Letras novas - Asociación de Escritores en Lingua Galega

A Vicepresidencia da Igualdade e do Benestar, a través da Dirección
Xeral de Xuventude e Solidariedade, renova para o conxunto da
sociedade galega a través desta publicación a súa implicación activa
e continua para coas nosas plumas máis novas que, desde as ópticas
e os soportes máis tradicionais aos máis innovadores, están a trazar
as liñas contemporáneas da nosa historia literaria.
Conscientes de estarmos in praesentia dunha nova etapa para
as letras galegas, a Vicepresidencia da Igualdade e do Benestar ten
de acreditar nas novas voces que xorden para seren ensaiadas
pola arte dos novos escritores e escritoras que toman o relevo de
quen primeiro nos aprendeu o gusto pola lectura e a escrita.
Non esquecemos, pois, a nosa responsabilidade de continuarmos
a ser tamén promocionadores de cantos foros de intercomunicación
sexan precisos para divulgarmos a viva voz e colocar nos
andeis máis solicitados a vosa escrita literaria e a reflexión metaliteraria
que, para goce de todos e todas nós, concibides.
A creatividade, a imaxinación compartida ao longo de tantos
meses en que Infoxove se ten convertido nun punto de encontro obrigado
para todos aqueles temas que interesan á nosa xuventude,
ratificou en nós a necesidade de aprofundarmos o noso compromiso
firme canto á posta en valor do sistema literario galego, plenamente
vivo e en incesante evolución poética, narrativa, dramática,
ensaística, etc., así como da lingua que o sustenta e dá vida.
A semente literaria que con amarga esperanza debuxara Castelao
ofrécesenos neste volume convertida en materia literaria. Gozádea
co mesmo orgullo que nós sentimos, desde a nosa gratitude a
todos os colaboradores e colaboradoras da sección Letras Novas.
Anxo M. Quintana González
Vicepresidente da Igualdade e do Benestar
5