Orden social e loucura en Galicia - Repositorio Institucional da USC ...

acionais das organizacións sociais emerxen 445 . Weber fai unha descrición da racionalización como un
cambio dende unha organización e acción orientada a valores 446 (autoridade tradicional e autoridade
carismática) a unha organización e acción orientada a obxectivos (autoridade racional 447 ). Un terceiro
elemento da achega de Wéber á semántica sociolóxica é reflexivo e metodolóxico. Para a análise da
realidade social a socioloxía debe xerarse unha comprensión interpretativa da acción social. A
investigación social debe usar tipos ideais. Un tipo ideal fórmase a partir de características e elementos
de fenómenos dados estatisticamente, pero non intenta corresponderse con tódalas características de
cada caso particular.
George Simmel (1858-1912) adoptou 448 outra distinción dende a que observar a sociedade
emerxente, achegando unha visión micro sociolóxica á semántica da socioloxía. Apuntamos tres das
súas observacións pola súa relevancia para o tema da nosa tese. Por un lado, o seu artigo de 1903 sobre
as diferenzas entre a “vida mental” na cidade e no campo 449 e apunta alí unha análise obxectiva dos pros
e os contra das dúas formas de integración social. Na cidade o individuo está rodeado por estraños cos
que non comparte inicialmente formas de comprensión, polo que a resposta xeral e polo tanto
socialmente aceptada, será a indiferenza ante o constante cambio urbano 450 . Por outro lado, noutro artigo
de 1908 451 sobre a función social dos estraños, Simmel describe o sistema social xusto dende os seus
límites. Non se centra Simmel no que un grupo social afirma se compono, senón no que definen como
diferente, e que é socialmente usado na definición interna do propio grupo 452 . Finalmente, describiu a
sociedade dende perspectivas centradas no individuo, de aí a denominación de micro-socioloxía para as
súas propostas, centrándose nos procesos de socialización 453 con achegas sempre suxestivos: sinalando
os problemas que o sistema social emerxente solucionaba e aqueles conflitos que producía a nivel
individual.
A Omnisciencia do concepto sociedade.
A socióloga alemá Gehardt na súa obra 454 Ideas about Illness: an intelectual and political history of
medical sociology diferenza catro paradigmas na historia da socioloxía médica dende a Segunda Guerra
Mundial: o funcionalismo estrutural, o interaccionismo, a fenomenoloxía e a teoría do conflito. Cada
paradigma parte dunha concepción diferente da enfermidade, dando lugar a formas de investigación
sociolóxicas diferentes. Todas parten dos elementos xa sinalados no caldo de cultimo da socioloxía do
século XIX.l Imos utilizar esta clasificación de Gehardt na discusión da bibliografía de orientación
sociolóxica sobre a Enfermidade Mental Grave para construír a perspectiva adoptada nesta tese.
Detémonos brevemente en describir cada un destes paradigmas, primeiro nos autores clásicos que os
445 Robert Michels (1876-1936) discípulo de Wéber denominou a esta tendencia (Michels 1972) "lei de ferro da oligarquía": a gaiola de ferro
(Mitzman 1976). Máis adiante Ritzer (1996) describe xa no século XX o proceso de burocratización exponencial: a Mcdonalización
446 Wéber 1979 (1922).
447 Wéber 1986 (1917) describe tamén os perfís sociais dos líderes políticos nese proceso de racionalización.
448 Sabido 2007.
449 Simmel 1986.
450 Estas ideas terán serán recollidas e aplicadas á Enfermidade Mental na Escola de Chicago: véxase máis adiante.
451 Simmel 1971.
452 Simmel 1971 (1908); constitúe un clásico da socioloxía da desviación, véxase Becker 1971.
453 Simmel 1986.
454 Gehardt 1989.
~ 106 ~