Orden social e loucura en Galicia - Repositorio Institucional da USC ...

alumnos en prácticas é variable. Os MIR están varios meses, mentres que os PIR (psicólogos internos
residentes) o fan durante un período menor. Os alumnos de rotatorio de enfermaría e medicina están
dende uns días ata unha ou dúas semanas. Finalmente os estudantes de traballo social ou de psicoloxía
adoitan formarse na unidade nos denominados rotatorios (rotan por tódolos servizos do sistema
hospitalario) durante uns días. A isto hai que engadir enfermidades, baixas laborais e permisos para
facerse unha idea da complexidade interna.
Macario é o director médico da unidade. Exerce como xefe. Ten unha longa experiencia na saúde
pública gratuíta dende os anos setenta, tanto en ambulatorios e centros de saúde coma en hospitais
psiquiátricos. Ademais, polas tardes, atende na súa consulta privada de pagamento. Logo de cita
telefónica visita nela unha longa lista de clientes dende hai anos.
Primeiro estadillo: marzo 1992 720 .
Os luns a última hora da mañá (unha da tarde) teñen lugar estadillos con tódolos membros “fixos” da
USM1 ademais dos convidados e os alumnos en prácticas. Adoitan durar ata as tres da tarde, pechándose
a xornada de traballo tras finalizar. Hoxe sentamos ao redor dunha mesa de reunións oito persoas: o
psiquiatra xefe da Unidade, o psicólogo, a enfermeira, a asistenta social, un rapaz en prácticas de
psicoloxía, unha médica facendo o rotatorio, e unha MIR de psiquiatría cunha formación bioloxicista
(esta información apúntama antes de entrar Mauricio).
Os estadillos son encontros de traballo estandarizados en tódolos servizos médicos. A súa
periodicidade nesta unidade é semanal. Neles reúnese o persoal da unidade. Póñense ao día coas
novidades da unidade: publicacións interesantes, novos pacientes, asignación de casos, evolución dos
mesmos, novidades nas medicacións, distribución dos traballos, organízase a presenza da unidade en
sesións clínicas a nivel de Galicia ou noutras unidades, congresos, artigos a redactar, protocolos de
investigación, etc.
Macario comeza referíndose a un artigo sobre “A síndrome de Ulises” 721 . Cítao por un paciente do
que falaron nunha sesión anterior. O psicólogo Marco recomienda un tomo das obras de Lacan onde fala
precisamente sobre esta temática. Macario recorda unha investigación na que participa a USM1 sobre
esta temática.
A continuación Marta, a enfermeira anuncia que a semana pasada revisaronse trinta casos dos cales
oito foron “primeiras”, casos novos. Dispóñense a falar de seis destes novos casos pois non puido
atopala carpeta de dous deles. Cada carpeta co seu número de rexistro contén o “volante” co que
viñeron remitidos á Unidade. A carpeta inclúe a historia clínica completa, así como tódalas anotacións
manuscritas dos diferentes profesionais que puidesen atendelo usuario. A enfermeira informa, ao inicio
do estadillo, quen leva cada un dos novos casos, que será quen encargarase a continuación de presentalo
ante a Unidade 722 .
720 Nesta unidade atendín como observador un total de dez estadillos. Describo os datos seguindo as miñas notas, fichas e gravacións de cinco
deles. Intercalando tres dos desprazamentos a dous municipios rurais co psiquiatra, a enfermeira e o psicólogo.
721 Afección psicolóxica relacionada coa emigración. O cambio permanente de situación "provoca" en Ulises trastornos.
722 Durante a miña estanza nesta USM tiven acceso aos arquivos cos historiais dos casos da Unidade. Moitos dos datos dos meus cadernos son
produto das consultas realizadas neles e das notas tomadas tras cada día de observación nos cadernos de campo.
~ 154 ~