Orden social e loucura en Galicia - Repositorio Institucional da USC ...

estatísticas da sociedade como ferramentas descritivas da complexidade do sistema sociedade
emerxente.
Un terceiro elemento é o feito de que todos estes clásicos da socioloxía participan dunha
formulación evolucionista baseada na idea, sensación ou intuición de progreso, de mellora. Queren
describir así o máis obxectivamente posible, unha liña oculta por descubrir na evolución das sociedades,
esa liña sería a guía velada da evolución do sistema social 567 .
Finalmente, un cuarto compoñente que teñen tamén en común é unha preocupación ético moral polo
destino do sistema social emerxente, cunha intención “médico moral” de dirixilo polo bo camiño grazas
aos datos obxectivos achegados. Cada unha destas observacións, cos conceptos e ideas de cada autor,
pasa a formar parte da semántica da socioloxía no século XX. Ningún destes elementos desapareceu por
completo da Socioloxía.
Non existe, como vimos, unha socioloxía médica da complexidade da EMG en Galicia. Non se
elaborou tampouco unha historia do sistema médico e a psiquiatría en Galicia.
Na primeira parte desta investigación demos dous pasos. Primeiro construíuse unha perspectiva
teórica de observación dende a socioloxía da complexidade de Niklas Luhmann. Fundamentáronse
unhas teses cos presupostos sobre os que construímos a nosa observación. O segundo paso consistiu,
asumindo xa as teses citadas, nun percorrido pola historia da semántica dos sistemas sociais encargados
de ofrecer descricións ao sistema social do noso tema de interese: a enfermidade mental grave. Pasamos
nun primeiro momento pola psiquiatría para comprobar as distincións sobre as que se asenta a
observación do sistema médico. Logo, percorremos a grandes trazos os conceptos (sociedade e cultura)
dende os que se observa na ciencia da sociedade sobre a base dunha serie de distincións analizadas.
Para poder construír unha descrición da complexidade da enfermidade mental en Galicia optamos 568
por recoller narracións 569 biográficas a través de entrevistas. Debido á falta de estudios especializados
seleccionouse a recolección de biografías narradas en entrevistas como procedemento para a obtención
de datos. Coas entrevistas realizadas reconstruiremos na segunda parte desta investigación a
complexidade do sistema psiquiátrico en Galicia e a súa historia.
567 Sen por iso confundir, as máis das veces, causa con sucesión. A obra de Jonson e Earle (2003 (2000)) contén actualizada a mellor das
descricións desta tendencia vixente da semántica sociolóxica.
568 Velasco-Díaz 2004: 17 y7 ss.
569 A narratividade xa se discutiu anteriormente. Nesta tese seguimos a definición de narratividade de Elliot (2005: 6), pois casa perfectamente
coas conclusións teóricas e metodolóxicas apuntadas no capítulo primeiro. Narratividade (parafraseamos Eliot 2005: 6) é unha elección
metodolóxica onde tense interese en (1) as experiencias vividas e a apreciación dos entrevistados da temporalidade; en (2) dar voz e poder aos
propios entrevistados á hora de delimitar os temas e conceptos que usan; (3) un interese nos procesos de cambio e a influencia do tempo; (4)
unha clara preocupación polas percepcións do eu e as súas representacións; e finalmente, (5) unha clara conciencia do propio investigador como
narrador.
~ 120 ~