soa entrevista: un informático do SERGAS nos
relatara as dificultades de implantar a Historia Clínica Dixital en toda a complexa rede pública de
institucións xestionadoras da EMG.
Esta investigación remata cunhas conclusións. Nelas constaramos a relevancia das afirmación
vertidas nesta introdución para describir a complexidade da orde social na que se comunica a
Enfermidade Mental Grave en Galicia. Tras elas incluímos uns apéndices que serán de gran axuda para a
comprensión das afirmación que iremos facendo nesta investigación. Neles encontrarase un listado
completo de tódolos datos usados na investigación (perfiles biográficos dos entrevistados). A tese
remata con: (1) un glosario da terminoloxía técnica luhmaniana; (2) outro glosario coas distincións
básicas sinaladas na semántica da psiquiatría, antropoloxía e socioloxía; e finalmente un (3) un índice de
conceptos e nomes utilizados, e (4) índices de táboas e ilustracións; e por suposto (5) unha lista da
bibliografía utilizada durante os anos desta investigación.
~ 19 ~