Letras novas - Asociación de Escritores en Lingua Galega

Xa van aló vinte números do Xornal Infoxove, pensado desde
o inicio da súa andaina como unha ferramenta informativa de referencia
para a xuventude galega. Nos vinte primeiros números
ficou, mes a mes, grazas á colaboración da Asociación de Escritores
en Lingua Galega, a pegada máis viva da literatura galega de
hoxe na sección Letras Novas.
Porque Letras Novas naceu como un espazo ermo que a creación
literaria de hoxe debería tomar e moldear para si, até converter
a sección nun fluxo mensual de savia elaborada en que
agromar palabras poéticas, pensamentos libres e reflexións internas.
Mes a mes, as páxinas centrais de Infoxove acubillaron no
seu seo a creación das escritoras e dos escritores máis noveis á
par daqueloutros representantes das liñas literarias xermoladas
con grande éxito nas dúas últimas décadas, no tempo de entre
dous séculos.
Se a lectura puntual foi de grande alento e satisfacción ao comprobarmos
a elevada calidade dos produtos literarios máis diversos
que nos ofrecían as letras novas, sorprendéndonos sempre coa
arte tecedora interminábel de palabras, orgullámonos hoxe de
podelos reunir neste volume, para regalía de quen perdeu unha primeira
oportunidade de os/as descubrir e para quen devece por
apreixalos agora na súa totalidade.
Convértese esta fotobiografía sonora nunha ocasión única
para coñecérmolos na súa arte literaria, mais tamén desde a súa
biografía persoal e bibliográfica e desde a súa propia voz, configurando
un arquivo sonoro do que a nosa historia literaria carece.
É preciso visualizar na súa totalidade os creadores e creadoras da
palabra literaria porque son dadores e dadoras de vida, porque
nos axudan a ser máis nós e a exteriorizar o noso mundo particular,
o vivido e o imaxinado.
7