Orden social e loucura en Galicia - Repositorio Institucional da USC ...

solicitando análise e probas para determinala deterioración neurolóxica. Tras obter eses informes
indícalle á filla que solicite vez á enfermeira, entón poderá aconsellarlles mellor.
Ernesto ten corenta e oito anos. Vén coa súa muller nunha visita para revisala medicación. Sofre
dende hai tempo unha Depresión Maior. Retornou a Galicia tras pasar oito anos traballando en Inglaterra
como limpiador. A parella vive cos seus dous fillos adolescentes na casa do sogro pensionista. Ernesto
comezou sentir fortes dores de cabeza ata desmaiarse. Acode entón á psiquiatría privada de pagamento.
Ingrésano aplicándolle unha serie de electroshockes sen outra anestesia que hipnóticos 730 . Danlle unha
medicación antidepresiva que axudoulle pouco a pouco a recuperala perda de memoria causada polo
electroshocke. Acode á pública polo bo nome do servizo ofrecido por Mauricio, comenta a muller.
Mauricio inténtalle cada vez rebaixala medicación, pero repítelle dous ou tres veces ao longo da consulta
que el ten que esforzarse por saír e facer cousas. Ao longo da visita, Ernesto fala das súas doenzas
psíquicas somatizando as súas dores, situándoos en sitios concretos do seu corpo. Mauricio coméntame
ao saír o efecto placebo de moitas pastillas nestes casos onde a somatización predomina.
Ernestina ten setenta anos e entra na consulta co seu marido. Non falan case, entréganme unha folla
cunha análise que eu copio para incorporar a súa Historia. Entréganlle a Mauricio un regalo; el recolleou
e gardaoo baixo a mesa. Logo, coméntame como ambos os dous pasaron pola súa consulta privada. El
facilitoulles unha cita neste servizo gratuíto preto da súa casa, o regalo é o seu “pagamento” polo favor.
Mauricio pídeme que saia da consulta. Logo coméntame que se trata dun efecto secundario “dunha
medicación anterior difícil de arranxar”.
Os nosos dous últimos casos pasan moito máis á présa. O primeiro é unha muller cunha síndrome
depresiva maior. Vén porque non lle gustan as pastillas para durmir receitadas nunha visita anterior.
Mauricio esténdelle unha receita gratuíta de pensionista e indícame como protestan por cousas “sen
importancia”, aceptando sen dicir nin pío a mala asistencia sanitaria que sofren. O último caso da mañá
é outra muller de setenta e oito anos cunha Depresión. Vive na Casa familiar co seu marido, o seu fillo, a
súa nora e os fillos deste segundo matrimonio. Acode coa súa filla. Mauricio indícalle que pode
traballar, que o único que non pode facer é quedar na cama. A muller presenta un aspecto moi
avellentado. Cando saen tras cinco minutos de visita médica, Mauricio apúntame que, no fondo, hai un
caso de “Histeria”, repite, dificilísimo de tratar.
Ao longo da mañá houbo outros casos dos que non puiden tomar nota. Entre outros unha muller
cunha embolia case muda con problemas depresivos, ninguén a quere tratar polo que Mauricio recorre a
un informe que deben presentalos seus familiares ante un médico recomendado por el; unha rapaza con
depresión e alcoholismo, etc.
Tras rematalas consultas Mauricio e Marta fai visitas domiciliarias. Seguen a evolución nos seus
domicilios de tres demencias senís. Desprázanse no coche da enfermeira. Marco e eu esperamos nun
café preto do Centro de Saúde. Marco coméntame un caso “precioso” dunha violación dunha nena de
dez anos coa que estivo en terapia. Sen darme detalles no bar público le o xornal mentres eu escribo as
730 Xa en 1992 a aplicación do electroshocke era descrita na bibliografía como eficaz nas depresións que non responden a ningunha outra
terapia, sempre con anestesia para minimizar efectos secundarios adversos. A historia desta medida terapéutica descríbese de forma
pormenorizada en Shorter-Healy 2007; e nun caso concreto xa no século XXI en Wield 2006.
~ 165 ~